އިޒްރާއިލުން ފަލަސްޠީނުގެ ހުޅަނގުއައްސޭރީގައި ހިންގާ މިލިޓަރީ ރެއިޑްތައް މެދުކެނޑުމެއް ނެތި އިޒްރާއިލުން ދަނީ ކުރިއަށް ގެންދަމުންނެވެ.

އެގޮތުން ރޭ އިޒްރާއިލުން ހުޅަނގުއައްސޭރީގައި ކުރިއަށް ގެންދިިޔަ ރެއިޑްތަކުގައިވެސް 21 މީހަކު ހައްޔަރުކޮށްގެން ގެންގޮސްފައިވާ ކަމަށް ފަލަސްޠީނުގެ ޕްރިޒަނަރސް އެސޯސސިއޭޝަނާއި ހަވާލާދީ އަލްޖަޒީރާގައި ބުނެފައިވެއެވެ.

އަލްޖަޒީރާގައި ބުނެފައިވަނީ ރޭ ހުޅަނގުއައްސޭރީގެ ޙަލީލްގެ ބައިތްއުއްމާރުގައި ހަލާކުވެެގެން ދޫކޮށްލައިފައިހުރި ބާ ކާރުތަކެއް ބަލައި ފާސްކޮށްފައިވާ ކަމަށެވެ. އިޒްރާއިލް ސިފައިން ލަފާކޮށްފައިވަނީ އެކާރުތައް ބޭނުންކޮށްގެން އެމީހުނަށް ހަމަލާދީފާނެ ކަމަށެވެ.

Advertisement

މީގެއިތުރުން ބައިތްލަޙަމްގައި ހިންގި މިލިޓަރީ ރެއިޑްގައި ފަސް މީހަކު ވަނީ ހައްޔަރުކޮށްފައި ކަމަށް އަލްޖަޒީރާގައި ބުނެފައިވެއެވެ.

ހަމަމިއާއި އެކު ތުލްކަރަމްގައި ބުލްޑޯޒަރުތަކާއި އެކު ހިންގި ރެއިޑްތަކުގައި ފަސް މީހަކު ހައްޔަރުކޮށް ތުލްކަރަމްގެ ނޫރްއަލްޝަމްސް އަށް ޢުމްރާނީ ގޮތުން ގެއްލުން ތަކެއް ދީފައިވާ ކަމަށް ބުނެފައިވެއެވެ.

ނާބުލްސް ގައި ހިންގި މިލިޓަރީ ރެއިޑްގައި ތިން މީހަކު ހައްޔަރު ކޮށްފައިވާއިރު، ރާމައްﷲގައި ހުންނަ ޕްރިންޓް ޝޮޕަކަށްވަދެ ބަލައި ފާސްކޮށްފައިވާ ކަމަށް އަލްޖަޒީރާގައި ބުނެފައިވެއެވެ.

އިޒްރާއިލުން އޮކްޓޫބަރު 7 ގައި ޣައްޒާއަށް ދޭން ފެށި ހަމަލާތަކާއި އެކު ހުޅަނގުއައްސޭރީގައި ހިންގާ މިލިޓަރީ ރެއިޑްތައް ވަނީ އިތުރުވެފައެވެ. އަދި ގިނަ ބަަޔަކު ޝަހީދުކޮށް އެތައް ބަޔަކު ހައްޔަރުކޮށްފައި ވެސްވެއެވެ.