ރައްޔިތުންގެ މަޖިލީހަށް ވަޒީރުން ހާޒިކޮށް ސުވާލު ކުރުމާއި ގުޅޭގޮތުން ހެދިފައިވާ ގަވާޢިދާއި ޚިލާފަށް ވަޒީރާއި ސުވާލު ނުކުރެއްވުމަށް މަޖިލީހުގެ ރައީސް މުހައްމަދު އަސްލަމް އެމްޑީޕީ މެންބަރުންގެ އަރިހުން އެދިވަޑައިގެންފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި، ހޯރަފުށީ ދާއިރާގެ މެންބަރު، އިކޮނަމިކް މިނިސްޓަރު މުހައްމަދު ސަޢީދާއި ސުވާލު ކުރެއްވުމަށް އެދިލައްވާފައިވާތީ، ސުވާލަށް ޖަވާބު ދެއްވުމަށް ސަޢީދު ވަނީ މަޖިލީހަށް ހާޒިރުވެވަޑައިގެންފައެވެ.
ސަލީމްގެ ސުވާލު ބިނާ ކުރައްވާފައިވަނީ، އިހަވަންދިއްޕޮޅުގައި ކުރީ ސަރުކާރުން އަޅަން ނިންމެވި ޕޯޓާއި ގުޅޭގޮތުން ނެވެ.
އެހެން ނަމަވެސް، މަޖިލީހުގެ މެޖޯރިޓީ ޕާޓީ، އަދި އިދިކޮޅުު ޕާޓީ، އެމްޑީޕީގެ ގިނަ މެންބަރުން ސުވާލު ކުރައްވަމުން ގެންދެވީ މައުލޫއިން ބޭރުން އެހެން ސުވާލު ތަކެވެ. އެ ސުވާލު ތަކަށް ޖަވާބު ދެއްވުމަށް މިނިސްޓަރަށް ދެންނެވެން ނެތް ކަން ފާހަގަކުރައްވައި އަސްލަމް ވަނީ ތަކުރާރު ކޮށް، މަޖިލީހުގެ ގަވާއިދާއި އެއްގޮތަށް ވަޒީރާއި ސުވާލު ކުރެއްވުމަށް މެންބަރުންގެ ކިބައިން އެދިވަޑައިގެންފައެވެ.
އަދި މަޖިލީހުގެ ގަވާއިދާއި، ގާނޫނުގައި ވަކި ގޮތަކަށް ލިޔެވިފައި ވަނިކޮށް، އެއިން ބޭރުން ކުރެވޭ ސުވާލުތައް ބަލައި ނުގަނެވޭނެ ކަމަށާ، މަޖިލީހުގެ ގަވާއިދު މެންބަރުންނަށް ކަމު ނުދާ ކަމުގައި ވާނަމަ، އެ ބަދަލު ކުރުމުގެ ބާރުވެސް އެ މެންބަރުންނަށް ލިބިލައްވާކަން އަސްލަމް ފާހަގަކުރެއްވި އެވެ.
އަޅުގަނޑުވެސް ގަބޫލު ކުރަން 14 ދުވަހުގެ ނޯޓިސް ދީފައި ކަމަށް ސުވާލު ކުރެވެނީ. އެހެންވީމާ ތަކުރާރުކޮށް މިދަންނަވަނީ އެއަށްވުރެވެސް މުއްދަތު ކުރުކޮށްފައި، ވަޒީރުންނާއި ގިނައިން ސުވާލު ކުރެވޭ ގޮތަށް ހައްދަވާށޭ. އަދި އޭގެ އިތުރުން، ވަޒީރުންނާ ސުވާލު ކުރަން މީގެ ކުރިން ސުވާލުތައް ތޮއްޖެހިފައިވާ ގޮތަށް، ނުބާއްވާ، ވަކި ޚާއްސަ ދުވަހެއް ސުވާލުގެ ޖަވާބު ހޯދަން ކަނޑައަޅަން. މެންބަރުން ރިޔާސަތަށް ފޮނުއްވާ ސުވާލަށް ޖަވާބު ހޯދައި ދިނުމުގައި އަޅުގަނޑު ދެމި ހުންނާނަން. އެހެން ނަމަވެސް އިތުރު ސުވާލު ކުރާއިރު ގަވާއިދާއި ގާނޫނާ ހަމަތަކާއި އެއްގޮތަށް ސުވާލު ކުރުން އެދެން. އެނޫން ގޮތަކަށް ސުވާލު ކުރަން މެންބަރުން ބޭނުންފުޅުވެލައްވާނަމަ، މެންބަރުންނަށް އަބަދުވެސް އިޚްތިޔާރު ލިބިގެންވޭ މަޖިކީހުގެ ގަވާއިދަށް އިސްލާހު ގެންނަން ވެސް، އަދި ގާނޫނަށް އިސްލާހު ގެނައުމަށްވެސް. އިއްޒަތްތެރި މެންބަރުން އެކަން ބަދަލު ކޮށްދެއްވާ..
މަޖިލީހުގެ ރައީސް މުހައްމަދު އަސްލަމް
ވަޒީރުންނާއި ސުވާލު ކުރުމުގެ ގާނޫނު 2/2005 ގެ 16 ވަނަ މާއްދާގައިވާގޮތުން އިތުރު ސުވާލު ކުރުމުގެ ފުރުސަތު މަޖިލީހުގެ ރައީސް ދެއްވާނީ ކުރަން ބޭނުންވާ ސުވާލަކީ ނޯޓިން ދީގެން ވަޒީރާއި ކުރެއްވި ސުވާލު، ނުވަތަ އެ ސުވާލާއި ގުޅިގެން ވަޒީރު ދެއްވި ޖަވާބުން އުފެދޭ ސުވާލަކަށް ވާނަމަ ކަމަށެވެ. އަދި އެ އިތުރު ސުވާލު ކުރާނީ ވަޒީރަށް ނޯޓިސް ދީގެން ކުރި ސުވާލުގެ ޖަވާބުގައި ވަޒީރު ހާމަކުރި އެއްޗަކަށް އެބޭފުޅާގެ އާބަސް ނުވަތަ ނޫން ބަސް ކަނޑައެޅިގެން ހޯދުމަށް ނޫން ކަމުގައި ވާނަމައެވެ.
Advertisement
This content is created and paid for by advertisers and does not involve Voice Journalists
