ރައްޔިތުންގެ މަޖިލީހުގެ ތެރެއިން ދައުލަތުގެ ވަޒީރުންނާއި ސުވާލުކުރުމުގެ ޤާނޫނު އުވައިލުމަށް މަޖިލީހަށް ހުށައަޅައިފިއެވެ.
މިމައްސަލަ މަޖިލީހަށް ހުށައަޅުއްވައިފައިވަނީ ރައްޔިތުންގެ މަޖިލީހުގެ ނައިބު ރައީސް އަދި ހޯރަފުށީ ދާއިރާގެ މެމްބަރު އަހްމަދު ސަލީމެވެ.
މެމްބަރު ސަލީމް މިމައްސަލަ ހުށައަޅުއްވައިފައިވަނީ އެ ބިލު މަޖިލީހުގެ ތަޅުމުން ފާސްކޮށް، ރައީސް ޑރ މުޙައްމަދު މުޢިއްޒު ތަސްދީގުކުރައްވާ ވަގުތުން ފެށިގެން ވަޒީރުންނާ ސުވާލުކުރުމުގެ ގާނޫނު އުވައިލެވޭނެ ހެނެވެ.
މި ބިލު ހުށަހަޅުއްވަމުން ސަލީމް ވިދާޅުވެފައިވަނީ، ވަޒީރުންނާ ސުވާލުކުރުމުގެ ޤާނޫނަކީ އާ ޤާނޫނު އަސާސީއަށް އަމަލުކުރަން ފެށުމުގެ ކުރިން އެކުލަވައިލާފައިވާ ޤާނޫނެއް ކަމަށެވެ.
އަދި މިހާރު ޤާނޫނު އޮތް ގޮތުން ވަޒީރުންނާ ސުވާލުކުރުމުގެ ހައްޤު ހަނިވާ ކަމަށް ސަލީމް ވަނީ ވިދާޅުވެފައެވެ.
މަޖިލީހުގެ ޤަވާއިދުގެ 21 ވަނަ ބާބުގައި ވަޒީރުންނާ ސުވާލު ކުރާނެ ގޮތުގެ އުސޫލެއް ބަޔާންކޮށްފައިވާތީ، މިހާރު ވަޒީރުންނާ ސުވާލުކުރުމުގެ ޤާނޫނެއް ބޭނުންނުވާ ކަމަށް މެމްބަރު ސަލީމް ފާހަގަކުރެއްވެވިއެވެ.
ވަޒީރުންނާއި ސުވާލުކުރުމުގެ ޤާނޫނަށް، ރައީސް މައުމޫން އަބްދުލްޤައްޔޫމްގެ ވެރިކަމުގައި 2005 ވަނަ އަހަރު އެކުލަވައިލެއްވި ފަހުން އެއްވެސް އިސްލާހެއް ގެނެސްފައެއް ނުވެއެވެ.
Advertisement
This content is created and paid for by advertisers and does not involve Voice Journalists
