މާލެސިޓީގެ މޭޔަރ ކަމަށް އިންތިޚާބުވެވަޑައިގެންފި ނަމަ، ގޯއްޗާއި ފުލެޓް ލިބިފައިވާ ފަރާތްތަކަށް އެ ހޯދައި ދެއްވުމަށް މަސައްކަތް ކުރައްވާނެ ކަމަށް ހުސްވެެފައިވާ މާލޭ މެޔަރ ކަމުގެ މަގާމަށް އެމްޑީޕީގެ ޓިކެޓްގައި ވާދަކުރައްވާ ކުރީގެ އެމްޓީސީސީގެ ސީއީއޯ އާދަމް ޢާޒިމް ވިދާޅުވެއްޖެއެވެ.
"ފެހި ތަނަވަސް މާލެ" ކެމްޕޭން ރަސްމީކޮށް ފެށުމުގެ ޖަލްސާގައި ވާހަކަ ދައްކަވަމުން އާޒިމް ވިދާޅުވީ، ބިންވެރިޔާ އަދި ގެދޮރުވެރިޔާ ސްކީމުން ބިމާއި ފުލެޓް ލިބުނު ފަރާތްތައް މަގުމަތިވިޔަ ނުދެއްވާނެ ކަމަށެވެ.
"އަޅުގަނޑު މާކޭ ރައްޔިތުންނަށް މި ދެއްވާ ޔަގީން ކަމަކީ ތި ބޭފުޅުންނަށް އެ ދީފައިވާ ހުރިހާ ބިންތައް އެ ދީފައި ހުރި ތާކުން ލިބޭނެގޮތް ހަމަޖެއްސުމަށް ޓަކައި އަޅުގަނޑުމެންނަށް ކުރެވެން ހުރި ހުރިހާ ކަމެއް ކުރާނަން."
އާދަމް ޢާޒިމް
އާޒިމް ވަނީ އައު ސަރުކާރުގެ އެންމެ ބިޔަ އެއް މަޝްރޫޢު ކަމަށްވާ ފުށިދިއްގަރުފަޅު މަޝްރޫޢުއަށް ފާޑު ވިދާޅުވެ، ކުރީ ސަރުކާރުން ހިއްކާފައިވާ ބިންތައް ތަރައްގީ ކުރުމަށް ސަރުކާރަށް ގޮވާލާފައެވެ.
ރޭގެ ޖަލްސާގައި ވާހަކަދައްކަވަމުން ޢާޒިމް ވަނީ އޭނާގެ މޭޔަރުކަމުގެ ދަށުން މާލޭއަށް ކޮށްދެއްވާނެ ގިނަ ކަންކަން ހިއްސާކުރައްވައިފައެވެ.
އާޒިމްގެ ބައެއް ވައުދުތައް
• މަދުވެގެން އަހަރަކު ހަތަރު ފަހަރު އަވަށު ބައްދަލުވުން ބާއްވާއި ރައްޔިތުންގެ ބައިވެރިވުމާ އެކު ކަންކަން ނިންމުން.
ކުނީގެ މައްސަލަ ހަމައަކަށް އެޅުވުން.
• އަސާސީ ހިދުމަތް ދޭ ކުންފުނިތަކާ ގުޅިގެން ސިޓީ ކައުންސިލްގެ ހިދުމަތުގެ ފެންވަރު މަތިކުރުން.
• ޕާކިން އާއި ޓްރެފިކްގެ މައްސަލަ ހައްލުކުރަން މަސައްކަތް ކުރުން.
• ޚިދުމަތްތައް ހޯދަން އާދޭސްކުރަން ޖެހުން ހުއްޓުވުމާއި ނުފޫޒު ބޭނުންކޮށްގެން ހިދުމަތް ހޯދުން ހުއްޓުވުން.
• މާލޭގެ ބިމުގެ އޮޑިޓެއް ހަދައި ބިން ބޭނުންކުރަނީ އެންމެ ރަނގަޅަށްތޯ ބެލުމާއި ޕާކިން ޖާގަ އަށާއި ޕާކުތަކަށް ބިން ބޭނުންކުރުން.
އާޒިމް ވިދާޅުވީ އޭނާ ހިދުމަތްކުރާނީ ރައްޔިތުންނަށް ފައިދާވާ ގޮތަށް ކަމަށެވެ. އަދި ހިދުމަތް ޑުޕްލިކޭޓްކޮށް ރައްޔިތުންގެ ފައިސާ އިސްރާފްވާ ކަންތައްތަކުގައި ބައިވެރިއެއް ނުވާނެ ކަމަށެވެ.
Advertisement
This content is created and paid for by advertisers and does not involve Voice Journalists
