ދޮގު ޚަބަރު ތަކާއި ދޮގު ޚަބަރުތައް ފަތުރާ ނޫސް މަޖައްލާތަކަކީ ޑިމޮކްރަސީއަށް އޮތް ބޮޑު ބިރެއް ކަމަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު އީވާ އަބްދުالله ވިދާޅުވެއްޖެ އެވެ.
ޚިޔާލުފާޅުކުރުމުގެ މިނިވަންކަމާއި ނޫސްވެރިކަމުގެ މިނިވަންކަމަށް ހުރަސްނޭޅުމަށް ގޮވާލައި ރައްޔިތުންގެ މަޖިލީހަށް، ވެލިދޫ ދާއިރާގެ މެންބަރު މުހައްމަދު އަބްދުالله ޝަފީގު ހުށަހެޅުއްވި ކުއްލި މައްސަލައަށް ތާއީދު ކުރައްވާ ވާހަކަ ދައްކަވަމުން އީވާ ވިދާޅުވީ، ޚިޔާލުފާޅުކުރުމުގެ މިނިވަންކަން 'ވަކިވަރަކަށް' ދީފިނަމަ ގައުމުގެ މަސްލަހަތަށް ބުރޫ އަރާނެ ކަމަށް ބުނެ ދެކެވޭ ވާހަކަ އަކީ ދިވެހިރާއްޖެއަށް ޑިމޮކްރަސީ އަޔަ ނުދިނުމަށްޓަކައި ދެކެވެމުންދިޔަ ވާހަކަތަކެއް ކަމަށެވެ.
މިއާއެކު އީވާ ވިދާޅުވީ، ޚިޔާލު ފާޅުކުރުމަކީ އިންޓަނެޓްގެ ވަސީލަތްތައް ދުނިޔެއަށާއި ރާއްޖެއަށްވެސް ތަޢާރަފް ވުމުގެ ކުރިން މީހުން ކޮށް އުޅުނު ކަމެއް ކަމަށާ, އޭރު އެކަން ނުހުއްޓުނު އިރު، އިންޓަނެޓް ޢާއްމުވެފައިވާ މި ޒަމާނުގައި ނުވެސް ހުއްޓޭނެ ކަމަށެވެ.
"އަޅުގަނޑު ގަބޫލު ކުރަން، މި ފޭކް ނިޔުސް, ދޮގު ޚަބަރުތަކަކީ އެއީވެސް ޑިމޮކްރަސީއަށް އޮތް ހަމަ ބޮޑު ބިރެއް. އެހެން ނަމަވެސް، ދޮގު މައުލޫމާތާއި، ފޭކު ނިޔުސް ދައުރުވުން، އެއަށް އަޅުގަނޑުމެން ޓެކްލް ކުރަންޖެހޭނީ މުޅިން އެހެން ގޮތްގޮތަށް. ޒިންމާދާރު ގޮތް ގޮތަށް. ލޯންގް ސްޓޭންޑިންގ ހައްލުތައް ލިބޭ ގޮތްގޮތަށް. އެއްވެސް ހާލެއްގައި ސަރުކާރަކުން އެ ވެބްސައިޓުތައް ބްލޮކް ކޮށްގެން އެކަން ކުރުމަކީ އެއީކީއެއް ހައްލުވާނެ ގޮތެއް ނޫން."
އީވާ އަބްދުالله
އީވާ ވިދާޅުވީ، ނޫސްތައް ބްލޮކް ކޮށްގެން ނޫސްވެރި ކަމުގެ ހައްގުގައި ހިފެހެއްޓުމަކީ "ސަލިޕަރީ ސްލޯޕް" އެއް ކަމަށެެވެ. އަދި ނޫސްވެރިކަމާއި ޚިޔާލު ފާޅުކުރުމުގެ މިނިވަންކަމަށް ހުރަސްއެޅުމަށްފަހު ދެން ސަރުކާރުން ހިފަހަށްޓާނީ ރައްޔިތުންގެ ކޮން އަސާސީ ހައްގެއް ކަމާއިމެދު ސުވާލު އުފައްވައި، އެކަމަށް ހުށިޔާރުވެ ތިބުމަށް އޭނާ ވަނީ އެދިވަޑައިގެންފަ އެވެ.
އީވާ އިތުރަށް ވިދާޅުވީ، އެއީ ހަމަ އެކަނި ނޫސް މަޖައްލާއެއް ބްލޮކް ކުރުން ނޫން ކަމަށާ، އެހެނެއް ކަމަކު، އެއީ ސަރުކާރުން ނުރުހުންވާ ކަމެއް ފެންނަ އިރަށް އެކަމަށް ހުރަސް އެޅުން ކަމަށެވެ. އެހެންކަމުން މަޖިލިސް މެންބަރުން އެކަމަށް ހުށިޔާރުވެ އެކަން ހުއްޓުވަން މަސައްކަތް ކުރަންޖެހޭ ކަމަށް އޭނާ ވިދާޅުވި އެވެ.
Advertisement
This content is created and paid for by advertisers and does not involve Voice Journalists
