ބަލިމީހާއަށް ޑޮކްޓަރު ލިޔެދޭ ބޭސް ސިޓީގައި ވަކި ބްރޭންޑެއްގެ ބޭސް ދޫކުރުމަށް އަންގައިފައިވާނަމަ ފާމަސީތަކުން ބަލިމީހާއަށް ވިއްކަން ވާނީ ސީދާ އެ ބްރޭންޑުގެ ބޭސްކަމަށާއި، އެދިފައިވާ ބްރޭންޑު ނޫން އެހެން ބްރޭންޑެއްގެ ބޭސް ދޫކޮށްގެން ހިނގާ ޓްރާންސެކްޝަންތަކަށް ފައިސާ ދޫނުކުރާނެކަމަށް އާސަންދަ ކުންފުނިން ބުނެފިއެެވެ.
އިއްޔެ އާސަންދައިން ނެރުނު ސަކިޔުލާއެއްގައި ބުނީ، އަސަންދާ ސްކީމްގެ ދަށުން ޑޮކްޓަރުން ބޭސް ލިޔެދޭއިރު، ބަލި މީހާއަށް ވަކި ބްރޭންޑެއްގެ ބޭސް ދޫކުރަން ޑޮކްޓަރު ބޭނުންވާނަމަ އެ ފަަދައިން ބޭސް ސިޓީގައި ސާފުކޮށް ލިޔަންވާނެކަމަށެވެ. އަދި އެ ބްރޭންޑުގެ ބަދަލުގައި އެހެން ބްރޭނޑެއްގެ ބޭސް ނުދިނުމަށްވެސް ސިޓީގައި އެދެން ވާނެ ކަމަށް ބުނެފައިވެއެވެ.
އަދި އެ ފަދައިން ވަކި ބޭހެއް ނޫން އެހެން ބޭހެއް ނުދިނުމަށް ޑޮކްޓަރު އެދިފައިވަނިކޮށް ބޭސް ފިހާރައިން އެ ނޫން ބްރޭންޑަކުން އެ ބޭސް ދޫކޮށްގެންނުވާނެކަމަށް ވެސް އެ އެ ސާކިޔުލާގައި ބުނެފައިވެއެވެ.
އަދި އެ ބްރޭންޑުގެ ބޭސް، އެ ބޭސް ފިހާރައެއްގައި އާސަންދަ ސްކީމުގެ ތެރެއިން ދޫކުރެެވެން ނެތްނަމަ ބޭސް ނަގަންދާ މީހާއަށް އެކަންވެސް އޮޅުން ފިލުވައިދޭންވާނެކަމަށް އާސަންދައިން ބުނެފައިވެ އެވެ.
މިއާއެކު އެ ސާކިޔުލާގައި ބުނީ، ބޭހުގެ އިންސްޓްރަކްޝަންގައި ވަކި ބްރޭންޑެއް ދޫކުރުމަށް ޑޮކްޓަރު ނުލިޔުއްވައިހާ ހިނދަކު ބޭސް ފިހާރައިން ބިލްކުރަންވާނީ ބޭސް ފިހާރައިން ބަލި މީހާއަށް ދޫކުރި ބްރޭންޑަށް ކަމަށެވެ.
އަދި ޑޮކްޓަރު ލިޔުނު ބްރޭންޑުގެ ބޭސް އެއްވެސް ބޭސް ފިހާރައަކުން ނުލިބިއްޖެނަމަ ބޭސް ބަދަލުކުރުމަށް ބަލި މީހާ ޑޮކްޓަރު ކައިރިއަށް ދާންވާނެކަމަށް ވެސް އާސަންދައިން ބުންޏެވެ.
މިއާއެކު އެ ސާކިޔުލާގައި ބުނީ، ވަކި ބްރޭންޑެއް ދޫކުރުމަށް ޑޮކްޓަރުން އެދޭ ހާލަތުގައި އެ ނޫން ބްރޭންޑެއްގެ ބޭހެއް ބޭސް ފިހާރައިން ދޫކޮށް، އާސަންދައަށް ބިލްކޮށްފިނަމަ އެފަދަ ޓްރާންސެކްޝަންތައް އާދިއްތަ ދުވަހުން ފެށިގެން ރިޖެކްޓުކުރާނެކަމަށެވެ.
Advertisement
This content is created and paid for by advertisers and does not involve Voice Journalists
