ރައީސް ޑރ. މުހައްމަދު މުއިއްޒުގެ ވަޒީރުންނަށް ރުހުން ދިނުމުގެ މައްސަލައަށް ނިމުމެއް ގެނައުމަށްޓަކައި ދަޢުރުން ބޭރުން ޖަލްސާއެއް ބޭއްވުމަށް އެމްޑީޕީގެ މަޖިލިސް މެމްބަރުން ތައްޔާރުވާން ފަށައިފިއެވެ.
އިތުބާރު ހިފޭ ރައްޔިތުން މަޖިލހުގެ އެމްޑީޕީގެ ބައެއް ސީނިއަރ މެމްބަރުން މަޢުލުމާތު ދެއްވި ގޮތުގައި މި ސަރުކާރުގެ ވަޒީރުންނަށް ރުހުން ދިނުމުގެ މައްސަލަ އެޖެންޑާކޮށް ޖަލްސާއެއް ބެއްވުމަށްޓަކައި ބޭނުންވާ އަދަދަށް މެމްބަރުންގެ ސޮއި ހޯދުމުގެ މަސައްކަތް މިހާރު ގެންވަނީ އެ މެމްބަރުން ކުރައްވަމުންނެވެ.
މިހާތަނަށް ދަޢުރުން ބޭރުން ޖަލްސާއެއް ބާއްވައި ދިނުން އެދި މަޖިލިހުގެ ޢިދާރާއަށް ހުށައަޅާފައި ނުވިނަމަވެސް ދަޢުރުން ބޭރުން ޖަލްސާއެއް ބާއްވައި ދިނުންއެދި މަޖިލިހުގެ ޢިދާރާއަށް ވަރަށް އަވަހަށް ހުށައެޅިގެންދާނެއެވެ.
ރައްޔިތުން މަޖިލީހުގެ ޤަވާއިދު ބުނާ ގޮތުން ދައުރުން ބޭރުން ޖަލްސާއެއް ބާއްވަން، މަޖިލީހުގެ ތިންބައިކުޅަ އެއްބައި މެމްބަރުން އެދި ހުށައަޅައިފި ނަމަ 14 ދުވަހުގެ ތެރޭގައި އެ ޖަލްސާ ބާއްވަން ޖެހެއެވެ.
މަޢުލޫމާތު ލިބިފައިވާ ގޮތުގައި އެމްޑީޕީގެ ފަރާތުން ދަޢުރުން ބޭރުން ޖަލްސާއެއް ބޭއްވުމަށް މި ނިންމީ ސަރުކާރުގެ މަސްއޫލިއްޔަތު އަދާ ކުރާ މިންވަރު ބަލާ ކޮމިޓީން މިއަދު, ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ކެބިނެޓުގައި ހިމެނިވަޑައިގަންނަވާ 22 ވަޒީރުންނަށް ވެސް ރުހުން ދޭން ފެންނަ ކަމަށް ފާސް ކުރުމުންނެވެ.
މަޖިލިސް ޗުއްޓީއަށް ދިއުމުގެ ކުރިން ބޭއްވުނު އެންމެފަހު ޖަލްސާގައި މަޖިލިހުގެ ރައީސް އަސްލަމް ވެސް ވިދާޅުވެފައި ވަނީ ސަރުކާރުގެ މަސްއޫލިއްޔަތު އަދާ ކުރާ މިންވަރު ބަލާ ކޮމިޓީން އިން ވަޒީރުންނަށް ރުހުން ދިނުމުގެ މައްސަލަ ނިންމާ މަޖިލިހަށް ރިޕޯރޓް ފޮނުވައިފި ނަމަ ދަޢުރުން ބޭރުން ޖަލްސާއެއް ބޭއްވެތޯ ބައްލަވާނެކަމަށެވެ.
Advertisement
This content is created and paid for by advertisers and does not involve Voice Journalists
