މާލޭގައި ދަޢުރުވަމުންދާ މަސްތުވާތަކެއްޗާއި، ބަނގުރާ ދަޢުރުވުން ހުއްޓުވުމަށާއި އަދި ޓްރެކްފިކް ބެލެހެއްޓުން ހުއްޓުވުމަށްޓަކައި ފިޔަވަޅުތަކެއް އެޅުމަށް މޯލްޑިވްސް ޕޮލިސް ސާވިސްއިން ނިންމަވައިފިއެވެ.

ދިވެހި ފުލުހުންގެ މުއައްސަސާއިން ހާމަކުރައްވާފައިވާ ގޮތުގައި މިގޮތައް ނިންމަވާފައި ވަނީ ސެންޓްރަލް ޕޮލިސިންގ ކޮމާންޑް އާއި އޮޕަރޭޝަން ސަޕޯޓް ކޮމާންޑް އަދި ޑްރަގް އެންފޯސްމަންޓްގެ ސީނިއަރ ފުލުހުންނާއެކު ކޮމިޝަނަރ އޮފް ޕޮލިސް އަލީ ޝުޖާއު އިއްޔެ ބޭއްވެވި ބައްދަލުވުމެއްގައެވެ.

އިއްޔެ ބޭއްވުނު މިބައްދަލުވުމާއި ގުޅޭގޮތުން ދިވެހިންގެ ފުލުހުންގެ ޢިދާރާއިން ބުނެފައިވަނީ ، މަސްތުވާތަކެއްޗާއި ބަނގުރާ ދައުރުކުރުން ހުއްޓުވުމާ ގުޅޭގޮތުން މަޝްވަރާކޮށް، މުހިންމު ނިންމެވުންތަކެއް ނިންމާފައިވާ ކަމަށެވެ.

Advertisement

އެކަމުގެ ތަފުސީލް ދެއްވަމުން ފުލުސް އިދާރާއިން ބުނެފައިވަނީ، ޑްރަގް އެންފޯސްމަންޓާއި މެރިން ޕޮލިސް ގުޅިގެން ހުޅުމާލޭގެ ފަޅުތެރެ 24 ގަޑިއިރު މެދުނުކެނޑި ޕެޓްރޯލްކޮށް ބެލެހެއްޓުމަށާއި އަތޮޅުތެރޭގެ ރަށްރަށަށް ލަފާ ފުރާ އުޅަނދުތަކާއި، ބަނދަރުކޮށްފައި އޮންނަ އުޅަނދު ފަހަރުން ރަށްރަށަށް ބާލާ ތަކެތި މިހާރަށް ވުރެ ބޮޑަށް ބެލެހެއްޓިގެން ދައުރުކުރެވޭ ތަކެތި ކަމުގައި ހެދުމަށް އިއްޔެގެ ބައްދަލުވުމުން ނިންމާފައިވާ ކަމަށެވެ.

ފުލުހުންގެ މުއައްސަސާއިން އިތުރަށް ބުނެފައިވަނީ އެ ބައްދަލުކުރެއްވުމުގައި ވަނީ މާލޭގެ ޓްރެފިކް ބެލެއްހެއްޓުމާއި ގުޅޭގޮތުން މަޝްވަރާކުރެވި، މާލޭގެ މަގުމަތި ބެލެހެއްޓުމާއި ޓްރެފިކް ބެލެހެއްޓުން އިތުރުކުރުމަށްޓަކައި ފުލުހުން އިތުރަށް މަގުތަކަށް ނެރެ، ސްކޫލު، ހޮސްޕިޓަލް އަދި މީހުން އާންމުކޮށް އެއްވެ އުޅޭ ސަރަހައްދުތަކާއި ޓްރެފިކް ތޮއްޖެހޭ ސަރަހައްދުތަކުގެ އާންމު ސަލާމަތާއި ރައްކާތެރިކަން ބެލެހެއްޓުމަށްވެސް އިއްޔެގެ ބައްދަލުވުމުން ނިންމާފައިވާ ކަމަށެވެ.

ފުލުހުންގެ ޢިދާރާއިން ހަމަކޮށްފައިވާ ގޮތުގައި އިއްޔެ ބައްދަލުވުމުން ނިންމުނު ކަންތައްތައް މިމަހުގެ 7 ވަނަ ދުވަހުން ފެށިގެން ތަންފީޒުކުރަން ފެށުމަށްވެސް އިއްޔެގެ ބައްދަލުވުމުން ނިންމާފައިވެއެވެ.