ރައްޔިތުންގެ މަޖިލީހުގެ ނައިބު ރައީސް ކަމުގެ މަގާމަށް އިދިކޮޅު މައި ޕާޓީ އެމްޑީޕީގެ ފަރާތުން ވާދަކުރައްވާނެ ކެނޑިޑޭޓަކު ހޮވުމަށް ބޭއްވި އެތެރޭގެ އިންތިހާބުގެ ނަތީޖާއިން ފެނިގެން ދިޔައީ، އެމްޑީޕީއަކީ ހަގީގީ ޑިމޮކްރެޓިކް ޕާޓީކަމަށް މަޖިލީހުގެ ނައިބު ރައީސް އަދި ހޯރަފުށި ދާއިރާގެ މެންބަރު އަހްމަދު ސަލީމް ވިދާޅުވެއްޖެ އެވެ.
ރައްޔިތުންގެ މަޖިލީހުގެ ނައިބު ރައީސް ކަމަށް އިންތިހާބުވުމާއި ގުޅިގެން ވާހަކަ ދައްކަވަމުން ސަލީމް ވިދާޅުވީ، ޕާޓީގެ އެތޭރޭގެ އިންތިހާބުން ކާމިޔާބު ލިބުމަކީ، އެމްޑީޕީއަކީ ކޮންމެ މީހަކުވެސް ކުރިއަށް ދިއުމަށް މަގުކޮށައިދޭ ޕާޓީއެއްކަން ހާމަވާކަމެއްކަމަށެވެ.
އަޅުގަނޑުގެ ޝުކުރުގަ އެމްޑީޕީ ހިންގެވުމުގަ މުގުލަ ހުންނެވި ކުރީގެ ރައީސް އިބްރާހީމް މުޙަންމަދު ސޯލިހް ގެ ނަންފުޅު ފާހަގަ ކުރަން، އަދި ޕާޓީގެ ޗެއާރ ޕާރސަން އާ ޕާޓީގެ ލޮބުވެތި ހުރިހާ މެންބަރުން ޕާޓީ ދެމެހެއްޓެވުމަށް ކުރައްވާ މަސައްކަތް ފާހަގަކޮށް ހުރިހާ ފަރާތްތަކަށް ޝުކުރު ދަންނަވަން
ސަލީމް
ސަލީމް ވިދާޅުވީ، އެމްޑީޕީއަކީ ރައްޔިތުންގެ ހައްގުގައި ކުރަންޖެހުނު ކޮންމެ ކަމެއް ކުރުމުގައި ދެމިއޮންނާނޭ ޕާޓީއެއް ކަމަށާއި، މަޖިލީހުގެ ނައިބު ރައީސް ކަމުގެ މަގާމަށް އިންތިހާބުކުރުމަށްޓަކައި ވޯޓުދެއްވި އެއްމެހާ މެންބަރުންނަށް ޝުކުރުއަދާކުރައްވާކަމަށެވެ.
މަޖިލީހުގެ ނައިބް ރައީސް ކަމުގެ މަގާމަށް ސަލީމް ހޮވިފައިވަނީ 51 މެމްބަރުންގެ ވޯޓުންނެވެ.
ރައްޔިތުންގެ މަޖިލީހުގެ ނައިބު ރައީސް ކަމުގެ މަގާމުގައި ކުރިން ހުންނެވި އީވާ އަބްދުﷲގެ އިތުބާރު ނެތް ކަމުގެ މައްސަލަ އެޖެންޑާކޮށް، ބަހުސް ކުރައްވަމުން ގެންދަވަނިކޮށް، އޭނާ ވަނީ އެމަގާމުން އިސްތިއުފާދެއްވާފައެވެ.
Advertisement
This content is created and paid for by advertisers and does not involve Voice Journalists
