ދަޢުލަތުގެ އިސްވެރިންނާއި މަޖިލިސް މެންބަރުންގެ މުސާރަ ބޮޑު ކުރުމަށް އިއްޔެ މާލިއްޔަތު ކޮމިޓީން ނިންމި ނިންމުން ކާމިޔާބު ވިޔަ ނުދެއްވާނެ ކަމަށް މަޖިލީހުގެ މައިނޯރިޓީ ލީޑަރު، އަދި މެދު ހެންވޭރު ދާއިރާގެ މެންބަރު ޢަލީ ޢާޒިމް ވިދާޅުވެއްޖެއެވެ. 

ސަރުކާރުގެ އިސްވެރިންނާއި މަޖިލިސް މެންބަރުންގެ މުސާރަ ބޮޑުކުރަން މާލިއްޔަތު ކޮމިޓީން ނިންމި ނިންމުމާއި ގުޅިގެން އާޒިމް ކުރެއްްވި ޓުވީޓެއްގައި ވަނީ، ގައުމު ބަނގުރޫޓް ވުމާއި ދިމާއަށްދާ މި ދަނޑިވަޅުގައި އެކަން އެގޮތަށް ކޮށްގެން ނުވާނެ ކަމަށް ވިދާޅުވެފައެވެ. 

"ތިކަމެއް (މުސާރަ ބޮޑު) ނުކުރެވޭނެ. ވިޔަކަ ނުދޭނަން." ޢާޒިމް ވިދާޅުވި އެވެ. 

އިއްޔެ މާލިއްޔަތު ކޮމިޓީން ވަނީ މަޖިލީސް މެންބަރުންނާއި ސަރުކާރުގެ އިސްވެރިންނާއި އެނޫންވެސް ބައެއް ފަރާތްތަކުގެ މުސާރަ ބޮޑު ކުރަން ފާސްކޮށްފައެވެ. އެގޮތުން ނިންމެވި ނިންމެވުމާއި އެކު އެލަވަންސް އަކާއި ނުލާވެސް ބޮޑު މުސާރައެއް އެފަރާތަކަށް ލިބެއެވެ.

މިބަދަލު ފާސްވެއްޖެ ނަމަ އެފަރާތްތަކަށް މުސާރަ އަކަށް ލިބޭނެ މިންވަރަކީ؛ 

ރައީސުލްޖުމްހޫރިއްޔާ 120،000ރ.

ރައީސުލްޖުމްހޫރިއްޔާގެ ނައިބު - 93،000ރ.

ވަޒީރުން - 72،000ރ.

ރައްޔިތުންގެ މަޖިލިސް މެންބަރުން - 80،000ރ.

މަޖިލީހުގެ ރައީސް - 90،000ރ.

މަޖިލީހުގެ ނައިބު ރައީސް - 88،000ރ.

އުއްތަމަ ފަނޑިޔާރު - 91،000ރ.

ގަވަރުނަރު - 74،000ރ.

އޮޑިޓާ ޖެނެރަލް - 74،000ރ.

ޕްރޮސެކިއުޓާ ޖެނެރަލް - 74،000ރ.

މޭޔަރު - 46،000ރ.

ޑެޕިއުޓީ މޭޔަރު- 40،500ރ.

ސިޓީ ކައުންސިލް މެންބަރުން 35،000ރ.

އަތޮޅު ކައުންސިލް ރައީސް 33،000ރ.

ރަށު ކައުންސިލް ރައީސް 25،500ރ.

ރަށު ކައުންސިލް ނައިބުން 20،000ރ.

ރަށު ކައުންސިލަރުން 18،000ރ.

މާލިއްޔަތު ކޮމިޓީން މުސާރަތައް ބޮޑުކުރަން ފާސްކުރި ނަމަވެސް މިކަމާ މެދު ފަހުގެ ނިންމުން ނިންމާނީ ކޮމިޓީ ރިޕޯޓަށް ބަހުސްކުރުމަށްފަހު މަޖިލީހުގެ ތަޅުމުންނެވެ.

މާލިއްޔަތު ކޮމިޓީގެ އެ ނިންމުމާއި ދެކޮޅަށް މައިނޯރިޓީ ޕާޓީ، ޑިމޮކްރެޓްސް އިން ވަނީ ތްރީލައިން ރެޑް ވިޕެއްވެސް ނެރެފައެވެ.