ހދ. ކުޅުދުއްފުށީގައި ޓޫރިޒަމް ޒޯނެއް ތަރައްގީ ކުރުމަށް ރީޖަނަލް އެއާޕޯޓްސް (އާރްއޭސީއެލް) ކޮމްޕެނީއާ ދެމެދު އެއްބަސްވުމެއްގައި މިއަދު ސޮއިކޮށްފިއެވެ. 

ރީޖަނަލް އެއާޕޯޓްސް (އާރްއޭސީއެލް) ގެ އައު މެނޭޖިންގ ޑިރެކްޓަރު އަހްމަދު މުބީން ހދ ކުޅުދުއްފުށްޓަށް ކުރެއްވި ދަތުރުފުޅުގައި އެ ސިޓި ކައުންސިލް އިދާރާގައި އޮތް ރަސްމިޔާތެއްގައި މި އެއްބަސްވުމުގައި މިއަދު ވަނީ ސޮއިކުރައްވައިފައެވެ. 

މި އެއްބަސްވުމުގައި އާރްއޭސީއެލްގެ ފަރާތުން ސޮއިކުރެއްވީ ކުންފުނީގެ މެނޭޖިން ޑައިރެކްޓަރު އަހްމަދު މުބީނެވެ. އަދި ކުޅުދުއްފުށި ސިޓީ ކައުންސިލުން ސޮއިކުރެއްވީ އެ ސިޓީގެ މޭޔަރު މުހައްމަދު އާތިފެވެ.

މި ޕްރޮޖްކެޓްގެ ދަށުން އެއާޕޯޓާ އިން ވެގެން އޮންނަ ކުޅި ހިމެނޭހެން އުތުރަށް އޮތް ހުސް ބިމުގައި ފަތުރުވެރިކަމުގެ ޒޯނެއް ތަރައްގީ ކުރާށާއި މުޅި ޒޯން ތަރައްގީ ކުރުމަށްވަނީ ހަމަޖެހިފައެވެ. 

އާރްސީއެލް އިން ބުނީ އެގޮތުން މި މަޝްރޫއުގެ އެންމެ މައިގަނޑު އެއް ބޭނުމަކީ، މިވަގުތު އެބިމަކީ ބޭނުމެއް ނުކުރެވި އޮތް ހުސްބިމަކަށްވާތީ އާއި ކުޅުދުއްފުއްޓަށާއި އަދި ކުޅުދުއްފުށީގެ ރައްޔިތުންނަށް ވެސް އެންމެ މަންފާކުރާނެ މަޝްރޫއެއް އެބިމުގައި ކުރުން ކަމަށެވެ. 

މި ޕްރޮޖެކްޓްްގެ ސަބަބުން، ކުޅުދުއްފުށި ސިޓީ އާއި ކުޅުދުއްފުށީގައިވާ އެހެނިހެން ގެސްޓްހައުސްތަކާއި ވިޔަފާރިތައް އިތުރަށް ދުނިޔޭގައި މާކެޓްވެގެންދާނެ ކަމަށާއި އަދި މިފަދަ މަޝްރޫއެއްގެ ސަބަބުން، ކުޅުދުއްފުށި އެއަރޕޯޓަށް ފްލައިޓް މޫވްމަންޓްތައް އިތުރުވެގެން ދާނެ ކަމަށް އާރްއޭސީއެލްގެ ފަރާތުން ބުނެއެވެ. 

އަދި އިގްތިސާދީ އިތުރު ކުރިއެރުން ރަށަށް ގެނައުވައިދީ އިތުރު ވަޒީފާގެ ފުރުސަތު އުފައްދައި ދިނުމަކީ ވެސް އާރްސީއެލްގެ އެއް އަމާޒުކަމުގައި އެ ކުންފުނިން ބުނެއެވެ.