ރައްޔިތުންގެ މަޖިލީހުގެ މެންބަރުން އެދިލައްވާނަމަ، ދައުރުން ބޭރުގައި ޖަލްސާއެއް ބާއްވަވައިގެން ނަމަވެސް، ރައީސުލްޖުމުހޫރިއްޔާ ޑރ މުހައްމަދު މުޢިއްޒު ގެ ކެބިނެޓް ގެ ވަޒީރުންނަށް ރުހުން ދިނުމުގެ މައްސަލަ ކުރިއަށް ގެންދަވާނެ ކަމަށް މަޖިލީހުގެ ރައީސް މުހައްމަދު އަސްލަމް ވިދާޅުވެއްޖެއެވެ. 

ރައްޔިތުންގެ މަޖިލީހުގެ ހިނގަމުންދާ ދައުރު، މިއަދު ނިންމާލާއިރު، އެކި ސަބަބުތަކާއި ހުރެ އަދިވެސް ވަޒީރުންނަށް ރުހުން ދިނުމުގެ މައްސަލަ ކުރިއަށް ނުގެންދެއެވެ. 

އެކަމާއި ގުޅިގެން ރައްޔިތުންގެ މަޖިލީހުގެ މިއަދުގެ ޖަލްސާގައި، ބަހުސް ކުރައްވަމުން އޭދަފުށީ ދާއިރާގެ މެންބަރު އަހުމަދު ސަލީމް ވަނީ، ވަޒީރުންނަށް ރުހުން ދިނުމުގެ މައްސަލަ ކުރިއަށް ނުގެންދަނީ ޚުދުމުޚުތާރު ކަމުން ކަމަށް ވިދާޅުވެފައެވެ. 

Advertisement

ސަލީމްގެ ވާހަކައަށް ރައްދު ދެއްވައި މަޖިލީހުގެ ރިޔާސަތުގައި އިންނަވައި އަސްލަމް ވިދާޅުވީ، ވަޒީރުންގެ ރުހުން ހޯދުމުގެ މައްސަލަ ކޮމިޓީއަށް ފޮނުވައި، އަދި ކޮމިޓީއަށް ބޭނުންވާ ބައެއް މަޢުލޫމާތު ހޯދުމަށް ރައީސް އޮފީހުގައި ދެންނެވުމުން އެ މައުލޫމާތު ލިބުން ލަސްވުމުން ކޮމިޓީގެ މަސައްކަތްވެސް ލަސްވި ކަމަށެވެ. 

އަދި އެއަށްފަހު، ކޮމިޓީން އެކުލަވާލި ރިޕޯޓް، މަޖިލީހުގެ ގަވާއިދާއި ޚިލާފް ވުމުން އެ ރިޕޯޓަށް ވޯޓަށް އަހަން އޮތް ދުވަހުގައި އެކަން ނުކުރެވުނު ކަން އަސްލަމް ފާހަގަކުރެއްވި އެވެ. 

ކަންމިހެން ހުރުމުން، ރުހުން ދިނުމުގެ މައްސަލަ ނިންމުމަށްފަހު މަޖިލިސް ޗުއްޓީއަށް ދިޔުމަށްޓަކައި މަޖިލީހުގެ ދައުރު އެންމެ ބޮޑަށް ދަންމާލެވޭ މިންވަރަށް ދަންމަވާލައްވާފައިވާ ކަމަށް އޭނާ ވިދާޅުވި އެވެ. 

މީގެ ކުރިން އެއް ދުވަހު، ވަޒީރުންނަށް ރުހުން ދިނުމުގެ މައްސަލައެއް މަޖިލީހުން އެޖެންޑާ ކުރި ނަމަވެސް، ސަރުކާރުގެ މަސްއޫލިއްޔަތު އަދާ ކުރާ މިންވަރު ބަލާ ކޮމިޓީން އެކަމާއި ގުޅޭ ރިޕޯޓް އެކުލަވާލި އިރު، ވަޒީރުންގެ މެންޑޭޓް ފާސް ނުކުރުމާއި، އަދި ރުހުން ދިނުމަށް ނުވަތަ ނުދިނުމަށް ރިޕޯޓް ގައި އެދިފައި ނުވާތީ މައްސަލަ ވަނީ އަލުން އަނބުރާ ކޮމިޓީއަށް ފޮނުވާލާފައެވެ. 

އެއާއެކު އެމްޑީޕީ މެޖޯރިޓީ އޮންނަ މަޖިލީހުން އެ މައްސަލަ ގަސްތުގައި ލަސްކުރާ ކަމަށް ބުނެ ސަރުކާރަށް ތާއީދު ކުރާ ފަރާތްތަކުން އަންނަނީ ނުރުހުން ފާޅުކުރައްވަމުންނެވެ.