އިއްޔެ ކުރިއަސް ގެންދިޔަ ދަ ޑިމޮކްރެޓްސްގެ އެތެރޭގެ އިންތިޚާބުގެ ވަގުތީ ނަތީޖާ މިރޭ އިއުލާނު ކުރާނެކަން އެ ޕާޓީން އިއުލާނުކޮށްފިއެވެ. 

 އެ ޕާޓީގެ ވަގުތީ ނަތީޖާ މިއަދު އިއުލާނު ކުރާނެ ކަމަށް ބުނެ އިއުލާނު ކުރުން ލަސްވެ، އާންމު މެމްބަރުން ކަންބޮޑުވުން ފާޅުކުރަމުން އަންނަ ދަނޑިވަޅެއްގައި އެ ޕާޓީެ ރަސްމީ ޓުވިޓާ އެކައުންޓުން ކޮށްފައިވާ ޓުވީޓެއްގައި ބުނެފައިވަނީ އިންތިޚާބުގެ ވަގުތީ ނަތީޖާ މިރޭ އިއުލާނު ކުރާނެކަމަށެވެ. 

އެގޮތުން އެ  ޕާޓީގެ އެތެރޭގެ އިންތިޚާބުގެ ވަގުތީ ނަތީޖާ މިރޭ 08:00 ގައި ދަ ޑިމޮކްރެޓްސް ގެ މައި އިދާރާގައި އޮންނާނެ ކަމުގައި އެ ޕާޓީން ކުރި ޓުވީޓުގައި ބުނެފައިވެއެވެ. 

Advertisement

އިއްޔެ ބޭއްވި ޑިމޮކްރެޓްސްގެ އެތެރޭގެ އިންތިޚާބުގައި އެ ޕާޓީގެ ރައީސާއި ނައިބު ރައީސް ހިމެނޭހެން 23 މަޤާމަކަށް ބޭފުޅުން އިންތިހާބު ކުރުމަށް ވަނީ ވޯޓް ނަގާފައެވެ.

ޑިމޮކްރެޓްސް ގެ އިންތިޚާބުގެ ނަތީޖާ ލަސްވުމުގެ ސަބަބުން އެކަމާ ކަނބޮޑުވުން ފާޅުކުރައްވާ އެ ޕާޓީގެ ރައީސްކަމަށް ވާދަކުރެއްވި ހުސެއިން އަމްރުވެސް ވަނީ މިއަދު ޓުވީޓު ކުރައްވައިފައެވެ. 

ދަ ޑިމޮކްރެޓްސްއަކީ ކުރީގެ ރައީސް މުހައްމަދު ނަޝީދުއާއި އެ މަނިކުފާނުގެ ސިޔާސީ ފިކުރަށް ތާއީދު ކުރާ ފަރާތްތަކުން އިސްވެތިއްބަވާ އުފައްދަވާފައިވާ ޕާޓީއެކެވެ. އެ ޕާޓީ ރެޖިސްޓްރީކޮށްފައި ވަނީ މި އަހަރުގެ ޖުލައި މަހުގެ 12 ވަނަ ދުވަހު އެވެ.