ރައްޔިތުން މަޖިލިހުގެ ރައީސް މުޙައްމަދު އަސްލަމް ރަސްމީ ދަތުރުފުޅެއްގައި މިއަދު ޔުގެންޑާއަށް ފުރާވަޑައިގެންފިއެވެ.

ރައްޔިތުން މަޖިލިހުގެ ޢިދާރާއިން ހާމަކޮށްފައިވާ ގޮތުގައި މަޖިލހުގެ ރައީސްގެ މިދަތުރުފުޅަކީ ކޮމަންވެލްތުގައި ހިމެނި ވަޑައިގަންނަވާ ޤާނޫނު ހަދާ މަޖިލިސްތަކުގެ ރައީސުންނާއި އޮފިސަރުންގެ 27 ވަނަ ކޮންފަރެންސްގައި ބައިވެރިވެ ވަޑައިގެންނެވުމަށް ކުރައްވާ ރަސްމީ ދަތުރުފުޅެކެވެ.

މަޖިލިހުގެ ރައީސް އަސްލަމުގެ މި ދަތުރުފުޅަކީ އެމަނިކުފާނު މަޖިލިހުގެ ރައީސްކަމަށް އިންތިހާބުވެ ވަޑައިގެންނުވަމަށް ފަހު ރާއްޖެއިން ބޭރަށް ކުރައްވާ ފުރަތަމަ ދަތުރުފުޅެވެ.

Advertisement

މަޖިލިހުގެ ރައީސް މުޙައްމަދު އަސްލަމް މިއަދު ރާއްޖެއިން ބޭރަށް ފުރާވަޑައިގެންނެވި އިރު ޑރ. މުހައްމަދު މުއިއްޒުގެ ސަރުކާރުގެ ވަޒީރުންނަށް ރުހުން ދިނުމުގެ މައްސަލަ ނުނިއްމާ މަޖިލިސް ޗުއްޓިއަށް ދިއުމާއި ގުޅިގެން މަޖިލިހުގެ ރައީސަށާއި މަޖިލިހުގެ މެމްބަރުންނަށް އާއްމުންގެ ފާޑުކިޔުން ވަރަށް ބޮޑަށް އަމާޒުވެފައިވެއެވެ.

މިހާރުގެ ރައީސް ޑރ. މުހައްމަދު މުއިއްޒުގެ ކެބިނެޓަށް ރުހުންދިނުމުގެ މައްސަލަ ހައްލުކުރުމުގެ ގޮތުން އެމްޑީޕީއަށް ނިސްބަތްވެ ވަޑައިގަންނަވާ މަޖިލހުގެ މެމްބަރުން ދައުރުން ބޭރުން ޖަލްސާއެއް ބޭއްވުމަސް މިހާރު ދަނީ މަސައްކަތް ކުރައްވަމުންނެވެ. އެގޮތުން ދަޢުރުން ބޭރުން ޖަލްސާއެއް ބޭއްވުމަށް ހުށައަލަށްޖެހޭ އަދަދަށް މެމްބަރުންގެ ސޮއި ހޯދުމުގެ މަސައްކަތް  އެ މެމްބަރުން ކުރައްވަމުން އެބަ ގެންދަވައެވެ.

މަޖިލިހުގެ ރައީސްގެ ފުރަތަމަ ރަސްމީ ދަތުރުފުޅަށް ފަހު މާލެ ވަޑައިގެންނެވުމަށް ހަމަޖެހިފައިވާ ދުވަހެއް މަޖިހުގެ ޢިދާރާއިން ހަމަކުރައްވާފައެއް ނުވެއެވެ.