އެމްޕީއެލް ދެވަނަ ޑިވިޝަން ފުޓްބޯޅަ މުބާރާތުގެ ގްރޫޕް ސީގައި ހޮނިހިރު ދުވަހުގެ ހަވީރު ކުޅެވުނު މެޗުގައި 3-0 ގެ ނަތީޖާއަކުން ކްލަބް ޕީކޭ ބަލިކޮށް ލެގޫންސް ސްޕޯޓްސް ކުލަބުން މުބާރާތް ފެށީ މޮޅަކާއެކު އެވެ.

މުބާރާތުގައި ކުލަބު ޕީކޭ އިން ކުޅުނު ފުރަތަަމަ މެޗުގައި ވިކްޓަރީ ސްޕޯޓްސް ކުލަބު އަތުން 3-0 ގެ ނަތީޖާއަކުން އެޓީމު ބަލިވެފައިވާއިރު، މި މެޗަކީ އެންމެ ފަހުގެ ތިންވަނަ ޑިވިޝަން ޗެމްޕިއަން ލެގޫންސް ސްޕޯޓްސް ކުލަބުން މުބާރާތުގައި ކުޅުނު ފުރަތަަމަ މެޗެވެ.

ތަޖުރިބާކާރު ކޯޗު މުހައްމަދު ޝާޒްލީ (ޝާޒް) ގެ އިރުޝާދުގެ ދަށުން މިއަހަރު ދެވަނަ ޑިވިޝަންގައި ވާދަކުރަމުން އަންނަ ލެގޫންސުން މި މުބާރާތަށް ވަރުގަދަ ސްކޮޑެއް އެކުލަވާލާފައި ވާއިރު، އެޓީމުގައި ބިދޭސީ ހަ ކުޅުންތެރިއަކު ހިމަނާފައެވެ. އޭގެ ތެރޭގައި ކުރިން ދިވެހި ޕްރިމިއާ ލީގުގައި ޓީސީ ސްޕޯޓްސް ކްލަބަށް ކުޅުނު އަޒަރުބައިޖާން ކީޕަރު އެލްމައްދީން މަމަޑޯވް، އާއި ކުރިން އީގަލްސް އަށް ކުޅުނު ރަޝިއާ ފޯވާޑް ވްލަޑިސްލާވް ކޯމިޝިން ފާހަގަކޮށްލެވެއެވެ.

މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު، މިހާފުގައި ދެޓީމުން ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ޕީކޭ އަށް ލިބުނު ފުރުސަތުތަކުގެ ބޭނުން ނުކުރެވި ދިޔައިރު، ލެގޫންސުން މެޗުގެ ލީޑު ހޯދީ ފުރަތަމަ ހާފުގެ 44 ވަނަ މިނެޓުގައެވެ.

މިލަނޑު ކާމިޔާބުކޮށްދިނީ އެޓީމުގެ ސްރީލަންކާ ގައުމީ ޓީމު މިޑްފީލްޑަރު މުހައްމަދު އަމަން ފައިޒާ އެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ލެގޫންސް ކުރީގައި އޮވެގެންނެވެ.މެޗުގެ ދެވަަނަ ހާފުގައި ލެގޫންސުން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ.

ނަތީޖާއެއްގެ ގޮތުން މިހާފުގައި އެޓީމުން ވަނީ އިތުރު ދެ ލަނޑު ކާމިޔާބުކޮށްފައެވެ. އަދި މި ދެލަނޑު ވެސް ކާމިޔާބުކޮށްދިނީ ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެންނުކުތް އަހުމަދު ރިފްޝާން އެވެ. އޭނާ އަކީ މީގެ ކުރިން ވެސް ދެވަނަ ޑިވިޝަންގެ ގިނަ ޓީމުތަކަކަށް ކުޅެފައިވާ ތަޖުރިބާކާރު ކުޅުންތެރިއެކެވެ.

މިމެޗުގައި ލެގޫންސުން ކާމިޔާބުކުރި ދެވަނަ ލަނޑު ފަހުހާފުގެ 69 ވަނަ މިނެޓުގައި ރިފްޝާން ކަމިޔާބުކުރި އިރު، އެޓީމުގެ ތިންވަނަ ލަނޑު އޭނާ ކާމިޔާބުކޮށްދިނީ 83 ވަނަ މިނެޓުގައެވެ. މިލަނޑާއެކު މެޗުގެ ކުޅުން ނިމިގެންދިޔައީ 3-0 ގެ ނަތީޖާއަކުން ލެގޫންސް ކުރީގައި އޮވެގެންނެވެ.

މިއަހަރުގެ ދެވަނަ ޑިވިޝަން ފުޓްބޯޅަ މުބާރާތުގައި ޖުމުލަ 15 ޓީމަކުން ބައިވެރިވެފައިވާ އިރު، މުބާރާތް ކުރިއަށްދަނީ ބައިވެރިވި 15 ޓީމު ތިން ގުރޫޕަކަށް ބަހާލައިގެންނެވެ. ކޮންމެ ގުރޫޕަކުން އެއްވަނަ އަދި ދެވަނަ ހޯދާ ދެޓީމަށް ކުއާޓާ ފައިނަލުން ޖާގަ ލިބޭއިރު، ކުއާޓާގެ ފަހު ދެޖާގަ ލިބިގެންދާނީ ތިން ގުރޫޕުން ވެސް ތިންވަނަ ހޯދާ ޓީމުތަކުގެ ތެރެއިިން އެންމެ ނަތީޖާ ރަގަޅު ދެޓީމަކަށެވެ.

ގްރޫޕް ސީގައި ލެގޫންސް، ޕީކޭ، ވިކްޓަރީ، ލޮރެންޒޯ ސްޕޯޓްސް ކްލަބުގެ އިތުރުން ދެން ހިމެނެނީ ބިސްބުރު ސްޕޯޓްސް ކްލަބެވެ. މިގުރޫޕްގެ ފުރަތަަމަ މެޗުގައި ޕީކޭ އާއި ވިކްޓަރީ ވާދަކުރި މެޗު 3-0 ގެ ނަތީޖާއަކުން ވިކްޓަރީ ކާމިޔާބުކުރިއިރު ލޮރެންޒޯ އާއި ބިސްބުރު ބައްދަލުކުރި މެޗު 4-1 ގެ ނަތީޖާއަކުން ކާމިޔާބުކުރީ ލޮރެންޒޯ އެވެ.