މާލެ ސިޓީގެ މޭޔަރަކު ހޮވުމަށް ބައްވާ އިންތިޚާބުގައި ޕީއެންސީގެ ފަރާތުން ވާދަކުރައްވާނެ ބޭފުޅުން ފޯމު ލުމަށް ހުޅުވާލި ފުރުސަތުގައި ފޯމު ހުށައަޅުއްވާފައިވަނީ ކުރީގެ ބަންޑާރަ ނައިބު އާޒިމާ ޝުކޫރު އެކަނިކަމަށް އެ ޕާޓީން ބުނެފި އެވެ. 

މާލޭ ސިޓީގެ މޭޔަރުކަމަށް ޕީއެންސީގެ ފަރާތުން ވާދަކުރުމަށް ހުޅުވާލި ފުރުސަތުގައި އާޒިމާ ވަނީ ރޭގެ ވަގުތެއްގައި އޭނާގެ ފޯމު ހުށައަޅާފަ އެވެ. 

އެ ފުރުސަތުގައި ފޯމު ހުށައަޅާފައިވަނީ ވެސް އެކަމަނާ އެކަނިކަމުން ޕީއެންސީގެ ޓިކެޓު އާޒިމާއަށް ވަނީ ކަށަވަރުވެފަ އެވެ. 

Advertisement

ޕީއެންސީގެ ފަރާތުން މާލެ ސިޓީގެ މޭޔަރުކަމަށް ކުރިމަތިލެއްވުމަށް ފޯމު ހުށައެޅުއްވުމަށް ފަހު ނޫސްވެރިންނަށް ދެއްވި ބަސްދީގަތުމެއްގައި އާޒިމާ ވިދާޅުވީ މީ ސަރުކާރާއި ގުޅިގެން މަސައްކަތް ކުރާނެ މޭޔަރަކު މާލެ ސިޓީ ކައުންސިލަށް ހޮވަންވީ ފަހަރު ކަމަށެވެ. 

މާލެ ސިޓީއަށް ދިމާވެފައިވާ މައްސަލަތައް ވަރަށް ރަނގަޅަށް އެނގިވަޑައިގަންނަވާ ކަމަށާއި، މާލެ ސިޓީގެ މޭޔަރުކަމަށް އެކަމަނާ ކުރިމަތިލައްވަނީ، ސަރުކާރާއި ގުޅިގެން އެ މައްސަލަތއް ޙައްލުކޮށްދެއްވުމަށް ކަމަށް އާޒިމާ ވިދާޅުވި އެވެ. 

އޭގެ އިތުރުން އާޒިމާ ވިދާޅުވީ މާލެ ސިޓީއަކީ މާލޭގެ ރަށްވެހިންގެ އެކަނި ސިޓީއެއް ނޫން ކަމަށެވެ. މާލެ ސިޓީއަކީ ވިޔަފާރި ކުރުމާއި ބޭސްފަރުވާއާއި އެހެނިހެން ޒަރޫރީ ބޭނުންތަކަށް ރާއްޖޭގެ އެކި ކަންކޮޅުތަކުން މީހުން އަންނަ ތަނަކަށް ވާއިރު، މާލެއަކީ ހުރިހާ އެންމެނަށް ހިތްފަސޭހަ ތަނަކަށް ހެދުމަށްޓަކައި، މާލެއަކީ ރައްކާތެރިކަން ކަށަވަރު ތަނަކަށް ހަދަން ޖެހޭކަމަށް އާޒިމާ ވިދާޅުވި އެވެ. 

މާލެ ސިޓީގެ މޭޔަރުކަމަށް މިހާތަނަށް 4 ބޭފުޅުން ވާދަކުރަން ނިންމާފައިވާކަން ވަނީ އިއުލާނު ކުރައްވާފަ އެވެ.

އޭގެ ތެރޭގައި ހިމެނިވަޑައިގަންނަވަނީ ޑިމޮކްރެޓްސްގެ ފަރާތުން ސައިފްއާއި، އެމްޑީޕީން އާޒިމްގެ އިތުރުން ކުރީގެ ކަމިޝަނާ އޮފް ޕޮލިސް ހުސެއިން ވަހީދެވެ. 

އެހެންކަމުން، މާލެ ސިޓީގެ މޭޔަރަކު ހޮވުމަށް ބާއްވާ އިންތިޚާބަކީ ވަރަށް ވާދަވެރި އިންތިޚާބަކަށް ވެގެންދާނެ ކަމަށް ސިޔާސީ މަޝްރަހު ދިރާސާ ކުރައްވާ ފަރާތްތަކުން ދަނީ ވިދާޅުވަމުން ނެވެ.