މިދަނޑިވަޅަކީ އަނެއްކާވެސް އައު ހިތްވަރަކާއި އައު ޖޯޝަކާއި އެކު ރައްޔިތުންނާއި، ޤައުމުގެ ޙައްޤުގައި ސާބިތުވެ ތިބެންވީ ވަގުތު ކަމަށާއި، އައު އުންމީދުތަކާއި އައު ލަނޑުދަނޑި ތަކަކާއި އެކު ނިކުންނަންވީ ދަނޑިވަޅުކަމުގައި ކުރީގެ ފޮރިން މިނިސްޓަރު ޢަބުދުالله ޝާހިދު ވިދާޅުވެއްޖެއެވެ.

ޝާހިދު މިފަދައިން ވިދާޅުވެފައި މިވަނީ އެމްޑީޕީއަށް ނިސްބަތްވެ ވަޑައިގެންނެވި ރައްޔިތުން މަޖިލިހުގެ އިއްޒަތްތެރި 13 މެމްބަރަކު މިވަގުތު ވެރިކަންކުރާ ޕާރޓީ ޕީއެންސީ އާއި ރޭގައި ގުޅިވަޑައިގެންނެވުމާއި ގުޅިގެން ކުރެއްވި އެކްސް ޕޯސްޓެއްގައެވެ.

އެގޮތުން ޝާހިދު ވިދާޅުވީ އެމްޑީޕީ އަކީ ޑިމޮކްރެޓިކް އުސޫލުތަކުގެ މައްޗަށް ބިނާކޮށް ދިވެހިރައްޔިތުންގެ އުންމީދުތައް  ޙާސިލުކޮށް ދިނުމަށް އުފެދި ކުރިއަށްދާ ރާއްޖޭގެ އެންމެ ދުވަސްވީ އެންމެ ފަޚުރުވެރި ޕާޓީކަން މިއަދުވެސް ހަނދާން ކުރަން ޖެހޭ ކަމަށެވެ.

Advertisement

އަދި އެމްޑީޕީގެ މާޒީގައި ހިނގާފައިވާ ކަންތައްތަކަށް އިޝާރާތް ކުރައްވާ އިތުރަށް ޝާހިދު ވިދާޅުވީ އެ ޕާޓީ ވަނީ އުފަލާއި ހިތާމަޔާ، ކާމިޔާބީއާއި ނާކާމިޔާބީ ވެސް ތަޖްރިބާކޮށްފައި ކަމަށެވެ. 

"އެމްޑީޕީގެ ރަންރީދޫ ލަޝްކަރު ތިބޭނީ އަބަދުވެސް ވަރުގަދަ ޢަޒުމުގައި ހިތްވަރުގެ ކަމަރުބަނދެގެން ކުރިޔަށް މިސްރާބު ޖަހައިގެން." ޝާހިދު ވިދާޅުވިއެެވެ.

ޝާހިދުގެ އިތުރުން ނިމިދިޔަ ސަރުކާރުގެ އިސްމަޤާމުތައް އަދާކުރެއްވި އެމްޑީޕީގެ އިސް ސަފުގައި މަސައްކަތް ކުރެއްވާ ފަރާތްތަކުން ގެންދަވަނީ މި ދަނޑިވަޅުގައި އެމްޑީޕީގެ މެމްބަރުން އެކަތިގަޑަކަށްވެ ޕާރޓީގެ ރޫޙުގައި ތިބިމަށް އެޕާރޓީގެ މެމްބަރުންނަށް ގޮވާލައްވަމުންނެވެ.