ރާއްޖެއަށް މިހާރުކުރަމުންދާ ވިއްސާރައިގައި ވޭތުވެދިޔަ 24 ގަޑިއިރުތެރޭގައި އެންމެ ގިނައިން ވާރޭ ވެހިފައިވަނީ ވެލާނާ އިންޓަރނޭޝަނަލް އެއާޕޯރޓް, ވީއައިއޭ ހުންނަ ހުޅުލެއަށް ކަމަށް ތަފާސް ހިސާބުތަކުން ދައްކައިފި އެވެ.

ރާއްޖޭގެ ޤައުމީ މޫސުމާއި ބެހޭ ޢިދާރާ މެޓް އޮފީހުގެ އެންމެ ފަހުގެ ތަފާތު ހިސާބުތަކުން ދައްކާ ގޮތުގައި ވޭތުވެ ދިޔަ 24 ގަޑިއިރު ތެރޭގައި ހުޅުލެއަށް 179.7 މިލިލީޓަރުގެ ވާރޭ ވެހިފައިވެއެވެ.

އަދި ވޭތުވެދިޔަ 24 ގަޑިއިރު ތެރޭގައި 2 ވަނައަށް އެންމެ ގިނައިން ވާރޭ ވެހިފައިވަނީ ރާއްޖޭގެވެރިކަން ކުރާރަށް މާލެއަށެވެ. މާލެއަށް 118.2 މިލި ލީޓަރުގެ ވާރޭ ވެހިފައިވެއެވެ.

Advertisement

3 ވަނައަށް އެންމެ ގިނައިން ވާރޭ ވެހިފައިވަނީ ބ. ގޮއިދޫއަށެވެ. އެރަށަށް 105.6 މިލީޓަރުގެ ވާރޭވެހިފައިވާކަމަށް މެޓު އޮފީހުގެ ތަފާތު ހިސާބުތަކުން ދައްކައެވެ.

ޤައުމީ މޫސުމާއި ބެހޭ ޢިދާރާއިން މިފަދައިން ތަފާތު ހިސާބުތައް ޢާއްމުކޮށްފައިވާއިރު ވާރޭވެހި މޫސުން ގޯސްވުމުގެ ސަބަބުން ވެލާނާ އިންޓަނޭޝަނަލް އެއާރޕޯރޓްގެ ދަތުރުފަތުރަށް ވޭތުވެދިޔަ 24 ގަޑިއރު ތެރޭވަނީ ބަދަލުތަކެއް އައިސްފައެވެ. އެގޮތުން ބައެއް ފުލައިޓްތައް ޑިލޭ ވުމާއި އުޑުމަތި ނުސާފުވުމުގެ ސަބަބުން ބައެއް ފުލައިތްތައް ޑައިވާރޓް ކުރުން ފަދަ ކަންތައްތައް ހިމެނެއެވެ.

މާލެއަށް ބަލާލާއިރު މާލޭގައި ވަރަށް ބޮޑަށް ފެންބޮޑު ބައެއް ގޭގޭގައި ދިރިއުޅުނު ފަރާތްތައް ރައްކާތެރި ހިސާބުތަކަށް (އެހެން ގެތަކަކަށް ) ބަދަލުކުރަން ޖެހިފައިވެއެވެ.

މީގެ އިތުރުން ވޭތުވެދިޔަ 24 ގަޑި އިރު ތެރޭގައި ރާއްޖޭގެ އަތޮޅުތަކުގެ 5 ރަށެއްގެ ރައްޔިތުންނަށް އެހީތެރިކަން ފޯރުކޮށްދެން ޖެހިފައިވާ ކަމަށް  ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ، ބުނެފައިވެއެވެ.