ރައްޔިތުން މަޖިލީހުގެ ނައިބު ރައީސްއަކު އިންތިހާބު ކުރުމަށް ރޭ ބޭއްވި ޖަލްސާގައި، އެމްޑީޕީގެ ޕާލިމެންޓްރީ ގްރޫޕުން ނެރުނު ވިޕާ ހިލާފުވުމާއި ގުޅިގެން، ތޮއްޑޫ ދާއިރާގެ މެންބަރު ހަސަން ޝިޔާން އާއި، ކާށިދޫ ދާއިރާ މެންބަރު ޖާބިރަށް ފިޔަވަޅު އަޅައިދޭން އެދެން ނިންމައިފި އެވެ.

މަޖިލީހުގެ ނައިބު ރައީސް ކަމުގައި ހުންނެވި އީވާ އަބްދުالله އެމަގާމުން އިސްތިއުފާ ދެއްވުމާއިގުޅިގެން، އާ ނައިބު ރައީސަކު ހޮވުމަށް އެމްޑީޕީގެ ފަރާތުން ކުރިމަތިލުމަށް ހުޅުވާލުމުން ކުރިމަތިލެއްވީ، ހޯރަފުށީ ދާއިރާގެ މެންބަރު ސަލީމް އާއި ކާށިދޫ ދާއިރާގެ މެންބަރު ޖާބިރުގެ އިތުރުން އައްޑޫ މީދޫ ދާއިރާގެ މެންބަރު ރޮޒައިނާ އާދަމްއެވެ. ޕާޓީގެ ޕީޖީ ގުރޫޕްގެ މެދުގައި ބޭއްވި އިންތިޚާބު ސަލީމް ކާމިޔާބު ކުރައްވާފައިވާއިރު، އޭނާ އެ މަގާމަށް އިންތިހާބު ކުރުމަށް އެމްޑީޕީއިން އޮތީ ތްރީލައިން ވިޕެއް ނެރެފައެވެ.

އެންމެ ފުރަތަމަ ޖަލްސާގައި އެމްޑީޕީގެ ޕާލިމެންޓްރީ ގުރޫޕްގެ ނިންމުމާ އެއްގޮތަށް މަޖިލީހުގެ ނައިބު ރައީސް ކަމުގެ މަގާމަށް ހުށަހެޅުއްވީ ސަލީމުގެ ނަމެވެ. ނަމަވެސް ސަލީމުގެ ނަން ހުށަހަޅުއްވާފައި ވަނިކޮށް އެޕާޓީގެ ތޮއްޑޫ ދާއިރާގެ މެންބަރު ހަސަން ޝިޔާން ވަނީ މަޖިލީހުގެ ނައިބް ރައީސް ކަމަށް ޖާބިރުގެ ނަން ވެސް ހުށަހަޅުއްވާފައެވެ.

އެހެންކަމުން ސަލީމް އާއި ޖާބިރު އާއި ދެބޭފުޅުންގެ މެދުގައި ސިއްރު ވޯޓެއް ނަގާ، 51 ވޯޓާއިއެކު ކާމިޔާބުކުރެއްވީ ސަލީމް އެވެ. އަދި ޖާބިރަށް ލިބިވަޑައިގަތީ 23 ވޯޓެވެ.

މިކަމާ ގުޅިގެން އެމްޑީޕީ ޕީޖީ ގްރޫޕްގެ ސްޕޯކްޕާސަން އަދި ވެލިދޫ ދާއިރާގެ މެންބަރު ޝަފީގް ވިދާޅުވީ، ވިޕްލައިނާ ހިލާފުވެގަފައިވާ ދެ މެންބަރުންގެ މައްސަލަ އެމްޑީޕީއަށް ހުށަހަޅުއްވާނެ ކަމަށެވެ.