ރާއްޖޭގެ މައި ދޮރު، ވެލާނާ އިންޓަނޭޝަނަލް އެއާޕޯޓު، ވީއައިއޭގެ ތަރައްގީ ކުރުމަށް މަސައްކަތް ފެށިފައިވާ ބައިގެ ބޮޑުބައި މިއަހަރަށް ނިމި ހުޅުވާލެވޭނެ ކަމަށާ، އެއާއެކު 1000 އައު ވަޒީފާ އުފެދިގެން ދާނެ ކަމަށް މޯލްޑިވްސް އެއާޕޯޓް ކޮންޕެނީ ލިމިޓެޑް، އެމްއޭސީއެލްގެ ޗީފް އެގްޒެކްޓިވް ޑިރެކްޓަރ އަދި މެނޭޖިން ޑިރެކްޓަރ އިބްރާހީމް ޝަރީފް މުހައްމަދު ވިދާޅުވެއްޖެެއެވެ.
ވެލާނާ އިންޓަރނޭޝަނަލް އެއަރޕޯޓް ތަރައްޤީކުރުމާއި އިކޮނޮމިކް ޒޯން ތަރައްޤީކުރުމުގެ ބޮޑު މަޝްރޫޢު އިފުތިތާޙް ކުރުމަށް ރޭ ބޭއްވި ޖަލްސާގައި ވާހަކަ ދައްކަވަމުން ޝަރީފް ވިދާޅުވީ، އެމްއޭސީއެލް ހިންގުމާއި އެބޭފުޅާ ހަވާލުވެވަޑައިގެންނެވުމަށްފަހު ރައީސުލްޖުމުހޫރިއްޔާ ޑރ މުހައްމަދު މުޢިއްޒު ދެއްވި އިރުޝާދަކީ އައު ޓާމިނަލް އަވަހަށް ނިންމަވައި ޚިދުމަތް ދޭން ފެއްޓެވުމަށްކަމަށެވެ.
އެއާއެކު އެކަމަށް ބޭނުންވާ ޓާސްކް ފޯސް އުފައްދަވައި މަސައްކަތް ފަށްޓަވާފައިވާ ކަމަށާ، އެ މަސައްކަތް ސަރުކާރުގެ އިރުޝާދާއި އެއްގޮތަށް އަވަސް ސްޕީޑްގައި ނިންމަވާ ލެއްވޭނެ ކަމަށް ޝަރީފް ވިދާޅުވި އެވެ.
ވީއައިއޭގެ ތަރައްގީ ކުރުމަށް މަސައްކަތް ފެށިފައިވާ ބައިގެ ބޮޑުބައި މިއަހަރަށް ނިމި، ރައްޔިތުންނަށް ޚިދުމަތްދޭން ފަށާނެ. މިއާއެކު އެމްއޭސީއެލް ގައި 25 އިންސައްތަ އިތުރު ވަޒީފާ އުފެދިގެން ދާނެ. އެއީ ގާތްގަނޑަކަށް 1000 އައު ވަޒީފާ
އިބްރާހީމް ޝަރީފް މުހައްމަދު
ޝަރީފް އިތުރަށް ވިދާޅުވީ ރާއްޖޭގެ އިގްތިސާދު ކުރިއެރުވުމަށްޓަކައި، ވައުގެ ދަތުރުފަތުރު ކުރިއެރުވުމަކީ ވަރަށް މުހިންމު ކަމެއް ކަމަށެވެ. އަދި އެކަން ކުރެވޭނީ ދުރުރާސްތާ ޕްލޭން އެއް ގެންގުޅުއްވާ ބަޔަކަށް ކަމަށާ، ރައީސުލްޖުމުހޫރިއްޔާ ޑރ މުހައްމަދު މުޢިއްޒު އަކީ އެފަދަ ލީޑަރެއް ކަމަށެވެ.
ޝަރީފް ވިދާޅުވީ، މިހާރު ވީއައިއޭގެ ހުޅުވަން ތައްޔާރު ވެފައިވާ ޓާމިނަލްގެ ކެޕޭސިޓީ އަކީ 7 މިލިއަން ފަސިންޖަރުން ކަމަށެވެ. އެހެން ނަމަވެސް، ރައީސުލްޖުމުހޫރިއްޔާގެ އަމާޒާއި އެއްގޮތަށް ތަރައްގީ ކުރުމަށް ރޭ ނިންމެވިގެން ދިޔަ ޓާމިނަލް ގެ ކެޕޭސިޓީއަކީ 25 މިލިއަން ފަސިންޖަރުން ކަމަށެވެ. ވުމާއެކު ގަޑިއިރެއްގެ ތެރޭގައި 4000 ފަސިންޖަރުންނަށް ޚިދުމަތްދެވިގެންދާނެ ކަން އެބޭފުޅާ ފާހަގަކުރެއްވި އެވެ.
މީގެ އިތުރުން، މިހާރު ގަޑިއަކު 300 ފަސިންޖަރުންނަށް ޚިދުމަތްދެވޭ ވީއައޭގެ ޑޮމެސްޓިކް ޓާމިނަލްގެ މަސައްކަތް ތައް ބަދަލުވެ އައު ޓާމިނަލް އެޅި ނިމުމުން، ގަޑިއަކު 2000 ފަސިންޖަރުންނަށް ޚިދުމަތްދެވިގެންދާނެ ކަމަށްވެސް ޝަރީފް ވިދާޅުވި އެވެ.
ހަމައެހެންމެ، އަގު ހެޔޮ އެއާލައިން ތަކަށް ޚާއްސަކޮށް ލޯ-ކޯސްޓް ކެރިއަރ ޓާމިނަލް އެއް ބިނާ ކުރެވި، އެ ޓާމިނަލްއިންވެސް ގާތްގަނޑަކަށް 1000 ފަސިންޖަރުންނަށް ޚިދުމަތްދެވޭނެ ކަމަށް ވިދާޅުވި އެވެ.
އަދި ސީ ޕްލޭންގެ ވަސީލަތްތައް ވެސް ތަރައްގީ ކޮށް ފުޅާ ކުރެވޭނެކަމަށް ޝަރީފް ވިދާޅުވި އެވެ.
މީގެ އިތުރުން، ޝަރީފް ވިދާޅުވީ ވެލާނާ އިންޓަރނޭޝަނަލް އެއަރޕޯޓް ތަރައްޤީކުރުމާއި އިކޮނޮމިކް ޒޯން ތަރައްޤީކުރުމުގެ ބޮޑު މަޝްރޫޢު ނިމޭއިރު، އެމްއޭސީއެލްގެ ފިޔުލް ކެޕޭސިޓީ، 15 މިލިއަނުން، 45 މިލިއަނަށްވެ، 100 މިލިއަނާއި ހަމައަށް އިތުރުވެގެންދާނެ ކަމަށެވެ. އަދި ޔޫރަޕިއަން ޔޫނިއަންގެ އޭވިއޭޝަން ސޭފްޓީ މިންގަޑު ތަކަށް ފެތޭ މުޅިން އައު އެމްއާރއޯ ފެސިލިޓީއެއް ގާއިމް ކުރެވިގެންދާނެ ކަމަށްވެސް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
