ކުރީގެ ރައީސް އިބްރާހީމް މުހައްމަދު ޞާލިހުގެ ސަރުކާރުގެ ފިޝަރީޒް މިނިސްޓްރީގެ ކޮމިއުނިކޭޝަންސް ޑިރެކްޓަރުކަން ކުރެއްވި ނަސްރުﷲ ހުސައިން މިއަހަރުގެ ރައްޔިތުންގެ މަޖިިލީހުގެ އިންތިހާބުގައި މަޑުއްވަރީ ދާއިރާއަށް ވާދަކުރައްވާކަން އިއުލާނުކުރައްވައިފިއެވެ.

ރ މަޑުއްވަރީ ހުސްނޫވިލާ ނަސްރުﷲ އަހްމަދު ވޮއިސްއާ ވާހަކަދައްކަވަމުން ވިދާޅުވީ އެމްޑީޕީގެ ފަރާތުން އޭނާ މަޑުއްވަރީ ދާއިރާގެ ގޮނޑިއަށް ކުރިމަތިލެއްވުމަށް ނިންމެވީ ދާއިރާގެ ގޮނޑިއަށް މި ވަގުތު އެންމެ ބޮޑަށް ބޭނުން ޖެހިފައިވަނީ ދާއިރާގެ އިހްސާސްތަކާއި ދާއިރާގެ ރަށްތައް ދަންނަ ދާއިރާގެ ދަރިއަކަށް ކަމުގައިވާތީ ކަމަށެވެ.

މީގެ އިތުރުން މަޑުއްވަރީ ދާއިރާގެ ރަށްތަކުގެ ތަރައްގީގެ ކަންކަމުގައި ނުހަނު ގާތުން ބައިވެރިވެވަޑައިގެން މަސައްކަތްކުރައްވާފައި ވުމާއެކު، އިތުރަަށް މަޑުއްވަރީ ދާއިރާއަށް ޚިދުމަތްކުރެއްވުމަށް ބޭނުންފުޅުވާތީ ކަމަށެވެ.

މީގެ ކުރިން ނަސްރުﷲ ވަނީ އެމްޑީޕީގެ މަސްވެރިންގެ ގޮފީގެ ރައީސްކަމުގެ އިތުރުން އެމްޑީޕީގެ ޓިކެޓްގައި މަޑުއްވަރީ ރަށު ކައުންސިލްގެ މެންބަރުކަން ވެސް ކުރައްވައިފައެވެ. 

އެހެންކަމުން، ކެންޑިޑޭޓް ހިޔާރު ކުރުމުގައި ޕާޓީއަށް ކުލުނުހުރި ދާއިރާދެކެ ލޯބިވާ ދާއިރާއަށް ޚިދުމަތްތެރި ދާއިރާގެ ދަރިޔަކަށް ބެލުމަށް މަޑުއްވަރީ ދާއިރާގެ އެމްޑީޕީ މެންބަރުންނަށް ނަސްރުﷲ ވަނީ އިލްތިމާސްކުރައްވާފައެވެ.