ރާއްޖެ-މޮރިޝަސް ކަނޑުގެ ސަރަހައްދުގެ އިން ވަކިކުރުމުން ގެއްލުނު ސަރަހައްދު ހޯދުމަށް ލިޔުންތައް ދިރާސާކޮށް، ކުރަންޖެހޭ މަސައްކަތްތައް ކުރުމަށް ބަންޑާރަ ނާއިބު އަހުމަދު އުޝާމްގެ ބެއްލެވުމުގެ ދަށުން ޚާއްސަ ކޮމިޓީއެއް އުފައްދަވައިފިއެވެ.
ކަނޑުން ގެއްލުނު ބައި ހޯދުމަށް މިހާތަނަށް ކުރެވިފައިވާ މަސައްކަތްތަކާއި ގުޅޭގޮތުން މަޢުލޫމާތު ދިނުމަށް ރައީސް އޮފީހުން ނެރުނު ބަޔާނެއްގައި ބުނީ، ދިވެހިރާއްޖޭގެ އެކްލޫސިވް އިކޮނޮމިކް ޒޯންގެ ދެކުނުން ފޯޅަވައްސާ ފުށުއަރާކަމަށްބުނެ އިންޓަރނޭޝަނަލް ޓްރައިބިއުނަލް އޮން ލޯ އޮފް ދަ ސީ، އިޓްލޮސްގައި މޮރިޝަސްގެ ފަރާތުން ހުށަހެޅި މައްސަލައާ ގުޅޭގޮތުން ނިމިދިޔަ ސަރުކާރުން ގެންގުޅުއްވާފައިވާ ސިޔާސަތުތަކަކީ ދިވެހިރާއްޖޭގެ ޤާނޫނުއަސާސީ އާއި ޤާނޫނުތަކާ ފުށުއަރާގޮތަށް އަދި ދިވެހިރާއްޖޭގެ އެންމެ މަތީ މަސްލަހަތު ގެއްލޭގޮތަށް ނިންމާފައިވާ ނިންމުމެއް ކަމަށެވެ.
އެހެން ކަމުން އެ މައްސަލާގައި އިޓްލޮސް އިން ނިންމާފައިވާ ނިންމުން ބަދަލުކުރުމަށް ކުރަންޖެހޭ އެންމެހައި ކަންކަން ކުރުމަށް ބަންޑާރަނައިބުގެ އޮފީހާއި ހަވާލު ކޮށްފައިވާ ކަމަށާއި، އެ މަސައްކަތަށް ޚާއްސަ ސަމާލުކަމެއް ދީގެން އަވަހަށް ކުރިއަށް ގެންދިޔުމާއި މަސައްކަތްތައް ވިލަރެސްކުރުމަށްޓަކައި، ބަންޑާރަ ނާއިބު، ޚާއްސަ ކޮމިޓީއެއް އެކުލަވާލާފައިވާ ކަމަށެވެ.
ކޮމިޓީ މެންބަރުން
ކުރީގެ ބަންޑާރަ ނައިބު މުހައްމަދު އަނިލް
ޑިފެންސް މިނިސްޓްރީން ކާނަލް އަހްމަދު މުޖުތަބާ
ފޮރިން މިނިސްޓްރީން ސެކްރެޓަރީ މަލްޓިލެޓެރަލް، އަހްމަދު ޝިޔާން
ރައީސް އޮފީހުން ބުނީ، މި ކޮމިޓީގެ މަސައްކަތް ހިނގަމުންދާނީ ކުރީގެ ބަންޑާރަ ނައިބު މުހައްމަދު އަނިލްގެ ބެއްލެވުމުގެ ދަށުން ކަމަށެވެ. އަދި މި މަސައްކަތް އަނިލް ކުރައްވާނީ އެއްވެސް އަގެއް ނުނަންގަވައި ކަމަށް ވެސް ރައީސް އޮފީހުން ބުނެއެވެ.
ދިވެހިރާއްޖޭގެ އެކްސްކްލޫސިވް އިކޮނޮމިކް ޒޯން (އީއީޒެޑް)ގެ ތެރެއިން ދެކުނު ކަނޑުގެ ސަރަހައްދުން ބައެއް ގެއްލޭ ގޮތަށް އިންޓަރނޭޝަނަލް ޓްރައިބުނަލް ފޮރ ދަ ލޯ އޮފް ދަ ސީ (އިޓްލޮސް)އިން ކޮށްފައިވާ ޙުކުމް އިސްތިޢުނާފުކުރުމަކީ ރައީސުލްޖުމުހޫރިއްޔާ ޑރ މުހައްމަދު މުޢިއްޒުގެ ވަޢުދުފުޅެކެވެ.
އަދި އެއީ އެމަނިކުފާނުގެ ހަފްތާ 14 ގެ މަސައްކަތްތަކުގެ ތެރޭގައި ވެސް ހިމެނޭ ކަމެކެވެ.
Advertisement
This content is created and paid for by advertisers and does not involve Voice Journalists
