ގެދޮރުވެރިޔާ ސްކީމްގެ ދަށުން ދޫކުރާ ފުރަތަމަ 4،000 ފްލެޓް ލިބޭ މީހުންގެ ލިސްޓާއި މެދު ހިތްހަމަ ނުޖެހި އެ މައްސަލާގައި ހައުސިން މިނިސްޓްރީ އަށް ވަދެ އަޑުގަދަކުރީ 10 މީހުން ކަމަށާއި ފްލެޓް ދިނުމުގެ ކަންކަން އެންޓި ކޮރަޕްޝަން ކޮމިޝަން (އޭސީސީ) އަށް ހުއްޓުވޭނެ ކަމަށް ގަބޫލު ނުކުރައްވާ ކަމުގައި މި ފާއިތުވި ސަރުކާރުގެ ފްލެޓް ކޮމިޓީގެ ޗެއާމަންކަން ކުރެއްވި އަކްރަމް ކަމާލުއްދީން ވިދާޅުވެއްޖެއެވެ. 

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ތަޢާރަފްުރި ގެދޮރުވެރިޔާ ސްކީމުގެ ދަށުން ދޫކުރާ ފްލެޓްތައް ލިބޭނެ ކަމަށް އިއުލާނުކޮށްފައިވާ ލިސްޓުގެ މައްސަލާގައި ރައްޔިތުންގެ މަޖިލީހުގެ ޕެޓިޝަން ކޮމިޓީ އަށް ހުށަހަޅާފައިވާ ޕެޓިޝަނާ ގުޅިގެން މިއަދު ބޭއްވި ބައްދަލުވުމަށް  ހާޒުރު ކުރުމުން އެ ބައްދަލުވުމުގައި ވާހަކަ ދައްކަވަމުން އަކްރަމް ވިދާޅުވީ، ސަރުކާރުން ދޭން ނިންމި ފުރަތަމަ 4،000 ފްލެޓް ނުލިބިގެން މިނިސްޓްރީ އަށް ގޮސް އަޑުގަދަ ކުރީ ވަރަށް މަދު ބައެއް ކަމަށާއި އެއީ 10 ވަރަކަށް މީހުން ކަމަށެވެ. ދެން އެ ތަނުގައި ތިބީ މީޑިއާތައް ކަމަށް ވެސް އަކްރަމް ވަނީ ވިދާޅުވެފައެވެ.

މިއަދު ކުރިއަށްދިޔަ ރައްޔިތުންގެ މަޖިލީހުގެ ޕެޓިޝަން ކޮމިޓީ އަށް އަކްރަމް ކަމާލުއްދީންގެ އިތުރުން ވަނީ، ކުރީގެ ސީނިއާ އެގްޒެކެޓިވް ޑިރެކްޓަރު މުހައްމަދު އާރިފްވެސް ހާޒިރުކޮށްފައެވެ. 

އެގޮތުން މިނިސްޓްރީއަށް ވަދެ ނުރުހުން ފާޅުކުރުމުން ކުރީގެ ރައީސް އިބްރާހިމް މުހައްމަދު ސޯލިހު ނިންމެވީ ފުރަތަމަ 4،000 ފްލެޓް ލިބޭ މީހުންގެ ލިސްޓަށް ޝަކުވާ ހުށަހެޅުމުގެ ފުރުސަތު ހުޅުވާލުމަށް ކަމުގައި ވިދާޅުވެ އަކްރަމް ވަނީ، އޭސީސީން ވެސް އެގޮތަށް އެންގި ކަމަށާއި އެހެންވެ، ފްލެޓްތަކުގެ ގުރުއަތުލުން ބޭއްވީ އޭގެ ފަހުން ލިބުނު ޝަކުވާތަކަށް ޖަވާބު ދިނުމަށް ފަހުގައި ކަމަށްވެސް ވިދާޅުވެފައެވެ. 

ޝަކުވާ ގޮތުގައި 7،000 މައްސަލަ ލިބުނު އިރު، ގިނައިން ހުށަހަޅާފައި ހުރީ މާލޭގައި ދިރިއުޅުނު މުއްދަތާ ގުޅޭ ޝަކުވާތައް ކަން އަކްރަމް ވަނީ ފާހަގަކޮށްފައެވެ. މާލޭގައި ދިރިއުޅޭ މުއްދަތަކީ ހަމައެކަނި ފްލެޓަށް ޝަރުތު ހަމަވާ ކަމަށް ބަލާ އެއްޗެއް ކަމަށާއި މީހާ މާލޭގައި ދިރިއުޅުނު މުއްދަތަށް ޕޮއިންޓް ނުދޭ ކަމަށް އޭނާ ވިދާޅުވިއެވެ.

އަކްރަމް ވިދާޅުވީ އޭސީސީން 4،000 ފްލެޓުގެ މައްސަލަ ހުއްޓުވީ ފްލެޓްތަކުގެ ގުރުއަތު ނަގައި ވެސް ނިންމި ފަހުން ކަމަށެވެ.