ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ތިމަރަފުށީގައި އިމާރަތްކުރި ހައުސިންގ ޔުނިޓަށް ޝަރުތު ހަމަވާ މީހުންގެ ލިސްޓް އާންމުކޮށްފިއެވެ. 

ތިމަރަފުށީގައި ގާއިމްކޮށްފައިވާ ފްލެޓްތަކުގެ ކެޓަގަރީގެ ތެރެއިން ދޫކުރުމަށް ހަމަޖެހިފައިވާ 83 ހައުސިންގ ޔުނިޓް ދޫކުރުމަށް ހަމަޖެހިފައިވަނީ ތިމަރަފުށީ ރައްޔިތުންގެ ތެރެއިން އެ ހައުސިންގ ޔުނިޓް ބޭނުންވާ ފަރާތްތަކަށެވެ.

އަދި ކެޓަގަރީ ބީގެ ތެރެއިން ދޫކުރުމަށް ހަމަޖެހިފައިވާ 15 ހައުސިންގ ޔުނިޓް ދޫކުރުމަށް ހަމަޖެހިފައިވަނީ ތިމަރަފުއްޓަށް ދިރިއުޅުން ބަދަލުކުރުމަށް ބޭނުންވާ ފަރާތްތަކަށެވެ. 

Advertisement

ތިމަރަފުށީ ކައުންސިލްގެ އިދާރާއިން މިއަދު އާންމުކުރި ލިސްޓާ ގުޅިގެން އެއްވެސް ފަރާތަކުން ޝަކުވާއެއް ހުށަހަޅަން ބޭނުންވާނަމަ އެ ޝަކުވާއެއް 17 ޑިސެމްބަރ ވާ އާދީއްތަ ދުވަހުގެ 13:00 ގެ ކުރިން ހުށަހެޅުމަށް ވަނީ އެދިފައެވެ.

ހައުސިން ޔުނިޓް ލިބޭ ފަރާތްތަކުގެ ދާއިމީ ލިސްޓް އާންމު ކުރުމަށް ހަމަޖެހިފައިވަނީ ޝަކުވާގެ މުއްދަތު ހަމަވާތާ ރަސްމީ 10 ދުވަހުގެ ތެރޭގައެވެ. އެއަށްފަހު ހައުސިން ޔުނިޓް ލިބޭ ފަރާތްތަކުގެ ދާއިމީ ލިސްޓް އާންމު ކުރުމަށްފަހު ހައުސިން ޔުނިޓް ލިބޭ ފަރާތްތަކުގެ މެދުގައި ގުރު އަތުލުމަށް ވަނީ ނިންމާފައެވެ.

ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ތިމަރަފުށީގައި އިމާރަތްކުރި 100 ހައުސިންގ ޔުނިޓަށް އެދުމުގެ ފުރުސަތު ހުޅުވައިލީ 2022 ޖުލައިގައެވެ.