ކުރީގެ ރައީސް އަދި ރައްޔިތުންގެ މަޖިލީހުގެ ކުރީގެ ރައީސް މުހަންމަދު ނަޝީދާއި، މަޖިލީހުގެ ކުރީގެ ނައިބު ރައީސް އީވާ އަބްދުالله އަކީ، އެއްވެސް އިރެއްގައި މަގާމުގެ ބޭނުމުގައި މަސައްކަތްކުރެއްވި ދެބޭފުޅުން ނޫންކަމަށް ދަ ޑިމޮކްރެޓްސްގެ ރައީސް އަދި ހެންވޭރު ހުޅަނގު ދާއިރާގެ މެންބަރު ހަސަން ލަތީފް ވިދާޅުވެއްޖެއެވެ.
ޕީއެސްއެމްއަށް މައުލޫމާތު ދެއްވަމުން ހަސަން ލަތީފް ވިދާޅުވީ، ނަޝީދު އާއި އީވާއާއި ދެބޭފުޅުންނަށް ރައްޔިތުންގެ ތާއީދު ލިބިވަޑައިގެންފައިވަނީ ތިއްބެވި މަގާމުގެ ސަބަބުން ނޫންކަމަށެވެ. އެދެބޭފުޅު ރައްޔިތުންގެ ތާއީދު ހޯއްދަވާފައިވަނީ ކުރައްވާފައިވާ މަސައްކަތްތަކުން ކަމަށް ހަސަން ލަތީފް ވިދާޅުވިއެވެ.
އެއްވެސް މަގާމެއްގައި ނުހުންނެވި ނަމަވެސް، މިއަދުވެސް ނަޝީދު ކުރައްވަމުންގެންދަވާ މަސައްކަތްތަކަށް ހުއްޓުމެއްނާނަ ކަމަށާއި، އަދި ރައްޔިތުންވެސް އެމަނިކުފާނަށް ކުރަމުންގެންދާ ތާއީދަށް އެއްވެސް ބަދަލެއް އައިސްފަ ނުވާކަމަށް ހަސަން ލަތީފް ވިދާޅުވި އެވެ.
ޑިމޮކްރެޓްސްއަށް ހަގީގަތުގަ އެހާ މުހިންމު ކަމެއްނޫން ކޮންމެހެން މަޖިލީހުގެ ރައީސްގެ ގޮތުގަ ރައީސް ނަޝީދު ހުންނެވުމަކީއެއް، ހަމަ އެގޮތަށް އީވާވެސް ނައިބު ރައީސްގެ ގޮތުގަ ހުންނެވުމަކީއެއް، މުހިންމެއް ނޫނޭ މި ދަންނަވަނީ އެއީ އެއް ނޫން އެންމެ މުހިންމު ކަމަކީއެއް، އެންމެ މުހިންމު ކަމަކީ ކޮންމެ ގޮތެއް ހަދާފަ އެ ރިޔާސަތުގެ ގޮނޑީގަ އިންނެވުމެއްނޫން،"
ހަސަން ލަތީފް
ހަސަން ލަތީފު ވިދާޅުވީ، ކޮންމެހެން ރިޔާސަތުގެ ގޮނޑީގައި އިނުމަކީ މުހިންމުކަމެއް ނޫންނަކަށާއި، މުހިންމީ މަޖިލީހުގައި ކުރާ މަސައްކަތްތައް ގާނޫނާއި އެއްގޮތްވާ ގޮތުގެ މަތިން ހިންގުންކަމަށެވެ.
ކުރީގެ ރައީސް އިބްރާހީމް ސޯލިހް އަށް އިޝާރާތްކުރައްވާ ހަސަން ލަތީފް ވިދާޅުވީ، ބައެއް ބޭފުޅުންނަކީ އެބޭފުޅުންގެ މަގާމުގެ ހައިސިއްޔަތުގެ ސަބަބުން ތާއީދު ލިބިވަޑައިގެން ތިއްބެވި ބޭފުޅުންކަމެވެ. ކުރީގެ ރައީސް ސޯލިހް އަކީ ކުރިންވެސް އަދި މިހާރުވެސް ރައްޔިތުގެންގެ ތާއީދު ލިބިގެންވާ ބޭފުޅެއްކަމަށް ގަބޫލު ކުރައްވަން ދަތިކަމަށްވެސް އޭނާ ވިދާޅުވިއެވެ.
ރައީސް ސޯލިހް ރައީސުލްޖުމްހޫރިއްޔާ ކަމަށް ވަޑައިގަތުމުގެ ކުރިން އެއީ ބޭފުޅުންގެ ތާއީދެއް އޮތް ބޭފުޅެއް ނޫން، ދެން ފަހުންވެސް ތާއީދެއް އޮތްކަމަކަށް އަޅުގަނޑަކަށް މިހާރަކު ދަންނަވާކަށް ނުކެރޭނެ
ހަސަން ލަތީފް
ހަސަން ލަތީފް ކުރީގެ ރައީސް ސޯލިހް އަށް މިމޭރުމުން ފާޑުވިދާޅުވެފައިވާއިރު، ކުރިން މަސަކަތްކުރައްވަމުން އައި ޕާޓީ އެމްޑީޕީގެ ތެރޭގައި ހަމަނުޖެހުން ބޮޑުވެ، އެބޭފުޅާގެ އިތުރުން އެމްޑީޕީއަށް ނިސްބަތްވާ ގިނަ މެންބަރުންތަކެއް ވަނީ ޕާޓީދޫކޮށްލައްވާފައެވެ.
Advertisement
This content is created and paid for by advertisers and does not involve Voice Journalists
