ރައްޔިތުންގެ މަޖިލީހުގެ ރިޔާސަތުގައި އިންނެވި މަޖިލީހުގެ ރައީސް މުހައްމަދު އަސްލަމް، މަޖިލީހުގެ ޖަލްސާތަކުގެ ކޯރަމް ހަމަކުރައްވަމުންދަނީ ގަވާއިދާއި ޚިލާފަށް ކަމަށް، އިހަވަންދޫ ދާއިރާގެ އެމްޑީޕީ މެންބަރު މުހައްމަދު ޝިފާޢު ވިދާޅުވެއްޖެއެވެ. 

ރައްޔިތުންގެ މަޖިލީހުގެ މިއަދުގެ ޖަލްސާ ކުރިއަށް ދަނިކޮށް، ނިޒާމީ ނުކުތާ ނަންގަވައި ޝިފާޢު ގަނީ މަޖިލީހުގެ ގަވައިދުގައިވާ ގޮތުން ޖަލްސާތަކުގެ ކޯރަމް ހަމަކުރަންޖެހޭނީ މަޖިލީހުގެ މެންބަރުންގެ އަދަދަށް ބަލައިގެންކަން ފާހަގަ ކުރައްވާފައެވެ. 

ނަމަވެސް މިވަގުތު ރިޔާސަތުން މަޖިލީހުގެ ކޯރަމް ހަމަ ކުރައްވަމުން ގެންދަވަނީ އިސްތިއުފާ ދެއްވަވާފައިވާ މެންބަރުންވެސް ހިމަނުއްވައިގެން ކަމަށާއި އެއީ ގަވާއިދާއި ޚިލާފް ކަމެއް ކަމަށް ޝިފާޢު ވިދާޅުވި އެވެ. 

Advertisement

ޝިފާއުގެ ވާހަކައާއި ގުޅިގެން ރިޔާސަތުގައި އިންނެވި އަސްލަމް ވިދާޅުވީ، ގަވާއިދުގައި އެފަދައިން ވިދާޅުވެފައި ވީ ނަމަވެސް، މަޖިލީހުގެ މެންބަރުންގެ އަދަދު ކަނޑައަޅާނެ ގޮތުގެ ތަފްސީލް މަޖިލީހުގެ ގަވާއިދުގައި ނުވާ ކަމަށެވެ. 

އެހެން ކަމުން، މިވީހާ ތަނަށްވެސް ކަން ކުރަމުން އައި އުސޫލަކީ މަޖިލީސް އެކުލެވިގެންވާ މެންބަރުންގެ އަދަދަު ކަމަށްވާ 87 އަކީ މަޖިލީހުގެ މެންބަރުންގެ އަދަދު ކަމަށް އަސްލަމް ވިދާޅުވިއެވެ. ވުމާއެކު ކޯރަމް ހަމަކުރުމުގައި ބަލަނީ އެ 87 މެންބަރުންގެ 25 އިންސައްތަ އަށް ކަމަށާ، އެއީ 22 މެންބަރުން ކަމަށް އޭނާ ވިދާޅުވިއެވެ. 

ޝިފާއު މިހެން ވިދާޅުވެފައި ވާއިރު، އައު ސަރުކާރާއި އެކު، މަޖިލީހުގެ ޕީޕީއެމް/ޕީއެންސީއަށް ނިސްބަތްވެވަޑައިގަންނަވާ ގިނަ މެންބަރުން ތަކެއް ވަނީ، ސަރުކާރުގެ މަގާމް ތަކާއި ހަވާލުވެވަޑައިގެންނެވުމަށްފަހު މަޖިލިސް މެންބަރު ކަމުން އިސްތިއުފާ ދެއްވާފައެވެ. 

އެގޮތުން އިސްތިއުފާ ދެއްވާފައި މެންބަރުންނަކީ؛

• މިހާރުގެ އިކޮނަމިކް މިނިސްޓަރު އަދި ކުރީގެ މާވަށު ދާއިރާގެ މެންބަރު މުހައްމަދު ސަޢީދު،

• މިހާރުގެ ލޯކަލް ގަވަމަންޓް މިނިސްޓަރު އަދި ކުރީގެ މަޑުއްވަރީ ދާއިރާގެ މެންބަރު އާދަމް ޝަރީފް ޢުމަރު،

• މިހާރުގެ ނާއިބު ރައީސް އަދި ކުރީގެ ފަރެސްމާތޮޑާ ދާއިރާގެ މެންބަރު ހުސައިން މުހައްމަދު ލަތީފް

• މިހާރުގެ އާބަންކޯގެ މެނޭޖިންގ ޑައިރެކްޓަރ އަދި ފެލިދޫ ދާއިރާގެ މެންބަރު އިބްރާހީމް ފަޒުލް ރަޝީދު