ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ އަނބިކަނބަލުން ސާޖިދާ މުހައްމަދު ސިވިލް ސާވިސްގެ ވަޒީފާގައި ހުންނަވަނީ ގާނޫނާއި ހިލާފަށްކަމަށް ބުނެ، އެ ކަމަނާއާއި ސިވިލް ސާވިސް ކޮމިޝަނާ ދެމެދު ހަދާފައިވާ އެއްބަސްވުން ބާތިލްކުރުމަށް ރައްޔިތުންގެ މަޖިލީހަށް ކުއްލި މައްސަލައެއް ހުށަހެޅީ އެ ކަމަނާއަށް ފުރައްސާރަކުރުމަށް ކަމަށް ގަލޮޅު އުތުރު ދާއިރާގެ މެންބަރު އީވާ އަބްދުﷲ ވިދާޅުވެއްޖެއެވެ.
އީވާ މިފަދައިން ވިދާޅުވީ އެމްޑީޕީއަށް ނިސްބަތްވެވަޑައިގަންނަވާ ދާންދޫ ދާއިރާގެ މެންބަރު ޔައުގޫބު އަބްދުﷲ މެޑަމް ސާޖިއާއެކު ސީއެސްސީން ވެފައިވާ އެއްބަސްވުން ބާތިލްކުރުމަށް ގޮވާލާ ހުށަހެޅުއްވި ކުއްލި މައްސަލައަށް ބަހުސްކުރައްވަމުންނެވެ.
"ރައްޔިތުންގެ މަޖިލީހުގެ މިނިވަން މުއައްސަސާ ކޮމިޓީއިން ވެސް އަޅުގަނޑަށް މައުލޫމާތު ލިބިފައިވާ ގޮތުގައި ދަނީ މިކަން ބަލަމުން. އެއް ކަމަކަށް ކޮމިޓީއަކުން ރަނގަޅަށް ބަލަމުން ދާއިރު، ކުއްލިއަކަށް މި ކުއްލި މައްސަލައަކަށް ވެގެން މަޖިލީހުގެ ތަޅުމަށް ގައުމާއި، ސަރުކާރާއި ރައްޔިތުންގެ ސަމާލުކަމަށް ގެނެސްގެން ބަހުސެއް ކުރަން ޖެހޭ ކަމެއްގެ ގޮތުގައި ފެނިގެން ކުއްލި މައްސަލައެއްގެ ގޮތުގައި އަނެއްކާ އެމްޑީޕީން މި މައްސަލަ ލައިގެން ކުރިއަށް ގެންދަންވީ ސަބަބު އަޅުގަނޑަކަށް އެއްގޮތަކަށް ވެސް ނުވިސްނޭ."
އީވާ ވިދާޅުވިއެވެ.
މެންބަރު އީވާ އިތުރަށް ވިދާޅުވީ ސިވިލް ސާވިސްގެ މުއައްޒަފަކު މިވަގުތު ފަސްޓް ލޭޑީއަކަށް ހުންނެވުމުން، އެކަމުގައި ކުރިއަށް ދާނެ ގޮތެއް އެ އިދާރާއިން ވިސްނަން ޖެހޭކަމަށެވެ. އަދި ވިދާޅުވީ ރައީސެއްގެ އަނބިކަނބަލުން މަސައްކަތްކުރައްވަންވީ، ވަޒީފާ އަދާކުރައްވަންވީ ނުވަތަ އާމްދަނީ ލިބެންވީ ކޮންގޮތަކަށްތޯ ވެސް ވިސްނަންޖެހޭ ކަމަށެވެ.
5 އަހަރުގެ މުއްދަތަކަށް ފަސްޓް ލޭޑީއަކަށް ވެވަޑައިގެންނެވުމާ އެކު ވަޒީފާ މެދުކަނޑާލަން ޖެހުމުން ތާއަބަދަށް އެ ވަޒީފާ ގެއްލެންވީތޯ ވެސް އީވާ ވަނީ ސުވާލު އުފައްދަވާފައެވެ. އެހެންކަމުން މެޑަމް ސާޖިއަށް ދޭންވީ ނޯޕޭ ލީވެއްތޯ ނޫނީ މެޑަމް ސާޖި އެ މަގާމާއި ވަޒީފާއިން މިވަގުތަށް ސަސްޕެންޑް ވެވަޑައިގަންނަވަންތޯ މިއީ ވެސް ވިސްނަންޖެހޭ ކަންކަން ކަމުގައި އީވާ ވިދާޅުވިއެވެ.
މިމަައްސަލައަށް ވުރެ މާ މުހިންމު މައްސަލަތައް ހުރިކަމަށް ވިދާޅުވެ މަޖިލީހަށް ކުއްލި މައްސަލައެއް ގޮތުގައި މިމައްސަލަ މިގޮތަށް ލައިގެން މިކަން މިކުރަނީ ކަނޑައެޅިގެން ފަސްޓް ލޭޑީއަށް ފުރައްސާރަކުރަން ނޫން ގޮތަކަށް ސިފަނުވާކަމަށް ވިދާޅުވެ އީވާ ވަނީ ފާޑުވިދާޅުވެފައެވެ.
މޯލްޑިވްސް ފުޑް އެންޑް ޑްރަގް އޮތޯރިޓީގައި އަދާކުރައްވަމުން ގެންދެވި ސީނިއާ ސައިންޓިފިކް އޮފިސަރުގެ ވަޒީފާގައި ދެމިހުންނެވުމަށް ފަސްޓް ލޭޑީ ސާޖި އެދިވަޑައިގަންނަވާތީ އެ ފުރުސަތު ދެއްވުމުގެ ގޮތުން ސީއެސްސީން ހާއްސަ އުސޫލެއް ހަމަޖައްސައިދޭ ކަމަށް ބުނެ، އެ ކޮމިޝަންގެ މެންބަރުން މިނިވަން މުއައްސަސާތަކާ ބެހޭ ކޮމެޓީއަށް ވެސް ވަނީ ހާޒިރުކޮށްފައެވެ.
Advertisement
This content is created and paid for by advertisers and does not involve Voice Journalists
