ހިޔާ އަދި ވިނަރެސް ފްލެޓުތަކުގެ ކުލި ކުޑަކޮށްދީގެން އާބަންކޯއަށް މާލީގޮތުން އެއްވެސް ގެއްލުމެއް ލިބިގެން ނުދާނެކަމަށް އެ ކުންފުނީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ވިދާޅުވެއްޖެ އެވެ. 

ފަޒުލް މިފަދައިން ވިދާޅުވެފައި ވަނީ ހިޔާ ފްލެޓުތަކާއި ވިނަރެސް ފްލެޓުތަކުގެ ކުލި ކުޑަކުރުމާއި ގުޅޭގޮތުން އާބަންކޯއިން ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަށް ޖަވާބުދެއްވަމުން ނެވެ. 

އިއްޔެ ބޭއްވެވި ނޫސްވެރިންގެ ބައްދަލުވުމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ހިޔާ ފްލެޓްތައް މަރާމާތު ކުރުމަށް ރައްޔިތުންގެ އަތުން ދިޔަ ޚަރަދުތަކަށްވާ ދެލައްކަ ރުފިޔާގެ ފައިސާ 7 އަހަރަށް ބަހާލައިގެން ކުލިން ކުޑަ ކުރާ ގޮތަށް ނިންމަވާފައިވާކަން އިއުލާނުކުރައްވާފަ އެވެ.

ސަރުކާރުގެ އެ ނިންމުމާއި އެއްގޮތަށް ކުލި ކުޑަކޮށް ހިޔާ ފްލެޓްތަކުގެ ކުލީގެ ތެރެއިން ލައްކައެއްހާ ރުފިޔާ މާފުކޮށްދީފައިވާކަމަށް އާބަންކޯގެ މެނޭޖިން ޑިރެކްޓަރު ފަޒުލް ވަނީ ހާމަކުރައްވާފަ އެވެ. އަދި އެ ނިންމުމާއެކު ކުލި ދެއްކުމަށް އޮތް މުއްދަތު 27 އަހަރުން 26 އަހަރަށް ކުޑަވެގެންދާނެކަމަށް ވެސް އޭނާ ވިދާޅުވި އެވެ.

ނިމިދިޔަ ސަރުކާރުން ހިޔާ ފްލެޓުތަކުގެ ކުލި އޭރު ކުރީ ސަރުކާރުން ކަނޑައަޅާފައިވާ އަގަށްވުރެ ބޮޑުކުރުމަށް ނިންމާ، ފިނިޝިން މަސައްކަތްތައް ވެސް ސަރުކާރުގެ ޚަރަދުގައި ނުކުރެވޭނެ ކަމަށް ބުނީ، އޭގެ ސަބަބުން ސަރުކާރަށް މާލީގޮތުން ބޮޑު ބުރައެއް އުފުލަން ޖެހޭނެތީކަމަށް އޭރުގެ ރައީސް އިބްރާހިމް މުހައްމަދު ޞާލިހު ވިދާޅުވެފައި ވެއެވެ. 

އެމަނިކުފާނު އެފަދައިން ވިދާޅުވެފައި ވަނިކޮށް ހިޔާ ފްލެޓުގެ ކުލި 3900 އަށް ކުޑަކޮށް ވިނަރެސް ފްލެޓުތަކުގެ ޑައުން ޕޭމަންޓުވެސް 50 އިންސައްތައަށް ކުޑަކުރަން ސަރުކާރުން ނިންމާފައިވާއިރު، މީގެ ސަބަބުން އާބަންކޯއަށް މާލީ ގޮތުން ގެއްލުމެއް ލިބިދާނެ ތޯ؟ ނުވަތަ މި ނިންމުމަކީ އެ ކުންފުނިން މާލީ ބުރައެއް އުފުލަން ޖެހިދާނެ ކަމެއް ތޯ ނޫސްވެރިއަކު ވަނީ ފަޒުލްއާއި ސުވާލު ކުރައްވާފަ އެވެ. 

އެ ސުވާލަށް ޖަވާބުދެއްވަމުން ފަޒުލް ވިދާޅުވީ ކުލި ކުޑަކުރުމަށް ސަރުކާރުން ނިންމި ނިންމުމުގެ ސަބަބުން އާބަންކޯއަށް މާލީ ގޮތުން އެއްވެސް ގެއްލުމެއް ލިބިގެން ނުދާނެ ކަމަށެވެ. 

ފަޒުލް ވިދާޅުވީ ރައްޔިތުންނަށް ދިމާވެފައިވާ މައްސަލަތައް ޙައްލުކުރުމުގައި އާބަންކޯއިން ސަރުކާރާއި ގުޅިގެން އަޅަން ޖެހޭ ފިޔަވަޅުތައް އަޅުއްވާނެ ކަމަށެވެ. 

ކުންފުންޏަށް ދަތިނުވާނެހެން ކަންކަން ތަރުތީބު ކުރައްވަން އެނގިވަޑައިގަންނަވާ ކަމަށް ފަޒުލް ވިދާޅުވި އެވެ. އަދި އެއާއެކު އޭނާ ވިދާޅުވީ ރައީސުލްޖުމްހޫރިއްޔާ ޑރ މުއިއްޒުގެ ސަރުކާރުން ވައުދުވެލެއްވި ގޮތަށް، ބޯހިޔާވަހިކަމުގެ މައްސަލަތައް ޙައްލުކޮށްދެއްވާނެ ކަމަށެވެ.