އައްޑޫ ސިޓީގައި އަނެއްކާ ވެސް މާރާމާރީއެއް ހިންގައި ޒުވާނަކު ޒަޚަމްކޮށްލައިފި އެވެ.

ފުލުހުން މައުލޫމާތު ދިން ގޮތުގައި އައްޑޫ ސިޓީ ހިތަދޫގައި ހިންގި މި މަރާމާރީ އަކީ ދެ ގުރޫޕެއްގެ ދެމެދުގައި ހިންގި މާރާމާރީއެކެވެ.

މާރާމާރީ ހިންގައިގެން އުޅޭ ކަމުގެ ރިޕޯޓު ފުލުހުންނަށް ލިބުނީ މިއަދުގެ 15:30 ގައި ކަމަށް ފުލުހުން މައުލޫމާތު ދީފައިވެއެވެ.

ހިތަދޫގައި ހިންގި އެ މާރާމާރީގައި ތޫނުއެއްޗަކުން ހަމަލާދީ 20 އަހަރުގެ ދިވެހި ފިރިހެނެއް ޒަޚަމްކޮށްލާފައިވާ ކަމަށާއި، އެމީހާއަށް އައްޑޫ ސިޓީ އިކުއިޓޯރިއަލް ހޮސްޕިޓަލުގައި ފަރުވާދެމުން އަންނަކަމަށް ފުލުހުން ވަނީ ބުނެފަ އެވެ. 

ފުލުހުން އިތުރަށް ބުނީ މިހާރު އެ މައްސަލަ ތަހުގީގު ކުރަމުންދާ ކަމަށެވެ. 

ހިތަދޫގައި ގުރޫޕު މާރާމާރީއެއް ހިންގާ 20 އަހަރުގެ ޒުވާނަކު ޒަޚަމްކޮށްލާފައިވާއިރު، މީގެ ކުރިން ހަމަ އެ ސިޓީގައި ހިންގި މާރާމާރީ އަކާއި ގުޅިގެން 4 މީހުން ވަނީ ފުލުހުންގެ ބެލުމުގެ ދަށަށް ގެންގޮސްފަ އެވެ. 

އައްޑޫގައި ހުކުރު ދުވަހުގެ ރޭގައި ހިނގި ގުރޫޕް މާރާމާރީގައި 30 އަހަރުގެ ދިވެހި ފިރިހެނަކު ވެސް ވަނީ ޒަޚަމް ކޮށްލާފައިވާއެވެ.

އެ ޒުވާނާގެ ހާލު ސީރިއަސްކަމުގައި ހޮސްޕިޓަލާއި ހަވާލާދީ ފުލުހުން ބުނެއެވެ. 

އެނގިފައިވާ ގޮތުގައި ހިތަދޫގައި ރޭ ހިނގި މާރާމާރީގައި ދެ ގްރޫޕުގެ ދެމެދު ކުރިމަތިލުމެއް ހިނގި އިރު ދެ ގްރޫޕުން ވެސް ތިބީ ތޫނު ހަތިޔާރު ހިފައިގެންނެވެ.

އައްޑޫސިޓީގައި ހިންގި މާރާމާރީ އާ ގުޅިގެން އެސިޓީގެ ސަލާމަތާއި ރައްކާތެރިކަން ވަރުގަދަކުރުމަށް މާލެއިން ފުލުހުންގެ ޓީމްތަކެއް ފޮނުއްވުމުގެ މަސައްކަތް ކުރަމުންދާ ކަމަށް ރޭ ފުލުހުން ވަނީ ބުނެފަ އެވެ.