މިއަހަރުގެ ޓާމް ބްރޭކް ޗުއްޓީއާއި ޓޫރިޒަމް ސީޒަނާއި ދިމާކޮށް ގިނަ އަދަދެއްގެ ބަޔަކު އެކި ދަތުރުތައް ކުރުމަށް ވެލާނާ އިންޓަނޭޝަނަލް އެއަރޕޯޓްއަށް ދާނެތީ، ފުރުމުގެ ތިން ގަޑިއިރު ކުރިން އެއާރޕޯޓްއަށް ދިއުމަށް މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އިން އިލްތިމާސްކޮށްފިއެވެ. 

މިކަން ހާމަކޮށް ވެލާނާ އިންޓަނޭޝަނަލް އެއާޕޯޓު ހިންގާ އެމްއޭސީއެލްއިން އެކްސްގައި ކުރި ޕޯސްޓެއްގައި ބުނެފައިވަނީ މި ދުވަސްވަރަކީ އެއާރޕޯޓު ޑިޕާޗާރ އަށް ބާރުބޮޑު ދުވަސްވަރެ ކަމުން ކިއުގައި ގިނަވަގުތު މަޑުކުރަން ޖެހުމާއި ފުރުމުގައި ލަސްކަމެއް ދިމާވަމުންއަންނަ ކަމަށެވެ. 

އެހެންކަމުން ރާއްޖެއިން ބޭރަށް ފުރާ ފަރާތްތަކުން ފުރުމުގެ ތިން ގަޑިއިރު ކުރިން އެއާޕޯޓަށް ދިއުމަށާއި، އެތެރޭގެ ދަތުރުތައް ކުރާ ފަރާތްތަކުން ފުރުމުގެ ދެ ގަޑައިރު ކުރިން އެއާޕޯޓަށް ދިއުމަށް އެމްއޭސީއެލުން ވަނީ އިލްތިމާސްކޮށްފައެވެ. 

މީގެ އިތުރުން އެއާޕޯޓްގައި އެހީތެރިކަން ބޭނުންވާ ފަރާތްތަކަށް އެމްއޭސީއެލްގެ މުވައްޒަފުން އެހީތެރިކަން ފޯރުކޮށްދެމުންދާނެ ކަމަށް ވެސް އެ ކުންފުނިން ބުނެފައިވެއެވެ. 

ކޮންމެ އަހަރަކު ވެސް މި ސީޒަނާއި ދިމާކޮށް، އެއާޕޯޓް ވަަރަށް ބާރުބޮޑުވާކަން ފާހަގަކޮށްލެވެއެވެ. އަދި މި ދުވަސްވަރަކީ އުމުރާއަށް ވެސް ގިނަ ބަޔަކު ފުރަމުންދާ ދުވަސްވަރެއްކަމަށްވުމުން އެއާޕޯޓްގައި ތޮއްޖެހުމުގެ މައްސަލަތައް ކުރިމަތިވެއެވެ.