މާލެ މުނިސިޕަލްޓީގެ ކުރީގެ ޑިރެކްޓަރ ޖެނެރަލްގެ މަގާމުގައި ހުންނެވި އަބްދުލް ހަމީދު ޢަލީ، މާލެ ސިޓީ މޭޔަރ ކަމަށް ޕީއެންސީގެ ޓިކެޓްގައި ވާދަކުރައްވާ ޢާއިޝަތު ޢާޒިމާ ޝަކޫރަށް ތާއީދު ކުރައްވައިފި އެވެ.
ޢާޒިމާއަށް ތާއީދު ކުރައްވާ އަބްދުލް ހަމީދު މީސްމީޑިއާގައި އާއްމު ކުރެއްވި ވީޑިއޯ އެއްގައި ވިދާޅުވީ، އެބޭފުޅާ އަކީ ޢާޒިމާ އާއި އެކު ގިނަ އަހަރު ތަކެއް ވަންދެން މަސައްކަތް ކުރެއްވި ބޭފުޅެއް ކަމަށެވެ.
އަދި އެ ދުވަސްވަރު އެ ބޭފުޅާ ހުންނެވީ މާލޭ މުނިސިޕަލްޓީގެ ޑިރެކްޓަރ ޖެނެރަލްގެ މަގާމުގައި ކަމަށާ، ޢާޒިމާ ހުންނެވީ މާފަންނު އަވަށު އޮފީހުގެ ޑެޕިއުޓީ އަވަށުވެރިޔާ ކަމަށް ވާއިރު، ޢާޒިމާ ކުރައްވަމުން ދިޔައީ މުނިސިޕަލް ކަންކަމަށް ޚާއްސަ މަސައްކަތްތައް ކަންވެސް ފާހަގަކުރެއްވި އެވެ.
އާޒިމާ އަކީ މާލޭގެ މިއޮތް ހަލަބޮލި މާހައުލު ރަނގަޅަށް ދަންނަ، އެނގޭ، އެ ތަޖުރިބާ ހުރި، އެ ފަންނުގައި އެކަން ކުރެވިދާނެ ބޭފުޅެއްކަން އަޅުގަނޑަށް ޔަގީން ވާތީ، ޢާޒިމާ އަކީ މާލޭ މެޔަރ ކަމަށް އެންމެ އެކަށީގެންވާ ބޭފުޅާ ކަމަށް ގަބޫލު ކުރަން.
މާލެ މުނިސިޕަލްޓީގެ ކުރީގެ ޑިރެކްޓަރ ޖެނެރަލް އަބްދުލް ހަމީދު ޢަލީ
ޢަބްދުލް ހަމީދުގެ ތާއީދު ޢާޒިމާ އަށް އޮތް ކަން ހާމަ ކުރެއްވުމާއެކު ޢާޒިމާ ވަނީ އެކަން ވަރަށް ބޮޑަށް ބަލައިގަންނަވާ ކަމަށާ، އަދި އެކަމަށްޓަކައި ޝުކުރު އަދާކުރައްވާ ކަމަށް ވިދާޅުވެފައެވެ.
އަބްދުލް ހަމީދުގެ އިތުރުން، ސްޕްރީމްކޯޓްގެ ކުރީގެ ފަނޑިޔާރު އަބްދުالله ދީދީ ވެސް ވަނީ ޢާޒިމާ އަށް ތާއީދު ކުރައްވާ ޢާޒިމާގެ ކެންޕެއިންގައި ވެސް ޢަމަލީ ގޮތުން ބައިވެރިވެ ވަޑައިގެންފައެވެ.
Advertisement
This content is created and paid for by advertisers and does not involve Voice Journalists
