ދަ ޑިމޮކްރެޓްސް އިން ބޭއްވި އެޕާޓީގެ އެތެރޭގެ އިންތިހާބުގެ ބައެއް ވޯޓު ފޮށި ތަކަށް ވޯޓުލީ މީހުންގެ އަދަދު، ދާއިރާތަކަށް ކުރިމަތިލާފައިވާ މެމްބަރުންގެ އަދަދަށް ވުރެ އިތުރުވެފައިވާތީ، އެ ފޮށިތަކުގައިވާ ވޯޓުތައް ބާތިލްކޮށްފައިވާކަމަށް އެޕާޓީން ބުނެފިއެވެ.

ދަ ޑިމޮކްރެޓްސްއިން ބޭއްވި އެޕާޓީގެ އެންމެ ފުރަތަމަ އެތެރޭގެ އިންތިޚާބުގެ ދާއިމީ ނަތީޖާ އިއުލާނުކުރުމަށް މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން މެދު ހެންވޭރު ދާއިރާގެ މެންބަރު އަލީ އާޒިމް ވިދާޅުވީ، ޕާޓީގެ ޔަންގް ޑިމޮކްރެޓްސް ލީޑަރު ހޮވަން ވޯޓުލީ ފޮށިތަކުގެ ނަތީޖާ ބާތިލުކުރަށް ނިންމާފައިވާ ކަމަށެވެ.

އެގޮތަށް ނިންމަން ޖެހުނީ ޕާޓީގެ ފަރާތުން ހެދިފައިވާ ގޯހަކުންކަން ފާހަގަ ކުރައްވާ އާޒިމް ވިދާޅުވީ، ބައެއް ވޯޓު ފޮށި ތަކަށް ވޯޓުލީ މީހުންގެ އަދަދު، އެ ދާއިރާތަކުގައި ތިބި މެމްބަރުންގެ އަދަދަށް ވުރެ އިތުރުވެފައިވާކަމަށެވެ.

އެގޮތުން ވޯޓު ފޮށިތަކުގެ ތެރެއިން ވޯޓު ބާތިލް ކޮށްފައިވާ ރަށްތަކުގެ ތެރޭގައި، ބ. ދަރަވަންދޫ،ފެހެންދޫ، ގޮއިދޫ، ކުޑަރިކިލު، ގދ. ގައްދޫ، ހއ. ހޯރަފުށި، ހދ. ނޭކުރަންދޫ، ރ. އަލިފުށި، ށ. މާއުނގޫދޫ، ތ. ކިނބިދޫ، ހދ.ނޮޅިވަރަމް، ނ.މިލަދޫގެ އިތުރުން ބ.މާޅޮސް ހިމެނޭކަމަށް އާޒިމް މައުލޫމާތު ދެއްވިއެވެ.

ޕާޓީގެ ދާއިމީ ނަތީޖާ ދައްކާގޮތުން، ވަގުތީ ނަތީޖާއެކޭވެސް އެއްގޮތަށް ޕާޓީގެ ރައީސް ކަމަށް ހޮވިފައި ވަނީ ހެންވޭރު ހުޅަނގު ދާއިރާގެ މެންބަރު ޙަސަން ލަތީފު އެވެ. އޭނާ އަށް ލިބިވަޑައިގަނެފަވަނީ ޖުމުލަ 1807 ވޯޓެވެ.

ހިނގަމުން މިދާ ޑިސެމްބަރު މަހުގެ 2ވަނަ ދުވަހުގެ ހެނދުނު 10:00 އިން ހަވީރު 04:00 އަށް އެޕާޓީގެ ފުރަތަމަ އިންތިޚާބުގެ ވޯޓުލުން ވަނީ ކުރިއަށް ގެންގޮސްފައެވެ. މި އިންތިހާބުގެ ނަތީޖާ އިއުލާނު ނުކޮށްލަސްވެގެން ގޮސްފައިވުމުން އެޕާޓީގެ ގިނަ މެންބަރުންތަކެއް ވަނީ ކަންބޮޑުވުން ފާޅުކޮށް ފާޑުކިޔާފައެވެ.