ރާއްޖޭގެ މައި އެއާރޕޯރޓް ވެލާނާ އިންޓަނޭޝަނަލް އެއާޕޯޓު (ވީއައިއޭ) ޑޮމެސްޓިކް ބައިގެ  ޗެކް-އިން ސިސްޓަމަށް ދިމާވި މައްސަލަ ހައްލުވެފައިވާ ކަމަށް އެމްއޭސީއެމްއިން ބުނެފިއެވެ.

އެއާރޕޯރޓް ހިންގާ މައިކުންފުނި އެމްއޭސީއެލް އިން ބުނިގޮތުގައި ވީއައިއޭގެ ޑޮމެސްޓިކް ދަތުރުތަކުގެ ޗެކް -އިން ކުރުމުގައި މިއަދު ހެނދުނު ޓެކްނިކަލް މައްސަލައެއް ދިމާވެ، އެއާޕޯޓުގެ ޑޮމެސްޓިކް ދަތުރުތަކަށް ކޮންމެވެސް ވަރެއްގެ ލަސްތަކެއް އައިސްފައިވާ ކަމަށެވެ.  

މިކަންތަކާއި ގުޅިގެން އެމްއޭސީއެލް އިން މިއަދުގެ މެންދުރު ފަހު 'އެކްސް' ގައި ކުރި ޕޯސްޓެއްގައި ބުނީ ވެލާނާ އިންޓަނޭޝަނަލް އެއާޕޯޓުގެ ޑޮމެސްޓިކް ބައިގެ ޗެކް-އިން ސިސްޓަމަށް ދިމާވި ޓެކްނިކަލް މައްސަލަ މިހާރު ހައްލުވެފައިވާ ކަމަށެވެ. އަދި ފަސިންޖަރުންގެ ފަރާތުން ލިބުނު އެއްބާރުލުމަށް އެ ކުންފުނިން ޝުކުރު އަދާކުރާކަމަށެވެ.

Advertisement

ސްކޫލު ބަންދު ދުވަސްވަރަށް ވުމުން މިދުވަސްވަރަކީ ވަރަށް ގިނަ އަދަދެއްގެ މީހުން އަތޮޅުތަކުން މާލެ އައިސް،  އަދި މާލެއިން އަތޮޅުތަކަށް ދަތުރު ކުރަމުންދާ ދުވަސްކޮޅެކެވެ.

މީގެ އިތުރުން މިދުވަސްވަރަކީ ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރާ ދުވަސްވަރަށް ވެފައި ގިނަ އަދަދެއްގެ ފަތުރުވެރިން ވެސް އަތޮޅުތަކުގެ ރިސޯރޓްތަކަށް ދިއުމަށް އެތެރޭގެ އުދުހުންތަކުގެ ބޭނުން ހިފަމުން ގެންދާ ދުވަސް ވަރެކެވެ.

މިދުވަސްވަރު އެއާރޕޯރޓަށް ބާރު ބޮޑުވެ އެމްއޭސީއެލް އިން ވަނީ ދަތުރުކުރާ ފަރާތްތައް ޗެކިންގ ވުމުގައި އިތުރަށް ސަމާލުކަން ދިނުމަށާއި ތިންގަޑިއރުކުރިން ރާއްޖެއިން ބޭރަށް ދަތުރުކުރާ ފަރާތްތައް ޗެކިންގ ވުމަށް އިލްތިމާސް ވެސް ކުރައްވާފައެވެ.