ރައްޔިތުންގެ މަޖިލީހުގެ އާ ނައިބު ރައީސް ކަމުގެ މަގާމަށް ހޯރަފުށީ ދާއިރާގެ މެންބަރު އަޙްމަދު ސަލީމް އިންތިހާބުކޮށްފިއެވެ.

މަޖިލީހުގެ ނައިބު ރައީސް ކަމުގެ މަގާމު ހުސްވެފައިވަނީ، އެ މަގާމުގައި ހުންނެވި ގަލޮޅު އުތުރު ދާއިރާގެ މެންބަރު އީވާ އަބްދުالله މިއަދު އިސްތިއުފާ ދެއްވުމާ ގުޅިގެންނެވެ. އީވާ އިސްތިއުފާ ދެއްވީ އިތުބާރު ނެތް ކަމުގެ ވޯޓް މިއަދަށް އެޖެންޑާ ކޮށްފައި ވަނިކޮށް، ޖަވާބުދާރީ ވުމުގެ ފުރުސަތުގެ ތެރެއިންނެވެ.

އީވާ މަގާމުން އިސްތިއުފާ ދެއްވުމާ ގުޅިގެން ހުސްވެފައިވާ މަޖިލީހުގެ ނައިބު ރައީސް ކަމުގެ މަގާމަށް އިދިކޮޅު މައި ޕާޓީ އެމްޑީޕީގެ ފަރާތުން ވާދަ ކުރާނެ މެންބަރެއް ކަނޑައެޅުމަށް މިއަދު ސިއްރު ވޯޓެއް ނަގާފައި ވާއިރު، އެ މަގާމަށް ޝައުގުވެރިކަން ފާޅުކުރި މެންބަރުންގެ ތެރެއިން އެންމެ ގިނަ ވޯޓު ލިބުނީ ސަލީމަށެވެ.

Advertisement

ވޯޓުގައި މަޖިލީހުގެ ނައިބު ރައީސް ކަމަށް ވާދަކުރެއްވުމަށް ސަލީމް ގެ އިތުރުން ނަން ހުށަހެޅުއްވީ، އައްޑޫ މީދޫ ދާއިރާގެ މެންބަރު ރޮޒައިނާ އާދަމްއާއި ކާށިދޫ ދާއިރާގެ މެންބަރު ޖާބިރުއެވެ.

އެ ވޯޓުގައި ސައްލެއަށް ޖުމުލަ 26 ވޯޓު ލިބުނު އިރު، ރޮޒެއިނާއަށް ލިބުނީ 23 ވޯޓެވެ. އަދި ޖާބިރަށް ލިބުނީ އެންމެ 4 ވޯޓެވެ. 

ރައްޔިތުންގެ މަޖިލީހުގެ ނައިބް ރައީސް ހޮވުމަށްޓަކައި މިރޭ 8:30ގައި ބޭއްވި މަޖިލީހުގެ ޖަލްސާގައި އެންމެ ފުރަތަމަ ސަލީމްގެ ނަން ހުށަހަޅާފައި ވަނިކޮށް، ތޮއްޑޫ ދާއިރާގެ މެންބަރު ހަސަން ޝިޔާން ވަނީ މަޖިލީހުގެ ނައިބް ރައީސް ކަމަށް ޖާބިރުގެ ނަންވެސް ހުށަހަޅުއްވާފަ އެވެ.

އެހެންކަމުން މަޖިލީހުގެ ނައިބު ރައީސް ހޮވުމަށް ދެބޭފުޅުންގެ މެދުގައި ސިއްރު ވޯޓެއް ނަގާފައިވާއިރު، ނެގި ސިއްރު ވޯޓު ގުނާފައި ވަނީ ފަސް މެންބަރުންގެ ކޮމިޓީއެއް އެކުލަވާލައިގެންނެވެ. އެގޮތުން 69 މެންބަރުންގެ އިއްތިފާގުން އުފެއްދި ފަސް މެންބަރުންގެ ކޮމިޓީގައި ތިއްބެވީ މައްޗަންގޯޅި އުތުރު ދާއިރާގެ މެންބަރު މުޙައްމަދު ރަޝީދާއި، މަހިބަދޫ ދާއިރާގެ މެންބަރު އަހުމަދު ތާރިގާއި، ތުލުސްދޫ ދާއިރާގެ މެންބަރު އިބްރާހީމް ނަސީރާއި، ނޮޅިވަރަމް ދާއިރާގެ މެންބަރު މުހައްމަދު ރަޝީދުގެ އިތުރުން ހެންވޭރު ދެކުނު ދާއިރާގެ މެންބަރު ހުސެއިން ޝަހީމް އެވެ.

74 މެންބަރުން ބައިވެރިވި މި ސިއްރު ވޯޓުގައި ސަލީމަށް ލިބިވަޑައިގަތީ 51 ވޯޓެވެ. އަދި ޖާބިރަށް ލިބިވަޑައިގެންނެވީ 23 ވޯޓެވެ.