ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އަށް ރައީސް ޑރ. މުހައްމަދު މުއިއްޒު އައްޔަން ކުރެއްވި ފަސް މެންބަރުންނަށް ރުހުން ހޯދުމަށް ރައްޔިތުންގެ މަޖިލީހަށް މިއަދު ހުށަހަޅައިފި އެވެ.

ދައުލަތުގެ ވިޔަފާރި ތަންތަން ޕްރައިވަޓައިޒްކުރުމާއި، ކޯޕަރަޓައިޒްކުރުމާއި އަދި މޮނިޓަރކޮށް އެވެލުއޭޓްކުރުމުގެ ޤާނޫނައި ބަޔާންކޮށްފައިވާ ގޮތުގެ މަތިން އުފައްދާފައިވާ ޕީބީސީގެ މެންބަރުކަމަށް ރައީސް އައްޔަންކުރައްވާފައިވާ މެންބަރުންގެ ރުހުން ހޯއްދެވުމަށް ފޮނުއްވާފައިވާ މައްސަލަ، ދިރާސާކޮށް ގޮތެއް ނިންމުމަށް އެ މައްސަލައާއިގުޅޭ ދާއިމީ ކޮމެޓީއަށް މިއަދު ވަނީ ފޮނުވާފައެވެ.

އެގޮތުން ޕީބީސީއަށް އައްޔަންކޮށް ރުހުން ހޯދުމަށް ރައީސް ވަނީ ޖުމުލަ ފަސް މެންބަރުންނެއްގެ ނަން ފޮނުއްވާފައެވެ. އެމެންބަރުންގެ ތެރޭގައި ހިމެނީ، ބޯޑުގެ ރައީސްކަމަށް ހަމްދީ އަގީލް އާއި، އިކޮނޮމިކްސް ދާއިރާއަށް ހަސަން ޒަރީރު އާއި، އެކައުންޓިން އަދި ފިނޭންސްގެ ދާއިރާއިންއަށް އަހުމަދު މުޝްތާގު އާއި ބޭންކިންގެ ދާއިރާއަށް ލީނާ އަބްދުލް ޖަލީލްގެ އިތުރުން ބިޒްނަސް އެޑްމިނިސްޓްރޭޝަންގެ ދާއިރާއިއަށް މޫސާ ފަތުހީ އާދަމް އެވެ.

Advertisement