ރާއްޖޭގައި ނިރުބަވެރިކަމަށް ފަންޑުކުރާ ކަމަށް ތުހުމަތުކުރެވޭ އެތައް ބަޔަކާއި، ކުންފުނިތަކެއް ހުރިކަމަށް އެމެރިކާއިން ކަނޑައެޅުމާއި ގުޅިގެން ރާއްޖޭގެ ރީތި ނަމާއި އިޤްތިޞާދަށް ގެއްލުން ލިބޭނެކަމަށް ބަލައި އެކަންކަން ބެލުމަށް މަޖިލީހަށް ހުށައެޅި ގަރާރު މަޖިލީހުން ބަލައިގެންފި އެވެ. 

އެ ގަރާރު މަޖިލީހަށް ހުށައަޅާފައިވަނީ މަޖިލީހުގެ ދަނގެތީ ދާއިރާގެ މެމްބަރު މުހައްމަދު ނާޒިމެވެ. 

ނާޒިމް ހުށައެޅުއްވި އެ ގަރާރުގައި ބުނެފައި ވަނީ އައިއެސްއައިއެސް އާއި އަލްގައިދާ އަށް ތާއީދުކުރާ އަދި ނިރުބަވެރިކަމަށް ފައިނޭންސް ކުރާ ކަމަށް ތުހުމަތު ކުރެވޭ 20 ދިވެއްސެއްގެ ނަމާއި އެފަރާތްތަކާއި ގުޅުން އޮންނަ 29 ވިޔަފާރިއެއް ފާހަގަކޮށްފައެވެ. އަދި އެފަރާތްތަކަށް ނިސްބަތްވާ މުދަލާއި ތަކެތި ބްލޮކްކޮށް، އެފަރާތްތަކާއެކު މުޢާމަލާތް ކުރުމަކީ އެ މުޢާމަލާތްކުރާ ފަރާތްތަކާމެދު ވެސް އެމެރިކާ ސަރުކާރުން ފިޔަވަޅު އަޅާނެ ކަމެއްކަމަށް އެ ގައުމުން ކަނޑައަޅާފައިވާ ކަމަށެވެ. 

Advertisement

އެ ކަމުގެ ސަބަބުން ދިވެހީންނާއި ރާއްޖެއަށް ނޭދެވޭ އަސަރުތަކެއް ކުރާނެކަން ބަޔާންކޮށްފައިވާ އެ ގަރާރުގައި ބުނެފައިވަނީ އެމެރިކާގެ އެ ފިޔަވަޅުގެ ސަބަބުން ރާއްޖޭގެ އިގުތިސޯދަށާއި ނަމަށް އަތުވެދާނެ ކިލަނބުކަން ބަލާ އެއިން މިންޖުވުމުގެ ފިޔަވަޅުތަކެއް ރާއްޖެއިން ވެސް އަޅަން ޖެހޭ ކަމަށެވެ. 

އެގޮތުން އެފަދަ ކަމެއްގެގެ ސަބަބުން ދިވެހި މުޖުތަމައަށް އޮތް ނުރައްކާތައް ވަޒަންކޮށް ސަރުކާރު ޒިންމާދާރު ކުރުވުމުގެ މަސައްކަތް ރައްޔިތުންގެ މަޖިލީހުގެ ގަވާއިދުގެ 167 ވަނަ މާއްދާގެ ދަށުން ކުރެއްވުމަށް ނާޒިމް ވަނީ ގޮވާލައްވާފަ އެވެ. 

ރައްޔިތުންގެ މަޖިލީހުން ހިންގެވި 6 މެއި 2021 ގެ ޙަމަލާގެ ޕާލިމެންޓަރީ އިންކުއަރީ އިންވެސް ނިރުބަވެރިކަމުގެ ބިރުވެރިކަން ރާއްޖޭގައި އޮތް މިންވަރު ވަޒަންކުރެވުމުގެ އިތުރުން އެއިންކުއަރީގެ ތެރެއިން ފާހަގަވި ކަންކަމުގެ މައްޗަށް ސަރުކާރަށް ރިކޮމެންޑޭޝަންތަކެއް ދީފައިވީ ނަމަވެސް އެ ރިކޮމެންޑޭޝަންތަކަށް ޢަމަލު ކުރެވިފައިވާ މިންވަރާބެހޭ މައުލޫމާތު ސަރުކާރުން ހާމަކޮށްކޮށްފައި ނުވާކަމަށް ނާޒިމްގެ ގަރާރުގައި ވިދާޅުވެފައި ވެއެވެ. 

އޭގެ އިތުރުން ނާޒިމް ވިދާޅުވީ އެމެރިކާގެ އެ ނިންމެވުމާއެކު ރާއްޖޭގެ ރީތި ނަމަށް ބުރުއެރުމުގެ އިތުުރުން އިގްތިސާދަށް ވެސް ނުރަނގަޅު އަސަރުތަކެއް ކުރާނެކަމަށް ބެލެވޭތީ ޓެރަރިޒަމްގެ ނުރައްކަލާއި ބިރުވެރިކަން އޮތް މިންވަރު ދިރާސާކުރުމަށްފަހު އޭގެ އަސަރު ވީހާވެސް ކުޑަވާނެ ގޮތަށް ސަރުކާރުން އަވަސް ފިޔަވަޅުތަކެއް އެޅުމަށް ގޮވާލައްވާ ކަމަށެވެ. 

މި ގަރާރު ވަނީ މަޖިލީހަށް ބަލައިގެންފަ އެވެ. 

މަޖިލީހުގެ ތަޅުމުގައި އެ ވަގުތު ހާޒިރުވެ ތިއްބެވި 37 މެންބަރުންގެ ތެރެއިން ގަރާރު ބަލައިގަތުމަށް ފެންނަ ކަމަށް ވޯޓު ދެއްވީ 22 މެންބަރުންނެވެ. އެހެންކަމުން އެ ގަރާރު ބަލައިގަތުމަށް މަޖިލީހުގެ މިއަދުގެ ޖަލްސާއިން ވަނީ ފާސްކޮށްފަ އެވެ.