ކުރީގެ ރައީސް އިބްރާހީމް މުހައްމަދު ޞާލިހްގެ ވެރިކަން ނިންމަވާލައްވާފައިވަނީ މުޅި ދިވެހި ގައުމު ނުރައްކާތެރި ހާލަތަކަށް ވައްޓާލާފައިކަމަށް، ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެންބަރު އިމްތިއާޒް ފަހުމީ ވިދާޅުވެއްޖެއެވެ.
މިއަދު ކުރިއަށްދިޔަ ރައްޔިތުންގެ މަޖިލީހުގެ 3ވަނަ ދައުރުގެ 32ވަނަ ޖަލްސާގައި ވާހަކަ ދައްކަވަމުން އިމްތިއާޒް ފަހުމީ ވިދާޅުވީ، ނިމިގެންދިޔަ ރައީސް ސޯލިހް ގެ ސަރުކާރުން ގައުމާއި ދޭތެރޭ ކަންތައް ކުރައްވާފައިވާ ގޮތް މިހާރު ވަރަށް ސާފުކޮށް ފެންނަ އެބައޮތްކަމަށެވެ. އިމްތިއާޒް ވިދާޅުވީ، އެސަރުކާރުން ވަނީ މިގައުމު ވަރަށްވެސް ނުރައްކާ ހާލަތަކަށް ވައްޓާލާފަކަމަށެވެ.
ޕީސީބީގެ މިއަހަރުގެ ފުރަތަމަ ކުއާޓާގެ ރިޕޯޓުގައި ބުނެފައިވާ ގޮތުން، ޕީޕީއެމް ސަރުކާރު ނިމިގެންދިޔަ އިރު، ސަރުކާރުގެ ކުންފުނިތަކުގެ މުއައްޒަފުންގެ ޖުމްލަ އަދަދަކީ އަށާރަ ހާސް ހަ ސަތޭކަ ހަތްދިހަ ހައެއް ކަމަށާއި، އެހެންނަމަވެސް އެމްޑީޕީގެ ސަރުކާރު ނިމިގެންދިޔަ އިރު، ޖުމްލަ ބައްތިރީސް ހާސް ފައްސަތޭކަ ހަތްދިހަ ހަ ވަޒީފާ ހަމަ އެކަނި ސިޔާސީ މަގާމުގައި ވާކަމަށްވެސް އޭނާ ވިދާޅުވިއެވެ.
އިމްތިއާޒް ވިދާޅުވީ، އެސަރުކާރުގައި ހަމަ އެކަނި ފެނަކަ ކޯޕަރޭޝަނުގައިވެސް ހަތް ހާސް ވަޒީފާ އުފައްވާފައިވާކަމަށާއި، އެކަންތައްތައް އެގޮތަށް ކުރައްވާފައިވަނީ ސިޔާސީ މަންފާ ހާސިލްކުރުމަށް ކަމަށެވެ.
ބެލުމެއްނެތް، ރާއްޖޭގެ މާލީ ހާލަތަކަށް ބެލުމެއްނެތް، ދަރުވާލާފަ، ކޮންފަދަ ނުރައްކާ ހާލަތަކަށް މިގައުމު ވައްޓާލާފަ އެ ވަޑައިގަތީ
އިމްތިޔާޒް
ފެނަކަ ކޯޕަރޭޝަނުން މުވައްޒަފުން ވަކިކުރަމުން ގެންދާ ކަމަށް ބުނެ މަޖިލީހަށް ހުށަހެޅި ކުއްލި މައްސަލައާއި ގުޅިގެން އިތުރަށް ވާހަކަ ދައްކަވަމުން އިމްތިއާޒް ވިދާޅުވީ، ރައީސް ސޯލިހު ގެންދެވީ ސިޔާސީ ބޭނުމެއް ހާސިލުކުރުމަށް، އެކިއެކި ފަރާތްތަކަށް ވަގުތީ ވަޒީފާ ހަމަޖައްސާ، އާއިލާތައް ގަންނަމުންކަމަށެވެ.
އާއިލާތައް ގަނެލުމަށްޓަކާ ކުދިކުދި ފަޅުރަށަކަށްވިޔަސް ވަޒީފާ ހަމަ ޖައްސަމުންދަނީ، ވަގުތީ ވަޒީފާ، ވަގުތީ ވަޒީފާ ދީފަ ބިރުދައްކާލާފަ މީހުން ހިފަހައްޓާފަ، ވޯޓަށް ބިރުދައްކަމުން ދިޔަ ވާހަކަ އަޅުގަނޑުމެން މިދިޔަ ކެމްޕޭނުގަ މެދުކެނޑުމެއްނެތި ކޮންމެ ތަގުރީރެއްގަ ކޮންމެ ސްޕީޗެއްގަ އެކަން ފާހަގަކުރަމުން ދިޔަ
އިމްތިއާޒް
އިމްތިޔާޒް ވިދާޅުވީ، ނިމިގެން އެ ދިޔަވީ ވަރަށްވެސް ބޭއިންސާފު ސަރުކާރެއްކަމަށާއި، އެސަރުކާރުންވަނީ މުޅި ގައުމު ހަލާކުކޮށްލާފަކަމަށެވެ.
Advertisement
This content is created and paid for by advertisers and does not involve Voice Journalists
