ދިވެހިރާއްޖޭގައި ބޮޑެތި ބަލިތަކަށް ފަރުވާ ހޯދަމުންދާ މީހުންގެ އަދަދު ލައްކައަށް ވުރެ މައްޗަށް އަރާ ކަމަށް ފާއިތުވެދިޔަ ތިން އަހަރުގެ ތަފާސްހިސާބުތަކުން ދައްކައިފިއެވެ.

ދިވެހިކޮންމެ ރައްޔިތަކަށް އަހަރަކު ދެ ފަހަރު ހިލޭ މެޑިކަލް ޗެކަޕް ހެދުމުގެ ސިޔާސަތުގެ ދަށުން އެ ޚިދުމަތް 50 އަހަރުން މަތީގެ ފަރާތްތަކަށް މިއަދުން ފެށިގެން ފެށުމަށް ނިންމައި ރެޖިސްޓްރޭޝަނަށް ވަނީ ހުޅުވާލައިފައެވެ.

މިކަމާއި ގުޅިގެން މައުލޫމާތު ދެއްވުށް މިއަދު ބޭއްވި ނޫސްވެރިންގެ ބައްދަލުވުމެއްގައި އާސަންދަ ކުންފުނީގެ ސީއީއޯ އާމިނަތު ޒީނިޔާ ވިދާޅުވީ، މެޑިކަލް ޗެކްއަޕް އަހަރަކު ދެ ފަހަރު ހެެދޭނެ އިންތިޒާމް ހަމަޖައްސާފައި ވަނީ ވަރަށް މާތް މަގްސަދެއްގައި ކަމަށާއި މެޑިކަލް ޗެކްއަޕް ބޮޑަށް ބައްޓަން ކޮށްފައި ވަނީ ރާއްޖޭގައި މިވަގުތު އެންމެ ގިނައިން ފަރުވާ ނަގަމުންދާ ބޮޑެތި ބަދަލިތަކަށް ބެލުމަށް ފަހުގައި ކަމަށް ޒީނިޔާ ވިދާޅުވިއެވެ.

އެގޮތުން ރާއްޖޭގައި ބޮޑެތި ބައްޔަށް ފަރުވާ ހޯދަމުންދާ މީހުންގެ ވޭތުވެދިޔަ ތިން އަހަރުގެ ތަފާސްހިސާބުތަަކަށް ބަލާއިރު މިހާރުވެސް 103،441 މީހަކު އެކި އެކި ބޮޑެތި ބަލިތަކުގައި ފަރުވާ ހޯދަމުން އަންނަކަން ޒީނިޔާ ވަނީ ފަހަގަ ކުރައްވައިފއެވެ. އެއީ 2021 އިން 2023 އަށް ނަގާފައި ހުރި މައުލޫމާތުތަކަށް ބަލައެވެ.

މިގޮތުން ރާއްޖޭގައި އެންމެ ގިނައީ ހިތާއި، ހިތުގެ ލޭ ހޮޅިތަކާއި ގުޅުން ހުރި ބަލިތަކުގެ މައްސަލަތަކެވެ.

އެއީ ކޮލެސްޓްރޯލާއި، ލޭގެ ޕްރެޝަރ މައްޗަށް ދިއުމާއި، ސްޓްރޯކް މައްސަލައެވެ. އެފަދަ މައްސަލަތައް ތަހައްމަލު ކުރަމުންދާ މީހުންގެ އަދަދަކީ 57،709 އެވެ.

ދެވަނަ އަށް އެންމެ ގިނައީ ރާއްޖޭގައި ފުއްޕާމެއާ ގުޅުން ހުރި ބަލިތައް ތަހައްމަލު ކުރަމުންދާ މީހުންނެވެ. އެފަދަ 35،806 މީހަކު ތިބިއިރު، ތިން ވަނައިގައި އޮތް ހަކުރު ބަލި ތަހައްމަލު ކުރަމުންދާ މީހުންގެ އަދަދަކީ 30،803ށް އަރާއިރު، ހަތަރު ވަނައިގައި އޮތް ކިޑްނީ އާ ގުޅުން ހުުރި ބަލިތައް ތަހައްމަލު ކުރަމުންދާ މީހުންގެ އަދަދުތައް 11،635 އަށް ވަނީ އަރައިފައެވެ. އަދި ކެންސަރު ބައްޔަށް ފަރުވާ ހޯދާ މީހުންގެ އަދަދު 3،294ށް އަރައެވެ.

މިގޮތުން ބޮޑެތި ބަލިތަކުގައި މިހާރުވެސް ގިނަބަޔަކު ރާއްޖޭގައި ތަހައްމަލު ކުރަމުންދާއިރު، މެޑިކަލް ޗެކްއަޕްތައް ބައްޓަން ކޮށްފައި ވަނީ ދުރާލާ މިފަދަ ބަލިތައް ދެނެގަތުމަށްޓަކައި ކަމަށް ޒީނިޔާ ވިދާޅުވިއެވެ.