ނިމިދިޔަ ސަރުކާރުގެ ވެރިކަމުގައި ރާއްޖެ އައި އިންޑިއާ ސިފައިން ރާއްޖޭގައި ތިބެން ބޭނުންނުވާ ކަމަށް ރައްޔިތުން ނިންމި ނިންމުން ވަރަށް ސާފު އިބާރާތުން އިންޑިއާ ސަރުކާރަށް ދަންނަވާފައި ވާނެ ކަމަށް ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ރައީސް، ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ މިރޭ ދަރުބާރު ގޭގައި އޮތް "ދިވެހީންގެ ރާއްޖެ ފެށުން" ޖަލްސާގައި ވާހަކަފުޅު ދައްކަވަމުންނެވެ.

އެމަނިކުފާނު ވިދާޅުވީ ރަސްމީ މަސައްކަތުގައި ފުރަތަމަ ދުވަހު، 18 ނޮވެމްބަރުގައި އިންޑިއާ އިން ރާއްޖެއަށް ހުވާ ކުރުމުގެ ރަސްމިއްޔާތަށް ފޮނުވި ސަރުކާރު މިނިސްޓަރާއި އެކު ބައްދަލުވުމެއް ބޭއްވުނު ކަމަށާއި މި ބައްދަލުވުމުގައި ރަސްމީ ކޮށް ދިވެހި ސަރުކާރުގެ ފަރާތުން ރާއްޖޭގައި ތިބި އިންޑިއާ ސިފައިން ގެންގޮސް ދިނުމަށް އެދިވަޑައިގެކަމަށެވެ.

މީގެ އިތުރުންވެސް އެމަނިކުފާނު ވިދާޅުވީ ވެރިކަން ބަދަލުވި ދުވަސް ކޮޅު ވެސް އިންޑިއާ ސަފީރާއި އެކު ދެ ބައްދަލުވުން ބޭއްވި ކަމަށާއި މި ބައްދަލުވުންތަކުގައި ދިވެހި ރައްޔިތުންގެ ޑިމޮކްރެޓިކް ނިންމެވުމަކީ މި ގައުމުގައި އެއްވެސް ގައުމެއްގެ ސިފައިން ނުތިބުން ކަމަށް ވަރަށް ތަފްސީލު ކޮށް ދަންނަވައި، އިންޑިއާ ސިފައިން މިތަނުން ގެންދިޔުމަށް އެދިވަޑައިގެން ކަމަށެވެ.

އެއަށްފަހު ބޭއްވުނު މަތީ ފަންތީގެ ބައްދަލުވުންތަކުގައި ވެސް ހަމަ އެބީދައިން ވަރަށް ސާފު އިބާރާތުން ދިވެހި ރައްޔިތުންގެ ނިންމުން އިންޑިއާ ސަރުކާރަށް ދެންނެވި ކަމަށް ރައީސް ޑރ.މުއިއްޒު ވިދާޅުވިއެވެ.

އިތުރަށް އެމަނިކުފާނު ވިދާޅުވީ ރިވެތި ޑިޕްލޮމެޓިކް އުސޫލުތަކުގެ ތެރެއިން، ރީތި ގޮތުގައި ވާހަކަ ދައްކައިގެން ރައްޔިތުން އެދުނު ގޮތަށް އަދި ޚުދު އެމަނިކުފާނު ވެސް ބޭނުންފުޅު ވާގޮތަށް މި ގައުމުގައި ތިބި އިންޑިއާގެ ސިފައިން ރާއްޖެއިން ފޮނުވާލާނެ ކަމަށާއި މިކަން ނިމެންދެން ކުރަން ޖެހުނު ކޮންމެ މަސައްކަތެއް ރައްޔިތުންގެ ހައްގުގައި ކުރައްވާނެ ކަމަށެވެ.

ރައީސް އޮފީހުން ބޭއްވި އެންމެ ފުރަތަމަ ނޫސްވެރިންގެ ބައްދަލުވުމުގައި، ރައީސް އޮފީހުގެ އަންޑަ ސެކެޓްރީ މުހައްމަދު ފިރުޒުލް ވިދާޅުވީ އެހާތަނަށް ބެލިބެލުމުން ރާއްޖޭގައި 77 އިންޑިއާ ސިފައިން ތިބިކަން ދެނެގަނެވިފައިވާ ކަމަށެވެ. އެހެންނަމަވެސް މިއަދު ނޫސްވެރިންނާއި އެކު ބޭއްވި ބައްދަލުވުމުގައި ރައީސް އޮފީހުގެ ތަރުޖަމާނު، މުހައްމަދު ޝަހީބު ވިދާޅުވީ އެ އަދަދު އަލުން އޮޅުންފިލުވައިގެން ފަހުން 89 ކަމަށް ވަނީ ހާމަކޮށްފައި ކަމަށެވެ. 

އިންޑިއާ ސިފައިންގެ އަދަދު ކަށަވަރު ނުވުމަކީ ގައުމީ ސަލާމަތަށް ނުރައްކާ ވާވަރު ކަމެއްތޯ މުއައްސަސާތަކުން ބަލައި އެއީ ގައުމީ ސަލާމަތަށް ނުރައްކާ ހުރި ކަމެއްގެ ގޮތުގައި އެބޭފުޅުން ފާހަގަ ނުކުރައްވާ ކަމަށް ވެސް ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ޝަހީބު ވިދާޅުވިއެވެ. 

އިންޑިއާ ސިފައިން ރާއްޖެއިން ބޭލުމާއި އިންޑިޔާއާއި އެކު ވެފައިވާ އެއްބަސްވުން ތަކުގައި ހިމެނޭ ގައުމީ ސަލާމަތަށް ނުރައްކާވާ މާއްދާތައް އުވާލުމަކީ ރައީސް ޑރ.މުއިއްޒުގެ ހަފްތާ 14 ގައި ވަރަށް ބޮޑު އިސްކަމެއް ދީގެން ހިމަނުއްވާފައި ވާކަމެކެވެ.

މިގޮތުން ދާދި ފަހުން އިންޑިއާ ސަރުކާރުގެ އެހީގައި ރާއްޖޭގެ ކަނޑުގެ ސަރަހައްދުގައި ކުރިއަށްގެންދާ ހައިޑްރޯގްރަފީ ސަރވޭ އެއްބަސްވުން ނިންމުމަކަށް ގެނައުމަށް ސަރުކާރުން ނިންމަވާފައިވާކަން ފާހަގަކޮށްލަން ޖެހެއެވެ.