ކުރީގެ ރައީސް އިބްރާހިމް މުހައްމަދު ޞާލިހު ގެ ސަރުކާރުން ދައުލަތުގެ ހަރަދަށް ޒިންމާވުމުގެ ގާނޫނަށް ދީފައިވާ އިސްތިސްނާ ނިމުމަކަށް ގެނެސް، މި ފެށޭ އަހަރުގެ ފުރަތަމަ ދުވަހުން ފެށިގެން އެ ގާނޫނަށް އަލުން އަމަލުކުރަން ފަށާ ގޮތަށް މި ސަރުކާރުން ނިންމައިފި އެވެ.
ދައުލަތުގެ ހަރަދަށް ޒިންމާ ވުމުގެ ގާނޫނުގެ 36 ވަނަ މާއްދާއިން ރައްޔިތުންގެ މަޖިލީހަށް ލިބޭ ބާރުގެ ދަށުން އެ ގާނޫނުގެ 32 ވަނަ މާއްދާގެ (ހ)، (ރ) އަދި (ބ) އަށް އަމަލު ކުރުން 2020 އަހަރުގެ އޭޕްރީލް 26 ވަނަ ދުވަހުން ފެށިގެން ވަނީ މަޑު ޖައްސާލާފައެވެ. އެ ސަސްޕެންޝަން ގެ މުއްދަތު ހަމަވުމުން އަލުން އިތުރު ކޮށްފައިވާއިރު، އެންމެ ފަހުން ސަސްޕެންޝަން އިތުރު ކުރީ މި އަހަރުގެ ޑިސެންބަރު މަހުގެ 31 އަށެވެ.
މި ސަސްޕެންޝަން އުވާ ލުމަށް އެދިލައްވައި މާލީ ވަޒީރު ޑރ. މުހައްމަދު ޝަފީގު މަޖިލީހަށް ފޮނުއްވާފައި ސިޓީ މިއަދުގެ މަޖިލީހުގެ ޖަލްސާގައި ވަނީ އިއްވާފައެވެ.
ޝަފީގުގެ ސިޓީގައި ވިދާޅިވީ، އެ ގާނޫނު ސަސްޕެންޑް ކޮށްފައިވަނީ ކޮވިޑްގެ ހާލަތާއި ގުޅިގެން ކަމަށް ވާއިރު، ކޮވިޑަށްފަހު ރާއްޖޭގެ އިގުތިސާދު މިހާރު ރަނގަޅުވެފައިވާތީ، އެ ގާނޫނު ސަސްޕެންޑުކޮށްފައި ބާއްވާނެ ހާލަތެއް މިހާރު ނެތް ކަމަށެވެ.
އެހެންކަމުން އަންނަ އަހަރުގެ ޖަނަވަރީ އެއްވަނަ ދުވަހުން ފެށިގެން އެ ސަސްޕެންޝަން އުވާލުމަށް ސިޓީގަައި ވަނީ އެދިލައްވާފައެވެ.
"އަދި 2024 ވަނަ އަހަރުގެ ބަޖެޓުގެ ފައިނޭންސިން ޕްލޭންގައި ހިމަނާފައިވާ ފަދައިން، އިސްތިސްނާގެ މުއްދަތު ހަމަވާއިރު، ޕަބްލިކް ބޭންކް އެކައުންޓު އޯވަޑްރޯވެފައިވާ މިންވަރު އެއްކޮށް ސެކިއިރަޓައިޒްކޮށް އެމްއެމްއޭއިން ސަރުކާރަށް އިޝޫކުރާ ދިގު މުއްދަތުގެ ބޮންޑަކަށް ބަދަލުކުރަން ރާވާފައިވާ ކަމަށް މައުލޫމާތަށްޓަކައި ދެންނެވީމެވެ،" ޝަފީގު ފޮނުއްވި ސިޓީގައި ވިދާޅުވެފައިވެ އެވެ.
