ބައިނަލްއަގްވާމީ ގޮތުން އިންޑިއާ އާއި އެކު ގުޅުންތައް ކުރިއަށް ގެންދާނެ ގޮތް ނިންމާނީ ރާއްޖެއިން ކަމަށް އިންޑިއާގެ ފޮރިން މިނިސްޓްރީގެ ތަރުޖަމާނު ރަންދީރު ޖައިސްވާލް ވިދާޅުވެއްޖެއެވެ.

އިންޑިއާގެ ނޫހަކުން ބުނެފައިވަނީ އިންޑިއާ އާއި ޗައިނާއިން ވެސް މި ސަރަހައްދުގައި ނުފޫޒު ފޯރުވުމަށް ވާދަކުރާއިރު، ރާއްޖެއިން ޗައިނާ އަށް ދަރާފައިވާ 1.3 ބިލިއަން ޑޮލަރާއި އެކު ރައީސް ޑރ. މުއިއްޒުގެ ސަރުކާރުން ބޮޑަށް ލެނބިފައިވަނީ ޗައިނާ އާއި ދިމާލަށް ކަމަށެވެ.

މީގެ އިތުރުންވެސް އޭނާ ބުނުއްވީ އިންޑިއާ އަށް ޒިޔާރަތް ކުރެއްވުމުގެ ކުރިން ޗައިނާއަށް ވަޑައިގަތުމަކީ ވެސް މި ކަމުގެ "ސިގްނަލެއް" ކަމަށެވެ.

އިންތިހާބުވެވަޑައިގަތުމަށްފަހު ގިނަ ރައީސުން އެންމެ ފުރަތަމަ އިންޑިއާއަށް ޒިޔާރަތް ކުރެއްވި ނަމަވެސް ރައީސް ޑރ.މުއިއްޒު ވެރިކަމާއި ހަވާލުވެ ވަޑައިގަތުމަށް ފަހު އެންމެ ފުރަތަމަ ވަޑައިގެންނެވީ ތުރުކީއަށެވެ.

އެއަށް ފަހު ޔުނައިޓެޑް އަރަބް އެމިރޭޓްސްގައި އޮތް ކޮޕް 28 ސަމިޓް އަށް ވަޑައިގެން އެމަނިކުފާނު ވަނީ އިންޑިއާގެ ބޮޑުވަޒީރު ނަރެންދުރަ މޯދީއާ ބައްދަލުކުރައްވާފައެވެ. މި ބައްދަލު ކުރެއްވުމުގައި އިންޑިއާ ސިފައިން އަނބުރާ ގެންދިއުމާ ގުޅޭ ގޮތުން މަޝްވަރާ ކުރުމަށް ދެގައުމުން ވަނީ ކޯ ގްރޫޕެއް އުފައްދައިފަ އެވެ. 

އިންޑިއާ ސިފައިން ރާއްޖެއިން ފޮނުވާލުމަކީ ރައީސް ޑރ.މުއިއްޒު ވަރަށް އިސްކަމެއް ދީގެން ކުރައްވަމުންގެންދަވާ ކަމެކެވެ. މި ގޮތުން އިންޑިއާ ސިފައިން ރާއްޖެއިން ފޮނުވާލުމާއި ބެހޭ މަޝްވަރާތައް އެމަނިކުފާނު ވެރިކަމަށް ވަޑައިގެންނެވި ފުރަތަމަ ދުވަހު ވަނީ ފައްޓަވާފައި އެވެ.