މާލޭ ސިޓީގެ މޭޔަރުގެ މަގާމަށް އިންތިހާބުވެއްޖެނަމަ ފުރަތަމަ ހަމަސް ދުވަހުގެ ތެރޭގައި ބުޅާތަކަށް ހާއްސަ ޕާކެއް ހަދައިދެއްވާނެ ކަމަށް އެމްޑީޕީގެ ޓިކެޓުގައި މާލޭގެ މޭޔަރުގެ މަގާމަށް ވާދަކުރައްވާ އާދަމް އާޒިމް ވިދާޅުވެއްޖެއެވެ.
"އެމްޑީޕީ ފެހި ތަނަވަސް މާލެ" އިފްތިތާހު ކުރުމަށް ރޭ ބޭއްވި ޖަލްސާގައި ވާހަކަދައްކަވަމުން އާޒިމް ވިދާޅުވީ މާލެ ހިތްފަސޭހަ ތަނަކަށް ހަދާދެނީ މާލޭގަ އުޅޭ މީހުންނަށް އެކަނި ނޫން ކަމަށާއި، މާލޭގަ އުޅޭ ބުޅާތަކަށްވެސް މާލެއަކީ ހިތްފަސޭހަ ތަނަކަށް ހަދާދެއްވާނެ ކަމަށެވެ.
އެގޮތުން އެކަމަށްޓަކައި ބުޅާ ތަކަށް ޚާއްސަ ޕާކެއް ހެދުމަށްފަހު، މާލޭގައި އުޅޭ ބުޅާތައް އެތަނަށް ގެންދާނެކަމަށް އާޒިމް ވިދާޅުވި އެވެ.
"އެހެންވީމާ އަޅުގަނޑުމެންގެ ވިސްނުމަކީ މާލޭގައި އުޅޭ ބުޅާތަކަށް ހަމަސް ދުވަހުގެ ތެރޭގާ ރަނގަޅު ހައްލެއް ހޯދައިދިނުން. އަޅުގަނޑުމެން ބުޅަލުގެ ޕާކެއް ހަދައިދީ، އެ ބުޅާތައް އެތަނަށް ގެންދާނަން"
އާދަމް ޢާޒިމް
ބުޅާތަކަށް އަޅައިދޭ ޕާކުގައި ޕެޓް ކްލިނިކެއްގެ ހިދުމަތް ލިބޭނެ އިންތިޒާމުވެސް ހަމަޖައްސަވައިދެއްވާނެ ކަމަށް އާޒިމް ވިދާޅުވިއެވެ.
މީގެ އިތުރުން އާޒިމް ވިދާޅުވީ، މާލެއަށް ދިމާވެފައިވާ ޕާކިން، ކުނި އަދި ހިތްފަސޭހަތަންތަން މަދުވުމުގެ މައްސަލަ އަށް ހައްލެއް ގެނައުމުގެ ގޮތުން ޕޮކެޓް ޕާކިން، ޕޮކެޓް ކުނި ނަގާތަންތަނާއި، ޕޮކެޓް ޕާރކްތައް ތައާރަފްކުރައްވާނެ ކަމަށެވެ.
އަދި އެކަމަށް ހައްލު ހޯދާނީ މާލޭގައި ނުހެދި ހުރި ބިންތައް ހެދުމަށް ކުރާ މަސައްކަތްތަކުގެ ތެރެއިން ކަމަށް އޭނާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
