ދަރިން ނުލިބޭ މީހުން ދަރިން ހޯދުމަށް ކުރާ ފަރުވާ އާސަންދަ ސްކީމުގައި ހިމެނޭ ގޮތަށް، ހުސްނުވާ އާސަންދަ ސްކީމް ހިންގުމުގެ ޤަވާއިދު އިސްލާޙުކޮށްފިއެވެ.

މިއަދު މި އިސްލާހު ގެޒެޓުކޮށް ޢަމަލު ކުރަން ފަށާފައިވާއިރު، ދަރިން ނުލިބޭ މީހުން ދަރިން ހޯދުމަށް ކުރާ ފަރުވާ ނުވަތަ އިންފަރޓަލިޓީއާ ގުޅޭ ޚިދުމަތްތައް އާސަންދަ ސްކީމުގެ ދަށުން ލިބިނުދެވޭނެ ޚިދުމަތެއްގެ ގޮތުގައި ލިސްޓުކޮށްފައި އޮތް ބައި ވަނީ އުވާލާފައެވެ.

އޭގެ އިތުރުން، ހުސްނުވާ އާސަންދައިގެ ސްކީމް ހިންގުމުގެ ގަވާއިދުގެ 18 ވަނަ މާއްދާގެ (ނ) ގައި ސްކީމުގެ ދަށުން ލިބި ނުދެވޭނެ ކަމަށް ބަޔާންކޮށްފައިވާ ޚިދުމަތްތައް ފިޔަވައި ދެން ހުރި ޚިދުމަތްތައް އެކަމާ ގުޅިގެން ކަނޑައެޅޭ ވަކި އުސޫލެއްގެ ދަށުން ފޯރުކޮށްދެވިދާނެ ކަމަށާއި، އަދި މި އުސޫލުތައްވެސް އާންމުކޮށް ޝާއިޢު ކުރަންވާނެކަމަށް މި އިސްލާޙުގައި ބުނެއެވެ.

Advertisement

އިންފަރޓަލިޓީއަށް އާސަންދައިން ޚަރަދުކުރާ ގޮތަށް އުސޫލު ބަދަލު ކޮށްފައި މިވަނީ، ދަރިމައިވުމުގެ ފަރުވާއާއި ގުޅުންހުރި ޚިދުމަތްތައް އާސަންދައިގެ ދަށުން ލިބޭނެ އިންތިޒާމުތައް ހަމަޖެއްސުމަށް މިމަހު 5 ވަނަ ދުވަހު އޮތް ކެބިނެޓް ބައްދަލުވުމުން ނިންމުމާއިއެކުއެވެ. 

ކެބިނެޓް ބައްދަލުވުމަށްފަހު، ރައީސް އޮފީހުގައި ކުރިއަށް ދިޔަ ނޫސްވެރިންގެ ބައްދަލުވުމުގައި ވާހަަކަ ދައްކަވަމުން ރައީސުލް ޖުމްހޫރިއްޔާ ޑރ މުހައްމަދު މުއިއްޒު ވަނީ ރާއްޖެއާއި ރާއްޖެއިން ބޭރުން ވެސް މި ޚިދުމަތް އާސަންދަ މެދުވެރިކޮށް ލިބޭނެކަން ފާހަގަކުރައްވާފައެވެ. އަދި އެ ޚިދުމަތް އިތުރަށް ފުޅާކުރުމަށްޓަކައި އައިޖީއެމްއެޗުގައި ހުންނަ ފާޓިލިޓީ ސެންޓަރު ވެސް އިތުރަށް ތަރައްގީ ކުރެވިގެންދާނެ ކަމަށް އެމަނިކުފާނު ވިދާޅުވި އެވެ. 

މީގެ އިތުރުން ރައީސް ޑރ. މުޢިއްޒު ވަނީ ފާޓިލިޓީ ޚިދުމަތްތައް ފުޅާކުރުމަށް އަންނަ އަހަރު ބަޖެޓްގައި 30 މިލިޔަން ރުފިޔާގެ ފާޓިލިޓީ ފަންޑެއް ހިމަނާފައިވާނެ ކަމުގައި ވިދާޅުވެފައެވެ.