ދުވާފަރު ދާއިރާގެ މެންބަރު އިސްމާއިލް އަހުމަދު ހުށަހަޅުއްވާފައިވާ ކުންފުނީގެ ބިލު ފާސްކުރުމަށްޓަކައި ވޯޓަށް އެހުމަށް ބޭނުންވާ އަދަދަށް ކޯރަމް ހަމަނުވާތީ އެ ވޯޓަށް އެހުން މާދަމާއަށް ފަސްކޮށްފި އެވެ.
މިއަދު ކުރިއަށްގެންދިޔަ ރައްޔިތުންގެ މަޖިލީހުގެ 2023 ވަނަ އަހަރުގެ ތިން ވަނަ ދައުރުގެ ވަނަ ޖަލްސާއަށް ވަނީ ކުންފުނީގެ ބިލު އިޤްތިޞާދީ ކޮމެޓީން ދިރާސާކޮށް ނިންމިގޮތަށް މަޖިލީހުން ފާސްކުރުމާއިމެދު މެންބަރުންގެ މެދުގައި ވޯޓަށް އެހުމަށް އެޖެންޑާކުރެވިފައެވެ.
މަޖިލީހުގެ ރައީސް މުހައްމަދު އަސްލަމް ވިދާޅުވީ، މިވޯޓަށް މަޖިލީހުގެ ގަވާއިދުގެ 49 ވަނަ މާއްދާގެ ރ. ގައި ބުނެފައިވާ ގޮތުން 44 މެމްބަރުން ކޯރަމުގައި ތިއްބަވަންޖެހޭ ކަމަށެވެ. ނަމަވެސް ވޯޓަށް އެހި ވަގުތު މަޖިލީހުގެ ތަޅުމުގައި ތިއްބެވީ 30 މެމްބަރުންނެވެ. އެހެންކަމުން މިބިލަށް ވޯޓަށް އެހުމަށް މާދަމާގެ ޖަލްސާއަށް ވަނީ ފަސްކުރެވިފައެވެ.
ދުވާފަރު ދާއިރާގެ މެންބަރު އިސްމާއިލް އަހުމަދު ހުށަހެޅުއްވި މި މި ބިލުގައި ދިވެހިރާއްޖޭގައި ކުންފުނި އުފެއްދުމާއި ރަޖިސްޓަރީކުރުމާއި ހިންގުމާއި، އުވާލުމުގެ ހަމަތަކާއި، ކުންފުނިތަކާ ބެހޭ ގޮތުން ދިވެހިރާއްޖޭގައި އަމަލުކުރެވޭނެ އެނޫންވެސް އުސޫލުތަކާއި އިޖުރާއަތުތައް ބަޔާންކުރާ ބިލެކެވެ.
Advertisement
This content is created and paid for by advertisers and does not involve Voice Journalists
