މާލޭ ސިޓީ ކައުންސިލްގެ ހުސްވެފައިވާ ގޮނޑިތަކަށް މެންބަރުން އިންތިޚާބުކުރުމަށް ސަރުކާރު ހިނގާ ޕީޕީއެމް/ޕީއެންސީގެ ފަރާތުން ވާދަކުރާ 3 ކެންޑިޑޭޓުންނާއި އެ ކޯލިޝަންގެ ފަރާތުން ސިޓީ ކައުންސިލްގެ މޭޔަރުކަމަށް ވާދަކުރައްވާ އާއިޝަތު އާޒިމާ ޝުކޫރު ބައްދަލުކުރައްވައިފިއެވެ. 

މި ބައްދަލުވުން ބޭއްވީ ހުކުރު ދުވަހުގެރޭ ސްޓެލްކޯގެ ފަސް ވަނަ ފަންގިފިލާ އޮޑިޓޯރިއަމްގައެވެ. 

މި ބައްދަލުވުމުގައި މާލެ ސިޓީ ކައުންސިލުގެ ހުސްވެފައިވާ ގޮނޑިތަކަށް ވާދަކުރާ ކެންޑިޑޭޓުންގެ ކެމްޕެއިން ޓީމުތަކުގައި ހަރަކާތްތެރިވާ ފަރާތަކުން ވެސް ބައިވެރިވިއެވެ.

މި ބައްދަލުވުމުގައި އާޒިމާ ވަނީ ސިޓީ ކައުންސިލް ހިންގުމަށް އޭނާގެ ފަރާތުން ހުށަހަޅުއްވާ މެނިފެސްޓޯ ހިއްސާކުރައްވާ އެ މެނިފެސްޓޯގައި ހިމަނާފައިވާ ކަންކަމާއި ގުޅޭގޮތުން ވާހަކަދައްކަވާފައެވެ. 

އަދި ކައުންސިލްގެ މެންބަރުކަމަށް ޕީޕީއެމް/ޕީއެންސީގެ ފަރާތުން ވާދަކުރައްވާ ކެންޑިޑޭޓުންގެ ސުވާލުތަކަށް އޭނާ ވަނީ ޖަވާބުދެއްވާފައެވެ.

މާލޭ ސިޓީ ކައުންސިލްގެ މޭޔަރުގެ ގޮނޑި ހުސްވެފައިވަނީ އެ މަގާމު ފުރުއްވަމުން ގެންދެވި ޑރ މުހައްމަދު މުއިއްޒު ރައީސުލްޖުމްހޫރިއްޔާ ކަމުގެ މަގާމަށް އިންތިޚާބުވެވަޑައިގަތުމުންނެވެ. 

އެގޮތުން މޭޔަރުކަމުގެ ބައި އިލްކެޝަންގައި ޖުމުލަ 5 ފަރާތަކުން ވާދަކުރައްވައެވެ. އެއީ:

1. ޝުޢައިބު ޢަލީ (އަމިއްލަ ގޮތުން)

2. ޙުސައިން ވަހީދު (އަމިއްލަ ގޮތުން)

3. ޢާއިޝަތު ޢާޒިމާ ޝަކޫރު (ޕީއެންސީ)

4. އާދަމް ޢާޒިމް (އެމްޑީޕީ)

5. ސައިފް ފާތިހު (ދަ ޑިމޮކްރެޓްސް)

މާލޭ ސިޓީގެ ހުސްވެފައިވާ މޭޔަރުގެ މަޤާމާއި ހުސްވެފައިވާ ބައެއް ގޮނޑިތަކަށް މެންބަރުން ހޮވުމަށް ބައި އިލެކްޝަން ބޭއްވުމަށް ހަމަޖެހިފައިވަނީ އަންނަ އަހަރުގެ ޖެނުއަރީ މަހުގެ 13 ވަނަ ދުވަހުއެވެ.