ރައީސުލްޖުމްހޫރިއްޔާ އާއި ނާއިބު ރައީސް، އެމްޑީޕީ މެންބަރުންގެ ވޯޓުން އެކަނިވެސް މަޖިލީހުގެ ތެރެއިން ވަކި ކުރެވޭ ގޮތަށް އެޕާޓީން ހުށަހެޅި އިސްލާހާއި ދެކޮޅަށް، މަޖިލިސް ކުރާގޭ ކުރިމަތީގައި ސުލްހަވެރި އިހުތިޖާޖެއް ކުރަންޖެހޭ ކަމަށް ޕީޕީއެމްގެ ހަރަކާތު ކޮމިޓީގެ ޗެއާރ އަދި މަޖިލީހުގެ ހޯރަފުށީ ދާއިރާގެ ކުރީގެ މެންބަރު މުހައްމަދު އިސްމާޢީލް ވިދާޅުވެއްޖެއެވެ. 

19 ވަނަ ރައްޔިތުންގެ މަޖިލީހުގައި މިވަގުތު ތިއްބެވި އެމްޑީޕީ މެންބަރުންގެ ވޯޓުން، ރައީސާއި ނާއިބު ރައީސް އަޒުލު ކުރެވޭ ފަދަ ގޮތަކަށް މަޖިލީހުގެ ގަވާއިދު ބަދަލު ކުރުމަށް ބުރާސްފަތި ދުވަހު އާއްމު ކޮމިޓީން ނިންމި ނިންމުމާއި ގުޅިގެން، މުހައްމަދު ކުރެއްވި ޓްވީޓެއްގައި ވިދާޅުވީ، ރައީސުލް ޖުމްހޫރިއްޔާ ޑރ މުހައްމަދު މުޢިއްޒާއި، ދިވެހިރާއްޖޭގެ އެންމެމަތީ ވެރިޔާ، ރައީސުލްޖުމްހޫރިއްޔާ ކަމުގެ މަގާމް ހަވާލު ކުރީ އެމްޑީޕީ މެޖޯރިޓީ އޮންނަ މަޖިލީހުން ނޫން ކަމަށެވެ.

އެހެނެއް ކަމަކު އެމަގާމް، އެމަނިކުފާނާއި ހަވާލު ކުރީ ދިވެހިރައްޔިތުން ކަމަށެވެ.

Advertisement

މިއާއެކު މުހައްމަދު ވިދާޅުވީ، ރައީސް އާއި ނާއިބް އަޒުލު ކުރެވޭ އިސްލާހަކީ ޑިމޮކްރަސީގެ އަސާސްތަކާ ދިވެހި ޖުމްހޫރިއްޔާގެ ގާނޫނު އަސާސީގެ ރޫހާއި ވެސް ހިލާފަށް އެމްޑީޕީން ފާސްކޮަށްފައިވާ އިސްލާހެއް ކަމަށާ، އެކަމާއި ދެކޮޅަށް އިހްތިޖާޖު ކުރަންޖެހޭ ކަމަށެވެ. 

އާއްމު ކޮމިޓީއަށް އިހަވަންދޫ ދާއިރާގެ އެމްޑީޕީ މެންބަރު މުހައްމަދު ޝިފާއު ހުށަހަޅުއްވައި، ކޮމިޓީން ފާސްކުރި އިސްލާހުގައި ބުނީ،

• ގަވާއިދުގެ ބޭނުމަށްޓަކައި މަޖިލީހުގެ ޖުމްލަ މެމްބަރުންގެ އަދަދު ގުނުމުގައި ބަލާނީ އެ ވަގުތު މަޖިލީހުގެ މެމްބަރުކަމުގައި ދެމިތިބި މެމްބަރުންގެ ޖުމްލަ އަދަދަށް ކަން

• މަޖިލީހުގެ ގޮނޑިއެއް ހުސްވެއްޖެ ނަމަ، އެ ގޮނޑިއަށް މެމްބަރަކު އިންތިހާބު ކުރުމާ ހަމައަށް މަޖިލީހުގެ ޖުމްލަ މެމްބަރުންގެ އަދަދު ގުނާއިރު ހުސްވި އެ ދާއިރާގެ ގޮނޑި ނުގުނުން 

އެހެންކަމުން، މި އިސްލާހު މަޖިލީހުގެ ތަޅުމުން ފާސްވެއްޖެ ނަމަ، މަޖިލީހުގެ ޖުމުލަ މެންބަރުންގެ ގޮތުގައި 87 މެންބަރުން ތިބި ކަމަށް ބެލުމުގެ ބަދަލުގައި ދެން ބަލާނީ 80 މެންބަރުން ތިބި ކަމަށެވެ.

އެހެން ކަމަށް ވާނަމަ، ދެން ރައީސުލްޖުމްހޫރިއްޔާ އާއި ނާއިބު ރައީސް އަޒުލު ކުރުމަށް ބޭނުންވާނީ 54 މެންބަރުންގެ ވޯޓެވެ. 

އެހެންކަމުން، މަޖިލީހުގެ ތަޅުމުން ފާސްވެއްޖެ ނަމަ ހިނގަމުންދާ 19 ވަނަ ރައްޔިތުންގެ މަޖިލީހުގެ ބޮޑު މެޖޯރިޓީއެއް އޮތް އިދިކޮޅު އެމްޑީޕީގެ މެމްބަރުންގެ ވޯޓުން އެކަނި ވެސް ރައީސް އާއި ނާއިބު ރައީސް މަގާމުން ވަކި ކުރެވުދާނެ އެވެ. އެ ޕާޓީގައި މިހާރުވެސް 55 މެންބަރުން އެބަ ތިއްބެވެ.