ގާނޫނުގެ 32 ވަނަ މާއްދާގެ (ހ)، (ރ) އަދި (ބ)
އެ މާއްދާގެ (ހ) ގައި ބުނެފައިވަނީ މަރުކަޒީ ބޭންކުން ދައުލަތަށް ދަރަންޏަށް ފައިސާ ނެގޭނީ 91 ދުވަހުގެ ތެރޭގައި އެފައިސާ ދައްކާ ހަލާސްކުރާ ގޮތަށް ކަމަށެވެ. އަދި އެގޮތަށް ފައިސާ ނެގޭނީވެސް ވޭތުވެދިޔަ ތިން އަހަރުގެ ސަރުކާރުގެ އެވްރެޖް އާމްދަނީގެ އެއް ޕަސެންޓަށްވުރެ އިތުރު ނުވާ ގޮތަށް ކަމަށްވެސް އެ މާއްދާގައި ވަނީ ބުނެފަ އެވެ.
އެ މާއްދާއަށް އަމަލުކުރުން ފަސްކޮސްފި ނަމަ ވަކި މުއްދަތެއް ނެތް ގޮތަށް މަރުކަޒީ ބޭންކުން ދައުލަތަށް ދަރަންޏަށް ފައިސާ ނެގޭނެ އެވެ.
އަދި 32 ވަނަ މާއްދާގެ (ރ) ގައި ބުނެފައިވަނީ ދައުލަތުން ދަރަންޏަށް ފައިސާ ނަގަން ވާނީ ގައުމީ ތަރައްގީގެ މަޝްރޫއުތަކާއި އުފެއްދުންތެރިކަން އިތުރުކުރެވޭނެ ވަސީލަތްތައް ހޯދުމަށް އެކަނި ކަމަށެވެ. ޖެނުއަރީ1، 2016 އިން ފެށިގެން ދައުލަތުގެ ދަރަނި އަދާކުރުމަށް ދަރަންޏަށް ފައިސާ ނަގައިގެން ނުވާނެ ކަމަށް އެ މާއްދާގައި ބުނެފައިވެ އެވެ.
އެ މާއްދާގެ (ބ) ގައި ބުނެފައިވަނީ ދައުލަތުގެ ކޭޝް ފްލޯ މެނޭޖް ކުރުމުގެ ބޭނުމަށް ދައުލަތުގެ ކޭޝްފްލޯ މެނޭޖް ކުރުމުގެ ބޭނުމަށްޓަކައި ގިނަވެގެން 14 ދުވަހުގެ ތެރޭގައި އަނބުރާ ދައްކާ ގޮތަށް މަރުކަޒީ ބޭންކުން ދައުލަތަށް ފައިސާ ނެގޭނެ ކަމަށެވެ.
ގާނޫނުގައި ބުނާ ގޮތުން، އިސްތިސްނާ ކުރެވެނީ ގުދުރަތީ ނޫނީ އިގްތިސޯދީ ކާރިސާތަކުގެ ދަނޑިވަޅުތަކުގައި އެވެ.
ސަރުކާރުން މަރުކަޒީ ބޭންކް އިން 4.4 ބިލިއަން ރުފިޔާގެ އޯވްޑްރާފްޓު ކުރުމުގެ ސަބަބުން އިގްތިސޯދުގެ ގިނަ މިންގަނޑުތަކަށް ބަދަލު އައިސްފައިވެ އެވެ. އޯވަޑްރާފްޓް ކުރުމަކީ ފައިސާ ޗާޕު ކުރުން ކަމަށް ވާއިރު، މީގެ ސަބަބުން އިގްތިސޯދުގައި ފައިސާ ގިނަވެ އިންފްލޭޝަން މައްޗަށް އުފުލުން ފަދަ މައްސަލަތައް ކުރިމަތިވެ އެވެ.
އެ ސަސްޕެންޝަނާއި ގުޅިގެން ކުރީ ސަރުކާރުގައި އިދިކޮޅު ޕާޓީގެ ގޮތުގައި އޮތް، ޕީޕީއެމް/ޕީއެންސީން ވަނީ ވަރަށް ބޮޑަށް ކަންބޮޑުވުން ފާޅުކޮށްފައެވެ.
Advertisement
This content is created and paid for by advertisers and does not involve Voice Journalists
