މީ ސަރުކާރާއި އެއްކޮށް މަސައްކަތްކުރާނެ މޭޔަރަކު މާލޭ ސިޓީއަށް ހޮވަންވީ ވަގުތުކަމަށް ޕީއެންސީގެ ފަރާތުން މާލެ ސިޓީގެ މޭޔަރުކަމަށް ވާދަކުރަން ނިންމާފައިވާ ކުރީގެ ބަންޑާރަ ނައިބު އާޒިމާ ޝުކޫރު ވިދާޅުވެއްޖެ އެވެ.

އާޒިމާ މިފަދައިން ވިދާޅުވެފައި ވަނީ ޕީއެންސީގެ ފަރާތުން މާލެ ސިޓީގެ މޭޔަރުކަމަށް ވާދަކުރުމަށް ހުށައަޅާ ފޯމު އެ ޕާޓީގެ ޗެއާޕާސަން އަބްދުއްރަހީމްގެ އަތްޕުޅަށް އެރުވުމަށްފަހު މީޑިއާތަކަށް ދެއްވި އިންޓަވިއުއެއްގަ އެވެ. 

އާޒިމާ ވިދާޅުވީ މިހާރު ވެރިކަމުގައި ހުންނެވީ ހައުސިން މިނިސްޓަރުކަން ކުރެއްވުމަށްފަހު، އަދި އެފަހުން މާލެ ސިޓީގެ މޭޔަރުކަން ކުރައްވާފައިވާ ބޭފުޅެއް ކަމަށެވެ. 

އެހެން ކަމުން މާލެ ސިޓީއަށް ދިމާވެފައިވާ މައްސަލަތައް ވަރަށް ރަނގަޅަށް އެނގިވަޑައިގަންނަވާނެ ކަމަށާއި، ސަރުކާރާއެކު މަސައްކަތް ކުރައްވާނެ ބޭފުޅަކު މާލޭ ސިޓީގެ މޭޔަރަކަށް ހޮވައިދިނުމަކީ ރައްޔިތުންނަށް ދިމާވެފައިވާ މައްސަލަތައް ހައްލުކުރުމުގައި އެތައް ގޮތަކުން ފަސޭހަތައް ލިބިގެންދާނެ ކަމެއްކަމަށް އާޒިމާ ވިދާޅުވި އެވެ. 

އާޒިމާ ވިދާޅުވީ މުޅި ރާއްޖެއަށް ދިމާވެފައިވާ ބޮޑެތި މައްސަލަތައް ވެސް ޙައްލުކުރެވޭނީ މާލެއަށް ދިމާވެފައިވާ މައްސަލަތަކަށް ހައްލު ހޯދައިގެން ކަމަށެވެ. 

އެގޮތުން ރާއްޖޭގެ އާބާދީގެ ދެބައިކުޅަ އެއްބަޔާއި ގާތްކުރާ އަދަދަކަށް މީހުން މާލެ ސިޓީގައި ދިރިއުޅެމުންދާއިރު، އަދި މާލެ އަކީ ގިނަ ބޭނުންތަކަށް މީހުން އައިސް ގޮސްވެ އުޅޭ ތަނަކަށް ވާއިރު، މި އެންމެންނަށް ރައްކާތެރި ތަނަކަށް މާލެ ސިޓީ ހެދުމަކީ މުހިންމު ކަމެއްކަމަށް ދެކިވަޑައިގަންނަވާ ކަމަށް އާޒިމާ ވިދާޅުވި އެވެ. 

އެއާއެކު އޭނާ ވިދާޅުވީ އޭނާ އަށް ލިބިވަޑައިގެން ހުންނެވި ތައުލީމާއި ތަޖުރިބާގެ ބޭނުން ކުރައްވައިގެން ސަރުކާރާއި ގުޅިގެން މި މައްސަލަތަކަށް ހައްލު ހޯއްދަވާދެއްވިދާނެ ކަމަށެވެ.