ވެލާނާ އިންޓަނޭޝަނަލް އެއާޕޯޓް (ވީއައިއޭ) ގައި ޖާސޫސްކުރަން އުޅުނު މީހުންގެ މައްސަލަ ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) އިން ބަލަން މިއަދު ނިންމައިފިއެވެ.

ވީއައިއޭގައި ޖާސޫސް ކުރިކަމުގެ ތުހުމަތުގައި ހައްޔަރުކޮށްފައިވަނީ އިންޑިއާއަށް ނިސްބަތްވާ ދެމީހުންނެވެ. އެއީ އުމުރުން 26 އަހަރުގެ މޯޑް އޮވައިސްއާއި 41 އަހަރުގެ ގޮގްޑާ ހާރޫންއެވެ.

މިދިޔަ އަހަރު އޮގަސްޓު މަހުގެ 29 ވަނަ ދުވަހު ވީއައިއޭގައި ޖާސޫސްކުރަން އުޅުނުކަމުގެ ތުހުމަތުގައި ހައްޔަރުކޮށްފައިވާ މި ދެމީހުންގެ އަތުން ޖާސޫސްކުރުމަށް ބޭނުންވާ ސާމާނުތަކެއް ފެނިފައިވެއެވެ. އެގޮތުން، އެމީހުން ތިބީ ޖާސޫސް ކުރުމަށް ބޭނުންކުރާ ސްޕައިކެމެރާ ހަރުކޮށްގެންކަމަށް ވެސް ވަނީ މައުލޫމާތު ލިބިފައެވެ.

Advertisement

މީގެ ކުރިން ކްރިމިނަލް ކޯޓުން އެ މީހުންގެ ބަންދުގެ މުއްދަތުގެ ގޮތުގައި 10 ދުވަސް ޖެހި ނަމަވެސް، އެ މައްސަލައާ ގުޅިގެން އެކަށީގެންވާ ހެކި ނުލިބޭކަމަށް ބުނެ އެމީހުން ވަނީ ފުރުވާލާފައިވެއެވެ.

މިކަމާއި ގުޅިގެން އޭރު އިދިކޮޅު ޕާޓީތަކުން ރައްޔިތުންގެ މަޖިލީހުގައި އެކަމާ ކަންބޮޑުވުން ފާޅުކޮށްފައިވެއެވެ. އޭރު އެ މައްސަލަ ރައްޔިތުންގެ މަޖިލީހަށް މިހާރު ރާއްޖޭގެ އިޤުތިޞާދީ ތަރައްޤީއާއި ވިޔަފާރިއާ ބެހޭ ވަޒީރުކަމުގެ މަޤާމުގައި ހުންނެވި މުޙައްމަދު ސައީދު ހުށަހެޅުއްވި ނަމަވެސް، ރައްޔިތުންގެ މަޖިލީހުގެ އަޣުލަބިއްޔަތު އޮންނަ އެމްޑީީޕީން މައްސަލަ ކުރިއަށްގެންދިއުމަށް ބޭނުންނުވުމުން މަޖިލީހުގައި އެ މައްސަލަ ބެލޭނެގޮތެއްވެފައި ނުވެއެވެ.