ރައްޔިތުންގެ މަޖިލީހުގައި ހިނގަމުން މިދާ ދައުރުގެ ޖަލްސާތައް މިމަހުގެ 18 ވަނަ ދުވަހުގެ ނިޔަލަށް ދިގު ދަންމާލުމަށް މަޖިލީހުގެ ރިޔާސަތުން ހުށަހަޅުއްވައިފި އެވެ.

މިއަދު ކުރިއަށްދިޔަ ރައްޔިތުންގެ މަޖިލީހުގެ 3 ވަނަ ދައުރުގެ 33ވަނަ ޖަލްސާ ފައްޓަވަމުން މަޖިލީހުގެ ރައީސް މުހަންމަދު އަސްލަމް ވިދާޅުވީ، މަޖިލީހުގެ މިދައުރުވެސް ނިމުމަކަށް އައިސްފަވާއިރު، މިދައުރުގައި ނިންމަންޖެހޭ ގިނަމަސައްކަތްތަކެއް އަދިވެސް ނިމިފައި ނުވާކަމަށެވެ. އެގޮތުން އަންނަ އަހަރަށް ލަފާކުރާ ދައުލަތުގެ ބަޖެޓުވެސްމީގައި ހިމެނޭކަމަށް އަސްލަމް ވިދާޅުވިއެވެ.

އަސްލަމް ވިދާޅުވީ، މަޖިލީހުގެ ގަވާއިދުގައި ބަޔާންކޮށްފައިވާ ގޮތުގެ މަތިން ބަޖެޓުގެ ދިރާސާކުރާ ކޮމެޓީގެ މަސައްކަތް ނިންމާ، މިދައުރު ނިމުމުގެ ހަތް ދުވަސް ކުރިން ބަޖެޓާމެދު ގޮތެއް ނިންމަން ހުށަހަޅަންވާނެ ކަމަށާއި، އެހެންކަމުން މި ދައުރު ދިގުދަންމާލުމަށް ގަސްތުކުރައްވާ ކަމަށް އޭނާ ވިދާޅުވި އެވެ.

އެހެންކަމުން މަޖިލީހުގެމި ހިނގާ ތިންވަނަ ދައުރު 18 ޑިސެމްބަރު 2023 ގެ ނިޔަލަށް އިތުރުކުރުމާ މެދު ވޯޓަށް އެހުން އޮންނާނެ ކަމަށް އަސްލަމް ވިދާޅުވިއެވެ.

މަޖިލީހުގައި ބަޖެޓުގެ މަސައްކަތް ހިމެނޭހެން މުހިއްމު ގިނަ މައްސަލަތަކެއް ހުރިކަން ފާހަގަކޮށް މިދިޔަ މަހުގެ 27 ގައި ވަނީ މި ދައުރު މާދަމާގެ ނިޔަލަށް ދަންމައިލަން ފާސްކޮށްފައެވެ.