ޖުމުލަ 25 މިލިއަން މީހުންނަށް ހިދުމަތް ދެވޭނެ އާ އިންޓަނޭޝަނަލް ޓާމިނަލަކާއި އެކު ވެލާނާ އިންޓަނޭޝަނަލް އެއާޕޯޓް ތަރައްގީ ކުރުމުގެ ދެވަނަ ފިޔަވަހީގެ މަސައްކަތް ރައީސް ޑރ. މުހައްމަދު މުއިއްޒު ރޭ އިފްތިތާޙް ކޮށްދެއްވައިފިއެވެ.

ރޭގެ ހަފުލާގައި ވާހަކަފުޅު ދައްކަވަމުން  ރައީސް ޑރ. މުހައްމަދު މުއިއްޒު ވިދާޅުވީ މިރޭ މި އިޢުލާނު ކުރެވުނު ބޮޑު މަސްރޫޢު އާއިއެކު ވެލާނާ އިންޓަނޭޝަނަލް އެއާޕޯޓް ތަރައްގީ ކުރަން މިހާރު ކުރިއަށް ގެންދާ މަޝްރޫއު އެތައް ގުނައެއް ފުޅާވެގެންދާނެކަމަށެވެ.

" އިރާދަކުރެއްވިއްޔާ ދެންމެ އިފުތިތާހްކުރެވުނު ތަޞައްވަރާއިއެކީގައި، އަޅުގަނޑުމެން އެންމެން ގުޅިގެން ދިވެހިންގެ ރާއްޖޭގެ ތަޞައްވަރު ޙަޤީގަތަކަށް ހަދާނަށް.، ފަތުރުވެރިކަމުގެ ދާއިރާއާއި އިޤްތިޞާދީ ދާޢިރާގެ ބޭފުޅުންގެ އެހީތެރިކަމާއި ފަންނީ ބައިވެރިވުމާއި އެކު މިހާރު މިކުރެވޭ މަސައްކަތް އިތުރުކޮށް 3 ގުނަ ފުޅާކުރެވޭނެ" މިރޭގެ ރަސްމިއްޔާތުގައި ރައީސް ޑރ. މުހައްދު މުއިއްޒު ވިދާޅުވިއެވެ.

މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން މިރޭ ހާމަކުރެއްވި ގޮތުގައި މި މަޝްރޫއަކީ މިހާތަނަށް އެ އެއާޕޯޓުގައި ހިންގާ އެންމެ ބޮޑު މަޝްރޫއެވެ. މިއީ 20 އަހަރަށް ބަހައިލައިގެން ހިންގާ މަލްޓިމިލިއަން ޑޮލަރުގެ މަޝްރޫއެކެވެ.

މި މަޝްރޫއުގެ ތެރެއިން ވީއައިއޭގެ ޚިދުމަތްތައް އިތުރަށް ފުޅާކޮށް، ސީޕްލޭންގެ ޚިދުމަތްތައް ފުޅާކުރުމާއި، މައި ޓާމިނަލް ތަރައްގީކުރުމާއި ޑޮމެސްޓިކް ޓާމިނަލް ތަރައްގީކުރުން ހިމެނޭއިރު، ޑޮމެސްޓިކް ޓާމިނަލް ތަރައްގީކުރަނީ ގަޑިއަކު 2،000 ފަސިންޖަރުންނަށް ޚިދުމަތް ދެވޭނެގޮތައްކަމަށް އެމްސީއެލްއިން ބުނެއެވެ.

އެމްސީއެލް އިން އާއްމުކޮށްފައިވާ މަޢުލޫމާތުތަކުން އެންމެ ފާހަގަކޮށްލެވޭ އެއްކަމަކީ ސީޕްލޭންގެ ޚިދުމަތް އެހެން ރަށަކަށް ބަދަލުކޮށް، އެ ރަށާއި ހުޅުލެއާ ބްރިޖަކުން ގުޅައިލާގޮތަށް ނިންމާފައިވާ ނިންމުމެވެ. އަދި މާލެ ކައިރިގައި އޮތް ފުނަދޫ ގައި ހުރި ތެޔޮ ޓޭންކުތައް އެހެން ތަނަކަށް ރިލޮކޭޓުކޮށް، އެ ރަށުގައި ޒަމާނީ ފެންވަރުގެ ހޮޓަލެއް ތަރައްގީކުރަން ނިންމާފައިވާ ނިންމުމެވެ.

މިރޭގެ ހަފުލާގައި ވާހަކަފުޅު ދައްކަވަމުން ރައީސް ޑރ. މުހައްމަދު މުއިއްޒު ވިދާޅުވީ މި މަޝްރޫޢުގައި ހިމެނޭ ގިނަ ކަންތައްތަކަކީ މިހާރު ހިގަމުންދާ މަޝްރޫޢުތަކާއި އެކުއެކީގައި ފެށިގެން ކުރިއަށްދާނެ މަސައްކަތްތަކެއް ކަމަށެވެ.